1-13 Nil Joseph.angana, piip-kunchan ompam kathan, a' peey-peeyantam. Nil Joseph.an thaw pam nungantam al-alantan, piip-kunchan kemp oparang nampayn nunang, a' cloth.ang kathayn nunang yipam erkam ke’ kath weemow. Pam wanch yotam anangan ngaa'-thon-thonan peey-peeyin nungantam-70 days peey-peeyin. Anpalana, Joseph.angan wik kuch Pharaoh.ant pam nungantam al-alantang, “Niiy waa'ān nungant, ngay piip ngatharaman puth kaa'-ngakangana, koyamaniy kalāng nunang, aak Canaanang aak kunttow aawarangan thenchāngana! Nint ngayang ke' kuchin ey? Ngay piip-kunchan thenchangan a' ngay palam ngul wampānga!” Nil puth Pharaoh.an thaw, pam Joseph.antamak thant, “Ee'wey, niiy thawān nungant piip-kunchan mak kalowana!”

Anpalana, Josepha, kuunch nungantama, a' puth pam wanch yotam aak Egypt.am iiyin Canaan.ak. /Than aak Atad.angan wampin-a, than peey-peeyin, 7 days.akam peeyin Jacob.antamaniy. Anpalana, than nengk nungantamangan kunttow aawar Machpelah.angan thenchin nunang, Jacob.an.

14-21 Ngulana, nil Josepha, kuunch nungantama, pam wanch yotam koyam iiyin aak Egypt.ak. Than kuunch nungantaman winynyang mo'in Joseph.antam, puth piip thanttaman ya' uthama. Than ngaantam-ngeeyin nil puth-puthangkan ngul kul yump thant than keenkanam way iiy-iiyin nungant. Puth thanan thawin, “Nint ngant kul ke' ngul pi'angan ey? Ke' ngul ngaantam-ngeeyān ey? nganan nungk way iiy-iiyan ey? Ngan nintang ngul wik ngeeyān a! / Piip ngamparam ke'aman yippak mul wun-a, nil thaw ngant, ngan wik inan thawān nungk.” / Nil Joseph.ang anan ngeey thanang-a, nil peeyath thanang, a' wik thaa' itangam thaw thant, “Niiy ke' winynyang mo'āna! Niiy ka' ngayang mulathin, puth ya'a, nil God.angan nil-nil ngaantam-ngeey pam wanch yot yipam erpathang thanang, an puth nilam ngaantam-ngeey niiy way anan makam yumpana ngatha. Ngay niiyang ngul min-minakam pi'ānga!”

22-26 Josepha, kampan nungantaman angam Egypt.ang wunin. Joseph.aniy kaap 110.akam wuna, a' nil puk puulanchina, ngechanchin nungantamantam puk anangan thath thanang, a' nil Joseph.an thaw kampan nungantamak, “Ngay kan-ngul uthamānga! God.ang niiyang ngul kalow koyam aak Canaan.ak, aak nilan waa' Abrahama, Isaaca, Jacob thantan waa'a. Niiy ngathar kan thawān-a, / niiy iiyānan aak Canaan.akan-a, niiy kaanch ngatharam kalān niiyantang, a' ang kaampān.” Anpalana, Joseph.an kan-ngul uthama, than pam al-alangan Joseph.antaman kemp oparang nampin nunang, a' coffin.ang wunpin nunang, box.angan. Ngul-ngulana, than kaanch nungantaman koyam kalin aak Canaan.ak. ANMAN KAN