1-25 Nil God. angan aak chil maay, a' pam yump. Amanamaniya, nil ngangk pi'an thee' pam alantangan kaa'ang, an paththam-a, pamana, yuupam, a' man-yatham ngul iiy-iiy. Nil God.angan-a, namp thee' nungant, Adam.

Anpalana, nil God.angan garden pi'an yump, ka' orchard yimanangan. Yuk yot anangan than-thanin, may yot pi'-pi'in. Aak min-minama! A' nil Adam.an aak-aakanakaman kal nunang, gardenakan-a, angan wunp nunang. Aak anman-a, wo'uw pi'an. Ka'athaman ngak yoyk anpalan ukan, aak Eden anpalan, wo'uw pi'an anpalan ween.

Aak garden.ang um menangan-a, yuk kucham than-thanpul, yuk thonamaniy-a, nampa ngangk man-yathamanakan. Yuk thonaniy-a, nampa yuk meemiy wunanakan.

Nil God.an Adam.ant thaw, “Nint garden inana, min-min pi'āna! Nint may wiy anangan ep mungkān thanang, yot anangan, puth in ngeeya! Nint may ke' mungkān yuk thonam anpalan, yuk namp meemiy wunanakan, menang anan than-thanan, yuka ngencha!, ngeen-wiya! / Nint mungkinwey-a, an paththam meemiy ngul iiyāna way yumpanakan-a, putha min yumpanakan Nint paththam may ke' mungkān yuk amanaman, may ngench-ngencham paththam. / Nint may yuk amanaman mungkānan-a, an nint uthamān ngul.” Nil God.an wik inangan thaw nungant Adam.antan.

Anpalana, nil God.angan min anangan wampath nungant, Adam.ant, min panch anangan, a' min wiy anangan thakan nilan yump. Nil Adam.angana, nampan kuyam thee'-thee' thant min ma'mangkam al-alantan.

A' nil putham ngul God.angan ngaantam-ngeey, “Pam in nil pokkapang ey? An min nungant ya'a. Ngay kan wanch yumpāng nungant, nil yipmam ma'-aathow nunang.”

Yaa, nil God.angan weep thayan yump nunang Adam.an, a' engk-thaa' amanamana, kaanch thonam wich nungantam. A' engk-thaa'ana, koyam wuthanath Adam.antan. Anpalana, nil kaanchan maay, an ngeen yumpa? An wanch anan yumpa!

Anpalana, nil Adam.an ek ngul, weepaman, a' nil God.angan wanchan kal nunang, pam alantan. / Nil Adam.angan thath nunang-a, nil thaw, “Aa! Nint in ka' ngay inman ey! Nil God.angan yump nintang engk-thaa' kaanch ngatharam imanaman ey! Yaa, ngay puth wanch waa'āng nintang,” Adam.an thaw. (Ke'-paal pam il-ilangan in-inman kaath piip thanttam wantantan, a' wanch thanttang wuntan ngul. Pul kucham anangana, karp ngul wunpul, ka' kemp thonam ngul weenanpul, nil yimanaman.)

A' nil God.an thaw pulant, Adam.anta, puth wanch alantan, puk uwowpul, a' moom thamp iiyowpul way min ma'-mangkamakan. Pulana, ngook ke'anang iiy-iiypul, ma'lip anman iiy-iiypul, puth pulana, ngul-nyaa' ke'am wunpul, ya'a.

Anpalana, nil God.angana, aak pal-puuy thath, way min ma'-mangkaman thath nilaman yump thanang. Ana min thath thananga! Min-minama! Nil way min ma'-mangkam kanam minchath.

Ngaa' thonang ngulana, nilana, ma' punth popam pi'-pi' ngul, ya'-ngul nyiin-nyiin, puth work nungantaman kanam minchath. Nil aak inana, ngench-thayan waa', aak Sabbath day.ana.