3
Widi'zh che'n Juan xa' mililëi' men
(Mt. 3:1-12; Mr. 1:1-8; Jn. 1:19-28)
1 Or nzha chi'n li'n nak Tiberio César rey lo rë men Roma, lë' Pons Pilat nak gobiernador lo rë men Judea; no Herodes nak gobiernador lo rë men Galilea; lë' wech xa' Lip nake lo rë men Iturea no lo rë men Traconite; mbaino lë' Lisanias nak gobiernador lo rë men Abilinia.
2 Le'n mis rë ngubizh ze', lë' Anás no Caifás nak ngulëi' ro. Orze' midi'zh Dios lo Juan, xga'n Zacarías or nzho xa' le'n yuo bizh.
3 Nguzublo Juan nded xa' rë yezh kwa'n ña'n plo nak you' Jordán, kiyab xa' lo rë men, naki'n la' bixa' rë kwa'n gat lë' nile' bixa', orze' gaklëi' bixa' le'n nits par lu', walika mila' bixa' kwa'n nak bixa', nes par che' Dios rë kwa'n nzë'b xki bixa'.
4 Kure' ngok nela xmod midi'zh ka Isaías, tu xa' midi'zh por Dios, or nzhab xa':
Gon go tu men nzo le'n yuo bizh, kidi'zh xa' naye:
“Bizuxkwa' go laxto' go par yo Dios laxto' go,
nale'tra' go kwa'n gat lë',
5 porke rë men nado', lë' Dios le' gak xa' men tsak,
per rë xa' nile' xigab dox tsak xa',
lë' Dios le', che'ptsa zi xa' lo men.
Rë men nikizë nez gat lë', naki'n ban xa' nali,
no rë xa' di'zhyix, naki'n di'zh xa' kwa'n ñal,
6 mbaino rë men yizhyuo libe' xa' kwa'n xë'l Dios,
par ko' men lo rë kwa'n nazhe'b nzho bixa'.”
7 No or nzha men par gaklëi' men le'n nits lo Juan, per nzhab Juan lo bixa':
―¡Rë go, men nakap, xa' nak nela mbë'l nayi' ga'! ¿Cho ne lo go, nab por gaklëi' go, le' go gan lo kwa'n nazhe'b kwa'n xë'l Dios par rë men kwa'n nzë'b xki lo Me?
8 Nal bilu' go walika, mila' go rë kwa'n gat lë' nile' go. Mbaino nagabt go por nzë go ben che'n Abraham, xmë'd Dios go, porke Dios gak le' kun rë ke nzhin re', gake xa' nzë ben che'n Abraham,
9 porke rë go nak nela rë ya kwa'n nazu't ga'. Kuze' biwi'u, lë' yi'b ya nzo la list par cho' haxta rë luch che'n rë nak ya kwa'n gat niza't xlë wen, orze' yubiy par yoi lo ki.
10 Orze' nzhab rë men lo Juan:
―Nal, ¿kwan naki'n le' no?
11 Orze' nzhab Juan:
―Rë xa' kinu chop nez xab, naki'n za' xa' tube ka' xa' kwa'n gat kinute, mbaino xa' kinu kwa'n gao, naki'n ki'z xa'i, gao xtu xa' gat kinute.
12 No ngwa pla xa' nikan dimi che'n gubier Roma lo Juan par gaklëi' bixa', mbaino nzhab bixa' lo Juan:
―Maestr, no ga', ¿kwan naki'n le' no?
13 Orze' nzhab Juan:
―Guna'b go dimi kwa'n ñal na'b go namás, nana'bt goi di más.
14 No nu pla sondad gunabdi'zh, nzhab bixa':
―Mbaino no ga', ¿kwan naki'n le' no?
Orze' nzhab Juan:
―Nalat go dimi jwers lo men, no ni nakë' go kixu' men; mbaino bizak laxto' go kun kwa'n nzhax ka' go namás.
15 No nal, rë xa' kwa'n dox xigab nile', pok xë'l Dios Krist; mile' bixa' xigab paste lë' Juan nak Krist,
16 per nzhab Juan lo rë men:
―Walika, nililëi'ya men le'n nits namás, per xtu xa' yi'd más tsak lon. Per ni gat ñal da gak da tu mos che'n xa', porke yent kwan tsak da par lë' xa'. Xa' re' li'lëi' go kun Sprit che'n Dios, no kun bël.
17 No lë' Me nzen la kwa'n par tsumbe Me triu, par ki'b Me yix le'ne. No kan Me triu par kuchao' Mei le'n yo', no lë' yix kwa'n yi'b le'ne, kubi Me le'n bël kwa'n nayot yal.
18 Se' midi'zh Juan lo rë men, no kun más rë widi'zh par nzhab xa' xmod ko' Dios men lo rë kwa'n nazhe'b nzho men.
19 No nu ndil Juan Herodes, xa' nile' mandad lazh men Galilea, por kinu xa' Herodías, una' che'n wech xa' Lip, no por más rë kwa'n gat lë' kwa'n nak Herodes.
20 No xid rë kwa'n gat lë' kwa'n mile' Herodes, mile' xa' xtu kure'; ngulo xa' Juan lizhyi'b.
Ngoklëi' Jesús le'n nits
(Mt. 3:13-17; Mr. 1:9-11)
21 No or kililëi' Juan men le'n nits, nu Jesús ngoklëi' lo Juan; no dub kina'b Jesús lo Dios, mixa'l lo yibë',
22 orze' milu' ngula Sprit che'n Dios yek Jesús nela tu palom ga', no mien tu widi'zh lo yibë' kwa'n nzhab se':
―Lu nak Xga'na, kwa'n nazhi' da; mbaino dox nizak laxto'n, niwi'n lol.
Ben che'n rë men re' nzë Jesús
(Mt. 1:1-17)
23 Nzhap Jesús gal bichi' li'n or nguzublo nkë Jesús zhi'n nazhon che'n Dios. Nzhab men, lë' Che ngok xuz Jesús,
lë' Elí ngok xuz Che.
24 Lë' Matat ngok xuz Elí,
lë' Leví ngok xuz Matat,
lë' Melqui ngok xuz Leví,
lë' Jana ngok xuz Melqui,
lë' Che ngok xuz Jana,
25 lë' Matatías ngok xuz Che,
lë' Amós ngok xuz Matatías,
lë' Nahum ngok xuz Amós,
lë' Esli ngok xuz Nahum,
lë' Nagai ngok xuz Esli,
26 lë' Maat ngok xuz Nagai,
lë' Matatías ngok xuz Maat,
lë' Semei ngok xuz Matatías,
lë' Che ngok xuz Semei,
lë' Judá ngok xuz Che,
27 lë' Joana ngok xuz Judá,
lë' Resa ngok xuz Joana,
lë' Zorobabel ngok xuz Resa,
lë' Salatiel ngok xuz Zorobabel,
lë Neri ngok xuz Salatiel,
28 lë' Melqui ngok xuz Neri,
lë' Adi ngok xuz Melqui,
lë' Cosam ngok xuz Adi,
lë' Elmodam ngok xuz Cosam,
lë' Er ngok xuz Elmodam,
29 lë' Josué ngok xuz Er,
lë' Elieser ngok xuz Josué,
lë' Jorim ngok xuz Elieser,
lë' Matat ngok xuz Jorim,
30 lë' Leví ngok xuz Matat,
lë' Simeón ngok xuz Leví,
lë' Judá ngok xuz Simeón,
lë' Che ngok xuz Judá,
lë' Jonán ngok xuz Che,
lë' Eliaquim ngok xuz Jonán,
31 lë' Melea ngok xuz Eliaquim,
lë' Mainán ngok xuz Melea,
lë' Matata ngok xuz Mainán,
lë' Natán ngok xuz Matata.
32 Lë' Dabi ngok xuz Natán,
lë' Isaí ngok xuz Dabi,
lë' Obed ngok xuz Isaí,
lë' Booz ngok xuz Obed,
lë' Salmón ngok xuz Booz,
lë' Naasón ngok xuz Salmón,
33 lë' Aminadab ngok xuz Naasón,
lë' Aram ngok xuz Aminadab,
lë' Esrom ngok xuz Aram,
lë' Fares ngok xuz Esrom,
lë' Judá ngok xuz Fares,
34 lë' Jakob ngok xuz Judá,
lë' Isaac ngok xuz Jakob,
lë' Abraham ngok xuz Isaac,
lë' Taré ngok xuz Abraham,
lë' Nacor ngok xuz Taré,
35 lë' Serug ngok xuz Nacor,
lë' Ragao ngok xuz Serug,
lë' Peleg ngok xuz Ragao,
lë' Heber ngok xuz Peleg,
lë' Sala ngok xuz Heber,
36 lë' Cainán ngok xuz Sala,
lë' Arfaxad ngok xuz Cainán,
lë' Sem ngok xuz Arfaxad,
lë' Noé ngok xuz Sem,
lë' Lamec ngok xuz Noé,
37 lë' Matusalén ngok xuz Lamec,
lë' Enoc ngok xuz Matusalén,
lë' Jared ngok xuz Enoc,
lë' Mahalaleel ngok xuz Jared,
lë' Cainán ngok xuz Mahalaleel,
38 lë' Enós ngok xuz Cainán,
lë' Set ngok xuz Enós,
lë' Adán ngok xuz Set,
lë' Dios ngok xuz Adán.