1-7 Anpalana, Leah.antaman puk wancha, Dinah.ana, village.ak iiy, nil wanch aak anpal punychany Shechem anpalana thathow thanang.

A nil pam namp Shechem alangan thath nunang iiy-iiy. Nil pam Shechem.ana, pam nengk Hamor alantaman, nil Hamor.ana, moom iiy-iiy aak Shechem angan. /Nil pam Shechem alangan Dinah.an thathan-a, nil kaangk wunant, a’ nil thaach nunang maarich kee'ow nungant. A’ nil Shechem.an piip-kunchant thaw, “Ngay wanch inan kaangk nunang wanch thum ngathar iiyowa. Nint kampan nungantam al-alantan ke’ thawin ey?”

/Ngul nil Jacob.angan wik inan ngeey-a, Dianah.antamana, nilana kuup thant pam nengk nungantamak. Than puth yippak min sheep thakan pi'-pi'in thanang. Thanan wikan ngeeyina, than man kul wampin nungant pam Shechem alantan, nil puth Dinah.an thaach nunang maarichan kee'ow nungant.

8-17 Anpalana, nil Hamor.an puth wamp thant, a’ thaw thant pam nengk Jacob.antam al-alantan, “Niiy Dinah.an pam nengk ngatharam Shechem.ant ke’ thee'in nunang ey? Nil kaangk maayow nunanga.” A’ nil Shechem.an ngul thaw thant, “Niiy kan wanch koman Dinah.an ke’ thee'in ngath ey? wanch thum ngatharakaniya ey? Ngay niiyant wukal pi'an thee'āng niiyant. /Niiy wukal pi'anakan thawān a, yaa, ngay ngul thee'āng niiyant.”

An-aniyangan than puk nengk Jacob.antam anangan yaan mookamin pulant, a’ thawin, “Ngan inangan pe'an umpanam iiyanan. /Niiywey yimanang pe'an umpwin niiyantakaman-a, nganan ngul Dinah.an thee'ān pam Shechem alantan.”

18-31 Yaa, nil Hamora, puth pam nengk nungantam Shechem.ang pul ngangk min wunpul. Pul kan-ngul thawpul pam pulantam al-alantan, “Ngamp yimanangan yumpāmpa! pe'an umpwumpa! ngulana, ana ngamp yuk way min-a, min sheep thakan ngamparakaman kalāmpa Jacob.antamaniya.”

Ananiya, tham pam aak Shechem anpalana, than ump-umpwin thanttakam. /Wench poch yippak anman iiy-iiyin-a, pul kuunch Dinah.antamana wamppul, Simeona, putha Levi anangan wamppul, aak Shechem.ang angan, a’ pam yotaman mulathpul thanang. Anpalana pul aawuch Shechem alantamakan iiypul, a’ Dinah.an kalpul nunang koyam aak thanttamak. Than wancha, puka, yuk way min aak Shechem anpalan thampang kalin thanang. Nil Jacob.an winynyang thamp mo’ pam wiy al-alantaman aak anpalan, a’ nil wak thanang, wik thaa’ pocham thaw thant pam nengk nungantamant. Thananiy thawin nungant, “Nil puth Shechem alangana way yump wanch-kuunch nganttamak.”