1 An-palana, nil Boaz.an kan iiy aak-aakanakan than pam wanch anangan karpam yalmath.win wik thawayn aak town thaa' gate thinth angman. Nil Boaz.an angman ngul nyiin, aakang angman. An-palana nil kampan nungantam pam pupar alantaman Elimelech.antam kan-ngul wamp, pam nil Boaz.angan Ruth.antan waa', a' nil Boaz.an thaw nungant, pam alantan, “Ayyang, nint kan pal iiya, aak ingan nyiināna.” Nil puth pam thonaman iiy a' angman thinth nyiin Boaz.antangan. 2 Nil puth Boaz.angan kan ngul ump thanang wuut manth-thayan ten ananagan a' thaw thant angman pulantang thinth nyiinayn. /Than yotam kan ngul nyiinin-a, 3 nil Boaz.an thaw pam kampan nungantam alantan, “Nil Naomi.an aak Moab amanaman palam ngul wamp ngampar, nilan kaangk pam thum nungantam mul alantaman field.an sellim-pungowa. 4 Ngay kan in thawang nungkar, nint kaangk field.an piiyān ey? Nint thawān ngathweya, than wuut manth-thayan il-ilangan wik ngeeyayn nint wanttakan thawan nganta. Puth nint kaangk ke'wey-a, yaa, nint puth thawān ngant yotamantan, ngay-a, wuut manth-thayan il-ilangan yipam ngeeyayn. Puth nint kan ka'athaman nint thawāna, nint kaangk ke'wey-a, yaa, ngayan puth ngul piiyānga.” An-palana nil pam thonam thaw, “Ngay ngul piiyānga.”

5 Nil puth Boaz.an thaw, “Yaawey, /puth nint kaangka field.anwey piiyān-a, nintan puth Ruth thamp ngentān nunganga, nil puth wanch wukalongk aak Moab.aman an-palan wampa, nint ngentān nunanga wanch thum nungkar ngul iiyowa nipaniya yipam puk uwowa. Puk manyaniy-a, pam mul alantan wunow, nungk ya'a, aak field.an yipam kampan nungantam mul alantaman wunow thant. Puth aak ngamparaman yimanang wun.” 6-7 An-palaniya nil puth paman thawa, “Ngay puth field.an kaangk ke'-ngul piiy'ānga. /Ngaywey piiying-a, puk nhengk ngatharam wiy al-alangan ke' uwiythan ya'a ngayan uthaminga. Nintam puth piiyāna, ngay kaangk ke'a.” 8 An-palaniya nil pam alangan tha' murukan thapath a' Boaz.ant ngul thee'. Puth aak thanttam Israelites.antaman yimanangan wun aak keenkana. /Nil pam thonamangan aakan sellimpungow pam thon alantan-a, nil tha' muruk thapathan-a, a' thee'ant pam thon alantan nil aakan piiyow. An-palaniya, than thathayn yipam pulangan wik kan-kanaman yumppula.

9 An-palana, nil Boaz.an kan ngul thaw thant wuut manth-thayan al-alantan a' puth thant wiy al-alantan thamp angmanan nyiin-nyiinina, “Niiy puth inan mee' niiyantamang kan thathana, ngay yuk way min ma'-mangkam ngul piiyāng Naomi.antaman yuk way min ma'-mangkam ka'atham nungant Elimelech.ant a' ngulan puk nhengk nungantam.antan Chilion a' Mahlon pulantan wun.in. 10 A' puth inan thampa, ngay Ruth.an ngentāng nunang, wanch wukalongka Mahlon.antamana, nil aak Moab punchanana. Nil puth wanch ngathar ngul iiyowa. Puk nganttamang ngul aak inan pi'ayna, puth nganangan ke' kon-ngathow thanang Elimelech a' Mahlon a' Chilion.angana. /Puk nganttam ngulan aak-ngeeyayn-a, ka' puk nhengka a' puk ngechiyanga a' puuliyang yimanangan iiyayn thanttamakan. Niiy puth nyiingk inan kan mee' niiyantamang thathana, ina puth kan-kanama, a' wik niiy kan ngeeyan ngul kon niiyantamangan.” 11-12 Than puth pam wuut manth-thayan a' puth than wiy anangan thawin, “Ee'weya, ngan kan thathana, a' kan ngeeyan. Ngan kaangk nil piip God.an min iiyow Ruth.antan, puk yot ma'-aathowan, ka' keenkana pul Rachel.ang a' Leah.angan pulan puk yot kal-kalpul nungantam Jacob.antaman puka. Ngan kaangk nint pam ma'-mangkiy iiyān a' puth pam pi'an weemān aak Bethleham ingana. Ngan tham kaangka nil piip God.angan pam wanch kampan nungkaram anangan pam wanch pi'an yumpow thanang ka' wuut mangk nungkaram alantamana, Perez.antamana, nilan pam nhengka Judah.antaman a' puth Tamar.antaman. Nil keenkan pam pi'anan iiy-iiy, kampan nungamtam anangan thamp, than thampang pi'an iiy-iiyinwey.”

13 An-palana, nil Boaz.angan Ruth.an aak nungantamak ngul kalan a' puth an-palan nilan wanch thum nung Boaz.antan ngul iiy. Nil piip God.an ngangk min iiy nungant. Ngul an-palana, nil Ruth.an iimpanang ngul iiy-iiy a' puk wuut kal. 14 Than wanch aak an punchan Bethlehem an-palana iiyin nungant Naomi.ant a' thawin nungant, “Nil piip God.an pi'an paththama. Nil nungkar puk ngechiyang thee'a. Ngan kaangk nil pam pi'an ngul weenow ngampar il-ilantan Israelites.ant. 15 Wanch nhengka nungkaram Ruth.an nil min paththam iiy-iiya nungkar, nil kaangk paththam wunan nungkar. /Nint nathwey otham seven kalin-a, a than nintang minam pi'-pi'iythan. Puth kana, nil Ruth nana min paththam iiy-iiy nungk, min-miniyam pi'-pi' nintang, ka' wiy yimanang ya' yimanangan ke' pi'iythan nintang. Nint wanchinth ngulan weemana. Nil puk ngechiyang nungkaram ilangana, ngul nintang ngangk min yumpow a' minam thamp pi'ow nintang.” 16 An-palana, nil Naomi.angan puk ngechiyang nungantaman maayan a' pi'-pi'an epanga.

17 Than wanch aak an punchanangan namp puk wuut nungant thee'in Obed. Than pam wanch yotamant thant waa'-waa'in, “Nil Ruth.angan puk wuut kala, ngechiyang nungantam Naomi.antama.”

Ngul-ngulana, nil Obed pam ngulan em, nil wanch ngul ngent a' wanch nungantamangan puk wuut kal, nungantana namp Jesse thee'in a' ngul-ngulana nil Jesse.angan puk wuut thamp wunp namp nungantaniya David. 18-22 Than inanganiy wuut mangk nungantam David.antam Perez an-palman wun-a, aakanakaman David aakanakaman: Perez.ana keenkanam wun; an-palan-a Hezron, a' an-palan Ram, ngul Amminadab, an-palan Nahshon, a' Salmon, an-pal ngul.ana Boaz, a' Obed, a' Jesse, an-palana David.