1-2 Ka'athaman-a, aak keenk-keenkanaman-a, nil God.ang aak um yompanam inan yump, putha aak an kenyan yump. Ka'athaman-a, aak inan ya'-ya'aman yippak wun, a' ngakangan-a, aak ngaa' anman wun-wun um yompanam, ngaa' nyim, a' puth piip God.antaman Ngeen-Wiy yippak ngak kenyangk angman weent-weent, aakan thath-thath.

3-4 Anpalana, nil God.an thaw, “Aak ingan nganth wunowa!” A' an paththam-a, nganthana park. / Nil anan thath-a, “Yaa, in nganth mina!” nilaman thaw Goda. Nil nganthan-a, aak kinch waa'. A' nil yaarkath pulang, kinch-a, puth aak ngaa'an. Nil ngaa'aniy-a, aak ngutang waa'.

6-8 Ngaa' thonang ngulan-a, God.an thaw, “Ngakan-a, thonam anman wun. Yaa, ngak keny-kenyangk inpalan-a, puth ngak pek-pekam anpalan, nipa niparakam yaarkathuwa!” An puth yimanaman wamp. / Nil God.an wik thonakaman thaw-a, an paththam ngak keny-kenyangkan-a, putha ngak pek-pekam anpalan-a, yaarkathuwpul. Ngak anpalana, thok pent, keny mat, ka' yuw yimanangan ngul ween. Nil God.angan aak in keny waa'.

9-10 Ngaa' thonang ngulan-a, nil piip God.an thaw, “Ngak yampal pekan-a, um yompanaman-a, palam karp aak thonamang yalamowa, yipam aak e' wunowa!” Ananiya, yimanaman wamp, / wik thonakaman thaw piip God.ana, an kan-kanam aak e'an wun, aak e' inman ngampan wunanamp. / Work nungantam anangan thath-a, “Yaa, min a!” nilaman thaw, God.an.

11-13 Anpalana, nil piip God.an putham wik thaw, “Aakangan-a, may yot-yotam emayna!” Ananiya, yimanaman paththam pentin aakaman, an kan-kanam yuk yiikan thakan pentin yuk wiy-wiyam thakan emin aakangan. Yuk yot anangana, kaanch tham, yipam keekayna, yot ngul emayn. / Anangan thath-a, nil piip God.ana, ngangk min wunant.

14-19 Ngaa' thonang ngulan-a, piip God.an putham thaw, “Kincha, kepa, putha thunp nangan wunayna! A' kan-kanam angman wunin. Nil piip God.angan kinchan yump yipmam pent-pentow, aak ngutanan ya'a, kinchang anman ep pent-pentow. Nil kepa, thunp anangana, yump thanang aak ngutangak, ngutang anman pent-pentayn, aak kinchangan ya'a. Puth inangan thampa, ngamp kinch inan thathanamp-a, puth kepa, a' thunpa, an waa'an ngampar aak onchana, kayamana, um thurpaka, putha, aak kaapan meenathan ngampar. Ngampana puth meemiy iiyanamp puth kaap inangana ngamp meemiya, kaap thonamangan wantan ngampanga, puth kep inana ngampar waa'ana, kep nil thee'ana, an kep thonaman waa'anampa, nil yimanam. Kinch ang-ngul kuuw ukan-a, aniy puth waa'anamp ke' kinch thonaman kanam minch, nil yimanam.

20-23 Ngaa' thonang ngulan-a, nil God.an putham ngul thaw, “Min nga' anangan thaa'-wantanam wunayn ngakangana, puth man-yatham iiy-iiyayn! A' putha min wiy-wiyam thakana, yot-yotam weenayn ngak.ngan thampa. A' min ma’ puntha-paam thampana, yot-yotam aakam ngathowa!” nil God.an thaw. / Wik thonakam thawa, an paththam min nga' wiy-wiyam anangan wampin, a' puth min panch wiy-wiyam anangan thamp karp wampin. Min uuy-uuyama! Ko'alam ya'a, min yot-yotam nilan yump thanang, piip God.angan.

Anan nil God.ana, ngangkam nyiin, min-minam thath. Nil thaw thant, “Niiy puk yot-yotam kal-kalān thanang, nil yimanangan, niiy yipmam thaa'-wantanam weemāna!”

24-25 Ngaa' thonang ngulan-a, nil God.an putham thaw, “Aak inganiya, min yot-yotam wunayna! Min manyiya, putha, min wuut pi'-pi'anaman thamp, min maala, puth min kulliy thampa!” A' an paththam yimanaman wampin min anangan. Than min yotamangan-a, puk kal-kalin, a' yot ngul weenin, nil yimanaman wiy-wiyam thakan emin. / Min anangan thath-a, “Yaa, in mina!” nilam.n thaw, God.an.

26-28 Anpalana, nil God.angan pam yump, amanamaniya, nil wanch ngul yump. Nil ka' nil anman yump pulang.