80
1 Bene chee̱ntu', Lue' dxuxú' benne' Israel ca',
Lue' na', dxuxú' zri'ine zre sua José ca zríla'du ca',
ne dxe'u lataj blau chiu' da zua na láwela querubín ca'.
2 Ble'e xel-la' szren chiu' lau zri'ine zre sua Efraín,
ne Benjamín, ne Manasés.
Ble'e xel-la' waca chiu', ne gudá guseláu' netu'.
3 Beché̱' netu', Dios.
Bexache lazre' netu', na' lantu'.
4 Xránantu' Dios, napu' dute̱ xel-la' waca,
¿bata chajse̱queze zra'u netu',
ne quebe xennu' ca da nábantu' Lue'?
5 Bzúale̱'u netu' lu xel-la' dxewí'ine lazre',
ne bzílale̱'u nisa dxebézrentu'.
6 Be̱'u lataj xe̱zr la xu walizre ca' bulucá'ana dítaje̱' netu',
na' benne' ca' dxeledábague̱' netu' belún le̱' chee̱ntu'.
7 Beché̱' netu', Dios, napu' dute̱ xel-la' waca.
Bexache lazre' netu', na' lantu'.
8 Bebéaju' tu zrigu' lba uva lu xe̱zr la xu Egipto da naca na
bénneache chiu'.
Blagu' benne' xe̱zr la xu gulezré̱'e̱ nigá, na' guzu' nigá
zrigu' lba uva na'.
9 Gú'unu' lba uva na' chee̱ gula na.
Bdéle̱'e̱ lue zrigu' lba uva na', na' gucu na xe̱zr la xu na'.
10 Gulú'u na zrul-la xúgute̱ xi'a ca',
na' zruze na ca' gulegú'u na zrul-la xaga cedro zren ca'.
11 Gulechiluj zruze na, belezrinte̱ na dxu'a nísadau',
ne belezrinte̱ na dxu'a xe̱gu Eufrates.
12 ¿Bizr chee̱ na' gucá'u le'aj da naxechaj na le̱ na?
Na'a xúgute̱ benne' dxeledé na' dxelebane̱' da zixre chee̱ na.
13 Dxuluchuchu dxululéaj cuche xixre' ca' lba uva na',
na' be̱ xixre' ca' dxeláguba' na.
14 Bedá chee̱ntu', Dios, napu' dute̱ xel-la' waca.
Gunná' netu' ga na' zu' xabáa, ne gudá xedajnná'u lba uva chiu'.
15 Gudá, guseláu' lba uva nigá, da gúzaquezu'.
Bechuj chee̱ lba uva na', ba bzua chuchu' gaca na chiu'.
16 Benne' ca' dxeledábague̱' netu' ba gulechúgue̱' lba na',
ne ba guládue̱' na xi'.
Gunná' benne' ca' lu xel-la' dxezrá'a chiu',
ne bzria xi' benne' ca'.
17 Bzua chuchu, ne bxue benne' ca' ba guca'u,
benne' xe̱zr la xu na' ba nuzúa chuchu'.
18 Cabátadxa cueaj xíchajntu' Lue' xecha lasa.
Bcache chawe' netu', naca bantu', na' güe lá'anantu' Lau'.
19 Xránantu' Dios, napu' dute̱ xel-la' waca, beché̱' netu'.
Bexache lazre' netu', na' lantu'.