1-2 Aak keenkanamana, than pam wanch Jews anangan aak Israel angana, king ke'anangan yippak wun-wunina, aak an-aniyangana, aak way ma' thaanchan wamp thant aak thanttanangan. Pam namp Elimelech anana nil aak town Bethlehem.ang wun, aak Judah angman. Wuut mangk namp nungantaman Ephrath. Wanch nungantan namp Naomi, puk wuut pulantaman kucham, Mahlon a' Chilion.ang. Than aak Bethlehem.an kan-ngul wantin puth aak angan may ke'anangan wun-wunin. Than aak kechak iiyin aak namp Moab.ak a' than ang ngul wunayn, thanan may thakan yipam an-palan uwayn. 3 /Than aakan kanan wun-wunin-a, nil Elimelech.an ya'-ngul utham, nil Naomi a' puk wuut kucham than pokkapang ngul wun-wunin.

4 An-palaniya, pul Mahlon a' Chilion.angana wanch aak Moab punchang ngentpul, Orpah a' Ruth pulang. 5 /Ngul kaap ten.angan kanan want thanang-a, pul Mahlon a' Chilion.ang ngul uthama. Naomi.an pokkapang wun-wun, pam thum ke'anang a' puth puk wuut ke'anangan ngul wun-wunwey.

6 Ngul-ngulana nil wanch Naomi.angan wik ngeey nil God.angan ngangk min iiy-iiy thant kampan nungantamak aak Bethlehem.angan, than puth may yot ngul pi'-pi'in aak angan. Nil Naomi.an kan ma' kerk ngul aak Moab.an kan wantow a' puth wanch nhengk nungantaman pulang Orpah a' Ruth thampang kalow. 7-8 A' than kan-ngul karpam iiy-iiyin aak Judah aakanakan. /Puth than kanan iiy-iiyin-a, nil Naomi.an thaw Ruth pulant Orpah.angan, “Nip koyam iiyow aakak a' angman wunowa kaath pi'an niparamantangan. Ngay kaangka nil God.an minam iiyow nipar angana, ka' nip ngatharan min iiy-iiyuw a' ka nip ka'athangaman min iiyuw kampan ngantharamak puth kan uthaminweya. 9 Ngay kaangk nil Lord.angan pam thum thonangan ngul thee'ow nipar.”

A' an-palana, nil Naomi.angan thaa'-piint pulang a' appow ngul thaw pulant. Puth pul kom-koman anangana othamayan peey-peeypul nungantaman a' pulan thawpul nungant, 10 “Ngan nintang ke' wantina, ya'a, ngan koyam nungkarangan iiyāna, pam wanch kampan nungkaramantangan wunāna.” 11-13 Nil puth Naomi.an thaw pulant, “Ya'a, nip koyam iiyowa, kampan niparamaka a' nangman wunowa. Nip ngeenak ngatharangan ngul iiyow ee? Ngaywey wanchinth kath ngula, ngay pam thum putham ke' ngul maayinga. Ngay puk puthaman ke'ngul kaling niparakaniy. /Ngay nathwey pam ngutangan ngent.ing-a, a puth puk wuut kuchaman nath kalingwey-a, ana nip ke'wey kuup-kuupiw, pul em-emiypulan kuchamana nip yipam maayow pulangana. Puth pul emiypulana, ana nip pam thon ngulan ngentowa. Yaa, nip koyam aakak kan iiyowa. An min nipar ya'a, nip ngatharanganiy iiyowa. Nil Lord.an ngath ngangk min ke'am iiy-iiya. Ngay puth ngangk way niparam karpa, puth nipan pam thum ke'anangan iiy-iiyanipa ngula.” 14 Orpha a' Ruth pulan putham ngul peey-peeypul nungantam. An-palana nil Orpah.angan Naomi.an thaa'-piintan ngul a' appow thawantwey. A' nil Orpah.an koyam ngul iiy aak nungantamak. Puth nil Ruth.an kaangk ke' koyaman iiyow, nilan kaangka Naomi.antangan wunow. kk 15 Nil puth Naomi.an thaw nungantanwey, “Yap nungkaraman koyam kan iiy kampan niparamantan a' puth yuk ngeen-wiy niparamaka, a' aak niparamak koyam iiy. Nint puth yimanang koyam iiyān nungantangweya.” 16 Nil puth Ruth.an thaw nungant Naomi.antan, “Nint ke' thawān ngath ngay nintang wantāngan, ngay kaangk nungkarangan iiyāng. /Aak nint wanttinakan iiyān-a, ngay nungkarangan angman iiyāng, /nint aak wanttingan wunān-a, ngay angman nungkarangan thampang wunāng. Than pam wanch kampan nungkaram ananganiya, kampan ngatharam thampanga. A' puth piip God nungkaramana piip God ngathara thampangwey. 17 /Nint uthamān ngulan-a, aak than nintang wanttingan kaampayn-a, yaa, than ngayang aak angman kaampaynweya ngay ngulan uthamānga. Ngay nungk inan wik kan-kanam thawang nungkar. /Ngay yippakan man-yetham iiy-iiyang-a, ngay nintang ke' wantinga. /Ngay nath nintangwey wanting-a, nil piip God ilang keny ngayang mak wayathow ngayangwey. Ngay wik inan kan-kanam thawang yipam nil piip God.angan ngeeyow ngayanga.”

18 An-palaniya nil Naomi.angan kan-kanam ngaantam-ngeey Ruth.an nil kaangk iiyow nungantangana. Nil puth Naomi ke'am ngul thaw Ruth.antan koyamaniy iiyow aak nungantamakaniya. 19 A' an-palana, Naomi.angan a' Ruth.ang pul karp iiypul aak Bethlehem.ak. /A' kanan wamppul aak Bethlehem.angan-a, than wanch aakan punchan yotam anangan mee' ikin pulanta a' thawin thanttakaman, “Ayyang, Naomi.an nan-palan wampan ngampara.”

20 Nil puth Naomi.an thaw thant yotam al-alantan, “Niiy ngayang namp ke' wichāna Naomi.ana, namp Marah ngul wichāna. Nil piip God.angan ngayang minam ke'am pi'anya, ya'a. 21 /Ngan karpam aak inaniy wantan-a, pam thum ngatharamana puth-a, puk wuut kucham ngatharaman pula, puth ngay inan palam aak iikanakan ngul wampangan, ngay ma'lip ngul wampangan. Nil puth piip God.angan ma'-mangkamantam ngangk maay thanttam ngula. Niiyan ngayang Naomi.an namp puth ke' ngul wichāna. Nil piip ngamparamang minam ke'am pi' ngayang, nil man-mangkam thee'ara, a' nil ngayang ngangk way yumpanya.” Wik thanttamangan waa'antan namp Naomi.an 'Ngangk min'. A' puth namp Marah.aniya, 'Ngangk way-wayam paththamweya.'

22 /Pul ma'-piny-nhengkana karp aak Bethlehem.ak wamppul-a, aak Moab an-palan-a, aak an-aniyangan-a, may kaanch barley anangan kan menchan weenina, a' than pamangan ump-umpin ngul, a' yal-yalmathin ngorkal manyang ngul thench-thenchin thanang.