1-8 Anpalana, nil Godan thaw nung Jacob.antan, “Nint iiyāna, aak Bethel.ang wunāna, a’ aak angman kunttow achantang yumpān, a’ min kiingkān ngathar.”

Nil puth Jacob.an pam wanch nungantam al-alantan thaw, “Niiy yuk ngeen-wiy niiyantam anangan kan thee'ān thanang. Niiy pachathān niiyantakam, minam iiyāna, niiy ngook pach anangan ngoonchāna. Ngamp kan iiyāmp aak Bethelak. Aak angmana, ngay kunttow achantang yumpāng a’ min kiingkāng nungant, thank-you thawāng Godantan, nilan puth nath-palman iiy-iiyan ngatharang.”

Than puth pam wanch al-alangan wik nunangana ngeeyin, a’ than kan-ngul iiyin. Nil puth God.angan pam aak an punychany winynyang yump thanang, than yipam Jacoba, putha pam nengk nungantam anangan ke’ wakayn thanang. Than wampin ngulana, nil Jacob.angan kunttow achantang yump aak Bethel angan, nil yipmam min kiingkow God.ant a’ ngeenama putha nil puth thaa'-kuumpow nunang piip God.an, nil God.angan min-minam pi'-pi'an nunang Jacob.an, ke'paal nilan minan kiingkow nungant.

9-15 Anpalaniya, God putham wamp Jacob.ant, a’ thawant, “Ayyang, in ngeeya! Namp nungkaram Jacob.ana, ya'-ngul, ngay namp nungkar inan nyiingkanam thee'āng, namp Israel ngul nungka. Ngay God pi'an. Pam wanch nungkaraman thaa'-wantanam iiyayn, a’ than wiy anangan pam pi'pi'anam iiyayn, a’ aak ngay Abrahama, Isaac.antan thee'angana, aak anana ngay nungka, kampan nungkaramant ngul thee'ānga.” Ananiya Jacob.angan kunttow achantang puth yump, a’ oil.ang kuungkan kunttowaniy.

16-25 Anpalana, than aak Bethel.an wantin, aak Bethlehem.ak iiyayn. /Than kanan iiy-iiyin aak Bethel amanaman-a, Rachel.angan puk wuut many kal, namp puk many alantaniya thee'a, Benjamin. A’ nil kaath puk many alantamana, ultham ngul. Nil Jacob.anganiya Rachel.an aak Bethlehem thinth kaampan.

Anpalana, than Jacob wee'anang aak thonak iiyin. /Than aak angmanan wun-wunin-a, nil Reuben.ang Bilhah.an maarich kee'ath nunang, nil inman Bilhah.aniya, wanch thum piip-kunchantam, a’ nil Jacob.angan wikana kan ngeey.

26-29 Anpalana, Jacoba, puth wanch puk nungantam anangan Isaac.ant piip-kunchantan wampin aak Mamre angan, a’ angman wun-wunin. /Nil Isaac.an wuut kath ngulan-a, /kaap 180.angan wantan-a, nil an-aniyangan mul wun, puth puk nengk nungantamang pul Esaua, Jacob.ang kaamppul nunang.