1 An-palana, nil Naomi.an Ruth.ant kan-ngul thawant, “Ngay nungkar pam ngul uwānga, nint yipmam maayān nunang. Nip karpam ngangk minangam yipmam wunowa. 2 Nint puth meemiy nil Boaz.an kampan pam thum ngatharamantam a' puk wuut kucham ngatharam al-alantaman thamanga. Ayyang, kan in ngeeya, ngutang inmana nil Boaz.an work iiyow aak angan than may barley anangan piik-piikayn, unch-unchayn thak, may kaanch anangan min yipmam keekayn. 3 Nint kan-ngul iiya, a' muunchān, a' yuk perfume.angan nampān kemp nungkaranga, puth ngook min-minam ngoonchāna. A' nint aak-aakanakan ngul iiyāna nilan work iiy-iiyana, a' nintaniya engk-engkanang ke' iiyān nungant, nil ngul thath nintang. /Nil work kanan minchathow-a, 4 a' may kanan mungkow-a, nint thathān nunang aak wanttingan wunowa. /Nil kan-ngulan weep wunow-a, nint itangam iiyān nungant a' sheet.an itangam kenyam maayān tha' nungantam an-palan a' angman wunān tha' nungantangan thinth. An-palana nil ngul thawow nungkar nint wanttakan yumpān thakana.” Nil Naomi.an wik yimanangan thaw, puth aak thant yimanangan wuna thanwey kaangk kampan pam mul alantamangan maayayn thanangweya. Than pamantangan karpaman ke' wunayna, yaark-yaark thanttakam wunayn. 5 Nil puth Ruth.an thaw Naomi.antan, “Ngay ngul iiyāngant ka' nintaman thawan ngathara.”

6 A' nil Ruth.an kan-ngul iiy aak-aakanakan than workan iiy-iiyin, nil piny kench nungantaman thaw. 7-8 /Nil Boaz.angan may kan-ngulan minchath-a, a' may ngak thampangan mungk-a, nil ngangk min paththam ngul wunant, a' kan-ngul iiy aak-aakanakan, may barley wump achantangan wun-wunin, a' nilana angman weep ngul wunweya. Anpalana, nil Ruth.an tha' yaak manyangam ngul tha' thinth wunantanga. Aak ngaa' menhang ngulan-a, nil Boaz.an wur' ek weep thayanaman a' wonk thon thee' nungamangan. Nilana ngangk ik wanch komanan thintham thathan tha' nungantangan wun-wunana. 9 Nil Boaz.an thaw, “Ayyang, nint wee' e?” Nil puth komanan thaw, “In ngay Rutha. Nint nan puth kampan pam thum ngatharamantam, nip-nip paththam kampananiy, nint ngayangan mak pi'āna. Ayyang, nint ngayang ke' ngentin ey?”

10 Puth nil Boaz.an thaw nungant Ruth.antan, “Ngay kaangk nil piiip God.an ngangk minam iiyow nungkar. Puth ka'athangamana, nint piny kench nungkaraman minam pi'-pi'an nunang. A' puth yimanang ngulana nintan min-minam paththam iiy-iiyangan kampan pam thum nungkaramantam al-alantana, puth nint kaangk ngayang ngentān, ngay puth kampan thon inan pam thum mul nungkaramantama. Nint ngangk min nath-palman iiy-iiyan ngathara. Nintwey ke' pam kompan maayina, nath komp ma'-mangkiya, nath komp ma'-mangkiy ya'a. Puth ya'a, nint kaangk ngayang ngentān ey? 11 Chil wuut inan ey? Yaa, nint put ngangk wayan ke' iiyāna. Than pam wanch yotamangan than nintang meemiya, nint puth wanch mina. Ngay nintangan minam paththam ngul pi'āngweya, ngay nintangan ngul ngentāngweya. 12 Puth in ngeeya, ina kan-kanama, ngayaniya kampan pam thum nungkaramantam, a' puth ngay nintangan ngul min-minakam pi'ānga. Puth nil pam thonangan nana kampan paththam pam thum nungkaramantam, nilam ep thathow nil nathwey kaangk ngentow nintanganweya, nilan puth kampan nungantam paththama, thintha, ngay ep ya'a, ngay wal kech. 13 Ngutang inana nint aak ingman wunāna. Ngaa'tham ngulana ngal ngul thathāl nil pam wanttakan thawow ngalanta. /Nilwey nintang kaangk ngentowwey-a, yaa, nil puth mak pi'ow nintanga. /Nil puth kaangk ke'wey-a, ngay puth nungk kan-kanam thawang ngay puth ngentānga nintangan a' puth min-min ngul pi'āng nintanganweya. Nil puth piip God.angan wik inan kan ngeeyan ngayan thaw-thawang nungkarana. Ngaywey ngul pi'āng nintangan ka' ngayaman thawang nungka. Ina kan ngul weep wun-wunāna aakam paanthow nungkara.”

14-16 Nil puth Ruthan kan-ngul weep wun tha' Boaz.antangan thinth. /Aak ngaa' paththaman yippak wun-wun-a, nil kan ek Ruth.aniya, nil Boaz.angan kaangk ke than pam wanch wiyangan thathayn nunang Ruth.an nil puth Boaz.antangan paanth. / Nilwey Ruth.an iiyanak ngulan-a, Boaz.an thaw nungant, “Coat nungkaraman thapathān a' aakang nangman we'arathāna.” /Nil Ruth.angan coat.an kan thapath-a, nil Boaz.angan may barley kaanchan yeech coat.ang angana, 50 pounds yeecha may pi'anam yeechanta, puth anhana. Nil puth Boaz.angan ma'aathan nunang, pichamang wunpant, nil yipam aakak kalow. An-palana nil Ruth.an kan ngul aak nungantamak iiy. /Nil aak nungantamangan kan ngulan wamp-a, nill piny kench nungantam Naomi.an thaw nung, “Nipwey wanttaka?” Nil puth Ruth.angan waa' nungant Naomi.antan.

17 A' nil Ruth.an thaw nungant Naomi.antan, “Nil Boaz.an puth thawara, ngay palam ma'lipan ke' wampāng nungkara. Nil puth may barley kaanch inangan kuch ngalantweya.” 18 An-palana nil Naomi.an thaw nungant, “Kuupāna, ke' kerkāna. Nint meemiy ngul iiyāna, nintangan wee'angan ngentowa. Nil Boaz.an ke' kon ngathiy nunanga, nil kinchang inan kan-kanam ngul iiyow, wik thawow kampan nungantamak, a' puth pam wuut manth-thayan al-alantangana.”