1-19 Anpalaniya, Jacob.angan puk nungantam yalmath thanang, nil waa'ow thant ngeen ngulan wampow thant. / Nil Jacob wik inangan thaw thant-a, nil ngaantam-ngeey puk nungantamak thonakam ya'a, puth puk ngechanchina, puulanchin nungantamak thonakam ya'a, puth aakakaman puk thanttamak a' puk thanttamak ngul yimanang ngaantam-ngeey tham.

“Ninta! Reubena!” nil Jacob thaw Reuben.ant, “Nint nengk ngatharam kaa'-ngeechaman-a, puth nint wanch ngatharaman maarich kee'athana, ngay nintang puth min-minakam ke' ngul piānga!

“Nipa! Simeona, Levia! Nip man kulangam pam wiy anangan mulathuw thanang aak-ya'angan, puth anpalan kampan niparam pal puuy wunayn, aak thonamangan ke' wunayn ya'a.

“Ninta! Judaha! Kuunch nungkaramana, work minam iiyayn nungk, a' thaa'-kuumpayn nintang. / Than pam kul nungkan pi'antan-a, an than winynyang mo'ayn nungkaram. Nint ka' lion kulliy ngul iiyān thanta. Puk ngechanchina, puulanchin nungkaram than yaam moom iiyayn aak iikanakaniy. A' puth ngul-ngulaniya, moom pi'an paththam wampowa! Pam wanch yotam wik nungantam-ngeeyayn, man enyanam ngul wunayn.”

“Ninta! Zebuluna! Nint aak thompang wo'uw we'ar thinth wun-wunān, puth anganiy aaka, chukkun thakan ngoonch-ngoonchayn nintan aak wunan.

“Ninta! Issachara! Nint pam kaanch iiy-iiyāna! Nint aak minang wunāna! a' work tha'iy iiyān.

“Ninta! Dana! Nint pam pi'an ngul iiyān, ka' councillor yimanangan. Nint ka' thuuk manch yimanangan wooyanangan iiyān pam kulliy al-alantan wik thakan yumpantan ka' enemy yimanangan.

“Ninta! Gada! Than pam al-alangan kul yumpayn nungkar ka' mulathanak nintang, puth than winynyang mo'ayn nungkaram, a' nintam thanang mulathāna!

“Ninta! Ashera! Nint may min-minam em-emathān puth nintan pam pi'-pi'an al-alantan thee'-thee'ān thant money.akan.

“Ninta! Naphtalia! Nint puk yot pi'-pi'āna!

“Ninta! Josepha! Nint bowa, arrow.ak ma' minak iiyān. Puk ngechanchina, puulanchina, puk thanttaman yot-yótam ngul weemayn. A' God ngamparamangan ngul ma'-aath-aathow niiyang ngulakam.”

“Ninta! Benjamina! Nint pam wanch wiy anangan yuk way min yot ma'am piiy-piiyān thanang.”

20-33 A' nil Jacob.an thaw thant, “Ngay kan uthamānga! Niiy ngayang koyam ngul kalān aak Canaan.akan, a' kunttow aawar aak Machpelah angan thenchān ngayang.” / Nil Jacob.an wik kanan thaw-a, kan-ngul utham.