1-7 Amanamaniya, nil Eve.ana, iimpanang ngul iiy, puk uw nungantam Adam.antaman, a' puk wuut many kal, namp nungantiya, Cain. Putham ngulan puk wuut many thonangan ngul kal, namp nungantiy thee'a, Abel.

/ Pul kanan empul ngulan-a, nil Cain wuny-kunch alangana, aak kuyam we'-we', may garden.ang kuyam kaamp-kaamp thanttakam. Nil Abel.angana, min sheep kuyam pi'-pi' thanang.

Ngul-ngulana, nil Cainangana, may wiy anangan maay thanang garden.am, yipmam koyam God.antan thee'ow, ka' thank-you thawow nunganta. Nil pont-kunch Abel.angana, yimanangan min thonam nungantam maay koyam God.antan thee'ow, min-minam wench ke'anang mulath nungant, a' min min-minaman thee' nungant, God.antan.

/ Nil God.angan min sheep min-minam Abel.antaman thath-a, ngangk min wun nungant. / Puth may nil Cainangan wampath-a, kaangk ke'a! Nil puth Cain alantana, man kul wampant. Nil God.aniya, thaw nungant, “Nint man kul ke' wampow nungkara. An puth nint ke' way iiy-iiyāna!”

8-9 Ngul-ngulana, nil Cain.an pont-kunch alantan thaw, “Ayyang, ngal yam aak kangkak iiyāla!” Yaa, pulana, kangkak iiypul. / Kanan wamppul-a, nil wuny-kunch Cain alangan-a, piik-piik pont-kunch Abel.an, a' ya' mulath nunangwey.

Anpalaniya, piip God.an thaw Cain alantan, “Ayyang, pont nungkaram Abel.an wanttina?” Nil puth Cain.an thawant, “Ngee! An wanttin a? Ngul ngay meemiy ey? Ngul ngay pi'-pi'ang nunang ey? Ngul ngay mee'-pathathang nunang ey?”

10-12 Nil puth God.an thaw, “Ninta ngul way inan ngeenam yumpana? Chaapar pont nungkaramantam aakangan wun-wunana! Anan peey-peeyan ngathar, aakam anpalan, ke' wik yimanangan pech-pechan ngatha. Ngay nintang konchānga! Puth ngay nintang wayathānga! Aak imanaman ngulana, ngay aak ngaanan thayan yumpāng nungkara ka' kunttow yimanangan, nint ya'angam aak ngaanan we'-we'ān, puth ya'angam may kaamp-kaampān, an puth aak ngaanan may thak ke' pi'iythan, puth aakan waya, thayan wunow nungkara. A' puth nintiya, thaa'-weepan palam puuyam ngul iiy-iiyān,” nil God.an thaw nungant, Cain alantan.

13-16 A' nil Cain.an thaw nungant, “Aw! Ninta way wuut pi'an paththam thee'angan ngathara, in wik thayan ngatha. Nintaniya, kenth-kenthangan ngayang, aak imanaman, mee' nungkaram inpalman. Ngay ina, ke' aakam ke'anang ngul, pal puuy ngul iiy-iiyāng, aak ingan um yompanam. / Nil wee'angan uwow ngayangan-a, an nil mulathow ngayang ngula.”

Nil God.an thaw nungant, “An ya'a! Than ke' mulathiythan nintang! Ngay ngul thath-thathāng nintanga!” A' nil God.angana, kompan ke' um irp yimanangan wunp Cain.antangan kempang, yipmam mee' winynyathow thanang. / Nil wee'anganwey uwin-a, an anan thathiythan kompan God.angan wunp nungant, a' too wantiythan nunang, an ke' mulathiythan nunang, ya'a.

Anpalana, nil Cain.angana, God.an wantan ngul, a' nil kan-ngul iiy aak thonak, wonk kaaw, aak namp Nod aakanakan iiy. Nil angman ngul wun-wun.