1-7 Aak anman garden.angana, thuuk wun. Nil thuukanga, kaangk mookmathow thanang, nil kaangk way yumpanakan thaachow. Anpalana, nilan thaw nungant wanch alantan, “Nil ngul God.an thaw ey? nungk ey? may ke' mungkān ey? yuk yotam il-ilantaman ey?”

Nil wanch anan thaw nungant, “Ngan may ep mungkān yuk wiy al-alantamana, puth ngan may ke' mungkin yuk thonam anpalan, garden um-menangan yuk than-thanan, an ep-paththam ngan ke' mungkin, wik thayan piip God.antam. / Nganwey mungkin-a, nganana, uthamin.”

Nil thuukan thawant, “An ya'a! / Nint mungkinwey-a, nint ke' uthamin, ya' anmana! Nil puth God.angan inan thiichana: / nint mungkinan-a, nintan putha, meemiy ngul iiyin min yumpanakana, puth way yumpanakan, puth nintana, ka' piip God anman ngul iiyin,” nil thuukan thaw.

Yaa, nil wanch alangana, may anangan thath thanang yukangan wun-wunin, menchan min thath thanang, a' nungantakaman thaw, “ / Ngay mungkingwey-a, ngay nath kuchek min ngul weening.” An paththam nilana, may ngenchan yukaman thuth, a' mungk-mungk ngul. May wiya, pam nungantamakan thee', a' nil mungk ngul. An paththam pulana kanam meemiy ngul weenpul, pulana thathuwpul pulantakaman ma'lip, ngook ke'anang. An paththam pulana ngul-nyaa' thawpul. Pulana, kangk anangan karp-karp wakpul, ka’ yi'waath yimanangan yumppul pulantakaman, nok yipam ngathuwpul kangk al-alangan.

8-13 Kinch-wayang ngulana, nil God.ana, aak garden.akan uk ngul, a' nil angman iiy-iiy. Pul pam wanchang pulana, muutan kanam ngeeypul nungant nilan iiy-iiyana, a' pulana, yuk kangk wuthanang winynyang ngoonchpul. A' nil God.ana, pech pulant, “Nip winynyang ngeenam ngoonchannipa?” Pam Adam anan thaw, “Ngay muutan ngeeyang nungkar nintan iiy-iiyan. Puth ngay ma'lip, ngook ke'anang, ke'-paal ngay winynyang ngoonchang nungkaram.”

Nil God.an thaw, “Nungk ngul wee'ang waa' ee? nint ma'lip ngulan iiy-iiyangan ee? Nint ngul may ngench-thayanan mungkan ey?”

Nil Adam.an thaw, “Ee', wanch ilangan nintan ngath thee'ana, may wiy wampath ngathar, ngayan puth mungkangan ngula.”

Amanamana, nil God.an wanch alantan engk, “Nint ngul may ngeenak mungkan ee?”

Nil puth wanchan thaw, “Nil thuuk nalangana, mookmath ngayang, wik uuyamara, ke'-paal ngay mayan mungkang yuk anpalan.”

14-15 Puth nil God.an thaw thuuk alantan, “Puth imanamana, nintan puth thaachan nunang, wanchan, ngay inan konchāng nintang. Nintiya, thipang aakang anman thuuch-thuuchān pal-puuyaniya, ngulakama! A' ngay inan thawang nungkara: kampan nungkaram putha, kampan wanch alantaman, niiy kulangam iiy-iiyān niiyantakaman. Kampan nungkaramangana, tha' mun koy-koyyuw makaran anman path-pathayn thanang, kampan wanch alantamana. Thaniya, kampan wanch alantamana, kuchek yukangan anman piik-piikayn niiyang,” nil God.an thaw thuuk alantan.

16-19 A' putha, nil God.an thaw nungant, wanch alantan, “Nintiya, thuukan wik ngeeyan nunang. Imanamana, / nint pukan uwān-a, nintana, kemp way-wayam wench poch wunow nungkar. A' putha, nintiya, pam nungkaram anman ngaantam-ngeeyāna, niliy putha, moom iiyow nungkar.”

Amanamaniya, nil God.an thaw nungant, Adam alantan, “Puth nint wik ngeeyan nunang wanch nungkaraman, ke'-paal mayan mungkan, ngay puth kan thawang nungkar, nint may ke' mungkina. Imanamana, ngay aak inan konchāng, waka yuk way thak aakangan emayn, yuk waakama, keekach thakan pentayn. Nintiya, Adam, work anman iiy-iiyān, kiimp ukanang, ma' punth popam ke'-ngul pi'-pi'ān, ninta work murkanim iiy-iiyān mayan yipmam mungkān. / Nint work iiy-iiyan-a, uthamān ngul, a' koyam ngeenak weemān, aak chilak. Puth ngayan yumpangan nintang aakaman, a' putha, nint koyam aak chilakan weemān,” nil God.an Adam alantan thaw.

20-21 Anpalana, nil Godangana, min pe'an maay, a' ngook yump pulant min pe'an alantaman, kemp yipmam ngathuwpul. Nil wanchana, wanchinth mangk ngamparam yotantaman. Nil Adam.angana, namp nungantiy thee'anta, Eve.

22-24 Pul Adama, puth Eve pul, pul kanam meemiy ngul iiypul min yumpanakana, puth way yumpanakan. Nil God.angan ngaantam-ngeey pul nath ngul mungkowpul yuk ngench-thayan thonam anpalan, yuk namp ngangk man-yatham iiyanakan, yipmam man-yatham anman iiyowpul. Nil ke'-paal kuch pulang aak garden amanaman, aak thonak iiyowpul. Puth nil God.angana, ngaantiyongk anangan kuch thanang aak garden.akan, yipmam yuk ngench thayan anan may thampan pi'-pi'ayn. A' puth nil nengk-peempan ongk ka' thum yimanangan aak angman wunp, ling-ling-ling park-park, yipmam pam wanchang ke' iiyayn thintham, yuk ngench thayan aakanakan. Pam wanch al-alangan pula, aak garden minana, too' wantpul. Aak thonang ngul work iiy-iiypul, aak ngaan we'-we'pul.