1 Pam aakan punchan namp nungant Boaz, kampan pam thum mungantamantam Naomi alantamantam. Nil pam pi'an a' ma'mangkiy thampanga. 2 Ngul-ngulana, nil Ruth.an Naomi.ant thaw, “Ayyang, nint wanttak ey? an min nungk ey? ngay aakanakwey iiy.ing ey? than pamang may barley.an yal-yalmathantan ey? A' ngayana may aakaman maay-maay.ing thanang keek-keekathantanan.” Nil puth Naomi.an thawant, “Nint iiywey ee!” 3 Nil puth Ruth.an kan-ngul iiy aakanakan than paman work iiy-iiyin. Nil puth Ruth.an kul-kulam iiy-iiy thanttangan a' /may barley.an keek-keekathinan-a, nil anman maay. Nil Boaz.antamangan field iiy-iiy, puth nilan pam Boaz.an ke'am yippak meemiy nunang, ya'a.

4 Ngul-ngulana, nil Boaz.an iiy ngul field aakanakan town Bethlehem an-palan. A' nil pam work nungantangan iiy-iiyin al-alantan thaw, “Ngay kaangk nil God.angan ma'-aathow niiyanga.” A' than nungant ngul thawin, “Ngan kaangk nil God.angan nintang thampang ma'-aathowa.” 5 A' nil pam moom pi'anan Boaz.an engk nungant pam thon alantan moom chil manyana, field.an pi'-pi', “Nil wanch koman nan wee' ey?”

6-7 Nil puth pam nanan thaw nungant, “Wanch koman nanan Naomi.angan wampath aak Moab an-palana. Nil ngathan thawa, nil ke' pam al-alantangan work iiy-iiyantanweya kul-kulam work iiy-iiyow thanttangan may barley keekanam anangan maay-maayow. Puth nil nath-palam ngaa'thiyangam work iiy-iiy, ngul nyiingk-nyiingk want workana, nilana ngoyngkak ngul iiy, yaa'an nyiinan, ngangkang thee'.”

8-9 Nil Boaz.an iiy Ruth.antan a' thaw nungant, “Ayyang, in ngeeya, nintwey ingman iiy-iiyāna field ngatharamanga, nint puy-puyan ke' iiyāna! Nint thath-thathān thanang pam ngatharam inangan, thanan ump-umpantan may barlley anangana, a' monkan wakān thanang. Nint karpam work iiyān wanch wiy al-alantangan may barley.an maay-maayantan. Ngay puth pam ngatharamantan kan thawangan thant, than ma'angan kemp ke' mamayn nintanga. /A' nint ngakamwey uthamān-a, ngak pantam an-palan ke' empāna, nint aakanakan iiyāna pots ngatharam nan-palan mungkāna. Pam ngatharamangan kan thaa' piimpathin, nan-palman mungkāna.” 10 Ruth.an kaa'-um-pek thuch aakaka, aak ngaanh aakanakamana, bow thee'ant Boaz.anata a' thaw nungant Boaz alantan, “Yaawey, nint min ngathara iiyangan ey? Ngul nint wanttaka min iiyangan ngathar e? ngay puth wanch thaa'-nganth thona! Ngay aak thon an-pal wampangan.”

11-12 Nil Boaz.an thawant, “Than ngath waa'in nintangan nint minan iiy-iiyan piny-kench nungkaramantana. /Pam thum nungkaram.an kanan utham-a, nint pi'-pi'an nunang a' ma'im aathan nunang, ke'am eenchan nungantam. Ngay meemiy nungkaram nint aak nungkaraman wantana, putha kaath piip nungkaraman wantana, an-palana aak nungkaram an-palan pal iikanakan iiyan. /Nungkwey nint nganang ke' thiichin-a, nint pal iikanakan iiyan. Nint wanch min iiy-iiyangana. Ngay kaangk God.angan puthangkan ngangk min iiyow nungkar. Nint piip Godant ngangk kan thee'an, nil yipam ma'angam pi'ow nintang. Ngay kaangk nil minam iiyow nungkar.” 13 Nil puth Ruth.an thaw nungant Boaz.antan, “Nint ngath ngangk minangam iiy-iiyana. /Nungkwey ngay nungkar ke'aman work iiy-iiyangan-a, puth nint ngayang ngangk maman a' puth thaa' mich-micham thawangan ngatharwey.”

14 A' kinch keny ngulana, than workan wantin a' may mungkin ngul. A' nil Boaz.an Ruth.antan thaw, “May nungk inana. Nintwey may sauce.ang punychathan nganttang ingana.” Nil puth Ruth.an nyiinwey pam wanch wiy al-alantangan workers. A' nil Boaz.angan may kaanch thum penchanam menchan thee'ant mungkowweya. /Nil Ruthang mayan mungk-a, otha ngulan ween a' wiy anangana may pi'-pi' thanang, ke'am ngul mungka. (Nil aak minangam wunp may nungantan aniy.) 15-16 A' an-palana, nil Ruth.an ek, koyam workak iiy ngul may barley anangan putham yalmathow. /Nil kan-ngulan iiy-a. nil Boaz.an pam nungantam al-alantan thaw thant, “Nil Ruth.an thintham iiy.ow niiyantangana, niiy may barley.an kath-kathaniy thananga. Nilwey may barley anangan nan-palan mak yal-yalmathow. Niiy ke' kenthān nunangwey, a' may wiy min anangan wantān nungant, koy-koyyuwa.”

17 A' nil Ruth.angan may barley anangan yal-yalmath thanang kinch-wayangakam. An-palana, nil may anangan piik-piik thanang, may kaanch min anangana keek-keekin. Nil bag.ang thench-thench thanang a' thaa' mul ngul maayantweya, puth may yota 28 pounds. 18 Nil may barley.an bag thampang maay, a' koyam kan ngul iiy aak town.akan. /Nil town angan wamp-a, nil may barley.an meenath Naomi.ant nilanim maay-maay thanangweya. Nil may dinner nungantaman thee' nungant Naomi.antweya. 19 Nil puth Naomi.an thaw nungant, “Nint may kaanch inangan wanttin-pal uwan ey? aak field wee'antam ey? Ngay kaangk nil God.an ngangk min iiyow nunganta pam alantana may nungk ngangk minangaman thee'.” Nil Ruth.angan waa'ant Naomi.antan, “Ngay angan work iiy-iiyangan field Boaz.antamangana.” 20 Nil puth Naomi.an thaw, “Ngay kaangk nil God.an ngangk min paththam iiyow nungant Boaz.antana. /Nil God.an ngangk minangam iiy-iiyan pam wanchantan than yippakan man-yethaman iiy-iiyantan-a, a' /puth pam wanch mulan wunantan-a, al-alantan nil piip God.an ngangk min iiy-iiyan. /Nil wik kaa'ngak thanang-a, nil ke' pipow. Pam nil nanana, Boaz.ana, nan nil kampan pam thum nungkaramantaman, pam nil nalangan ma'angam pi'ow ngalanganweya.” 21 An-palana, nil Ruth.an thaw nungant Naomi.antan, “Nil Boaz.an inangan thamp thaw ngatha, ngay may barley amanaman field nungantam an-palman maay-maayāng thanang than yaamakan may barley anangan ump-umpayn a' yal-yalmathayn thanang.” 22 An-palana, Naomi.an Ruth.ant ngul thaw, “Yaawey mentha, ana min nungkar nint work wanch wiy al-alantangan iiyāna, field Boaz.antamangan. /Nintwey field thonang nathan iiyin-a, an than pamangan nintang nath kemp nungkaram mamiythan nintanga.” 23 An-palana nil Ruth.an field Boaz.antamang angman ngul work iiy-iiy. Nil Ruth.an angman field Boaz.antamang work iiy-iiya barley a' may wheat maay-maay thanang yaamakam thanan work iiy-iiyin, workan minchathayn yipama. Angman ngul wun-wun piny kench nungantam alantangan, Naomi.antangweya.