1-8 Anpal ngulana, pam wanch anangana, thaa'-wantanam ngul weenin. Than puth kuchek thayan weenin, way-wayam kuyam iiy-iiyin, kulan kuyam pekwin. Nil God.angan thath thanang, way-wayaman iiy-iiyin, way yump-yumpin, anman ngaantam-ngeeyin way yump-yumpayn, a' nil ngangk way-wayam wun nungant, a' thaw nungantakam, “Ngay pam wanch ngeenak yumpang ee? Than yaam ke' wunayn, aak ang pekaniya. Ngay yippak wantāng thanang kaap 120.akam wunayna, yaam ya'a, amanamana, ngay kan-ngul wayathāng thanang, pam wanch anangana mul wunayn, / a' putha min-a, way min thampan ngayan yumpang thanang-a, anangan wayathāng thamp,” nil Godan thaw.

9-13 Nil pam thonam anman min iiy-iiy, mee' God.antangan, namp nungantiya, Noah. Nil Noah.ana, kul ke'anang kuyam wun, pam nil min anman, woyan min anman iiy-iiy God.antam. Nil wiy anangana, way kuyam iiy-iiyin, mee' nungantang God.antang, kulan kuyam pekwin.

14-16 Nil God.an thaw Noah.antan, “Ngay kan inan ngaantam-ngeeyāng: pam wanch yot inangana, way anman iiyantan, kul-weenth, thaa'-thaa' pekwuntana! Ngay puth way yumpāng thanta, kan-kanam thaw-thawanga, ngay inana pam wanch wayathāng thanang.

Nintiy-a, chukkun yumpān nungkarakam, chukkun wuut pi'an yukam yumpān, a' wuut ongk thamp yumpān, a' putha, ngaat we'ar thampa, a' putha, achantang nath kenyakam yumpān, way wuut pi'an chukkun yumpān nungkar. Nint aak wunanakana, ko'alam yumpān, thona, kenyangk, thoniya, menang a' thoniya, pek-pekam. A' aak pech tham wantān, kenyangkan, weentanakan, chukkun nanganiya. A' putha, thaa' ngoonchanakaniya, niiyant yumpān wonkang.

17-22 Ngayiya, ngak kaap pi'an kuchāng, yipmam ngakang maayow aak nanana—pama, wancha, puk manyiy, min thakana, mul wunayn. / Way min ngayan yumpang ma' mangkaman-a, ngay wayathang thanang, mul wunayn.

Ninta, wanch thum nungkarama, nip ep chukkun wuut pi'anang nangan ngoonchow. A' puk nengk nungkaram nanangana, putha, wanch thum thanttam thamp ngoonchayn. Ngay niiyang ep minam pi'āng, man-yatham pi'āng niiyang.

A' nint min pi'-pi'an anangana, putha, min manyiy anangan ngayan yumpang thananga, nint uwān thanang min pama, min wanch, a' chukkun wuut pi'anang nangan ngoonchathān thanang thamp, yotam anangan wiy-wiyam anangan ngoonchathān thanang, min pama, min wanch, nil yimanaman uwān thanang.