1-5 / Adam kanan wun kaap 130.akaman-a, an wanch nungantamang Eve alangan puk wuut many kal ka' Adam yimanaman, kaa' wal pulam. / Namp nungant thee'in-a, Seth, (puth Seth.ana, namp yimanangan wuna, wik ngamparamangan thawanampa, “Puk thon ngul kalow, puk thonan kan wayath,” namp Seth.ana, yimanangan waa'anamp).

Anpal ngulana, nil wanch Eve.angana, puk wanch manyiya, puth wuut manyiy yot ngul kal thanang.

Adam.an kaap yotakan wun, 930.akam kaap wun, a' kan-ngul utham.

6-11 / Nil Seth.an pam ngulan ween-a, nil wanch ngul maay. Anpalana, wanch nungantamang puk wuut many kal, namp nungantiy thee'a, Enosh. / Nil Enosh.an pam ngulan ween-a, nil wanch maay, a' wanch nungantamang puk wuut many kal, namp Kenan. Aak an-aniyangana, Enosh.an wun-wuna, pam wanch ka'athaman mee'-wuthanamin God alantan.

12-24 / Nil Kenan alangan wunp nunang-a, Mahalel. / Nil Mahalel alangan wunp nunanga, Jared. / Nil Jared alangan wunp nunang-a, Enoch. A' nil Enoch.ana, woyan min God.antam anman iiy-iiy, nil God anman ngangkang pi'-pi' nunang. Anpal nil God.ang keny kal nunang, yimanaman maay nunang, ke'am utham, ya'a. Nil Enoch alanganiya, Methuselah wunp nunang. Nil Methuselah.ana, yaam wun, kaapiya 969.akam wun a' kan-ngul utham.

25-32 Nil Methuselah alangana, Lamech wunpan. Nil Lamech alangana, Noah anan wunpan. Nil Noah alangana, puk ko'alam wunp thanang, Shema, Hama, putha, Japheth.