1-9 Ngul-ngulaniya, wik wamp Joseph.ant, a' than thawin nungant, “Piip nungkaraman weechan nunanga!” Nil Joseph.angan puk nungantam Manasseha, Ephraim pulang kal, Jacob.an thathayn nunang. Than wampin nungantana, nil Jacob.an thaw nungant Joseph.ant, “God ngath aak Bethel.ang wamp, aak Canaan.ang, a' thaw ngath nilan ngath pam wanch kampan yot thee' ow, a' aak Canaan.aniy aak thanttakam thee'ow yipam aak thanttakam ngulakam wunow. Puk nungkaram kucham inangan aak Egypt.angan aak-ngeeypul, pul ngath thampang. Ephraima, Manasseh pulang kan pal kalān, ngay pulant wik min thawānga!”

10-22 Nil Jacob.an puth wuut kath ngula, mee' ko'anch thampang, ke' thathiy. Nil Joseph.anganiy Ephraima, Manasseh pulang thintham kal Jacob.ant, a’ Jacob.angan ompam kath pulang, a’ nil Joseph.ant ngul thaw, “Ngay kaa'athaman ngaantam-ngeeyangan ngay ke'-ngul thathang nintanga, puth God.an ngath min iiy-iiy, nil ngayang pal Egypt.ak wampath ngay yipam nintanga, puk nungkaram thathang niiyang. Nil puth Joseph.angan Manasseh, puk kaa'-ngeechaman piip-kunchantang ma' malang nyiinathan. A' Ephraim.an ma' thakang piip-kunchantang nyiinathan. Nil Jacob.angan ma' malan Ephraim.antang kuchek wunp, a' ma' thakan kuchek Manasseh.antang wunp. / Nil Joseph.ang anan thathan-a, nil piip-kunch ma'an maayan, a' thaw, “Manasseh.an kaa'- ngeechama! ma' mal nungkaraman kuchek nungantang wunpāna!” Nil puth Jacob.an thawant, “Ya'a! ngay kan thiichang. Ephraim.angan pama, wancha, kampan yot-yotam pi'ow. Nil Manasseh.angan ep ya', pama, wanch chil yot pi'ow thanang.” A' nil Jacob.an thaw ngul, “God.ang Abrahama, Isaaca, ngayang ma'-aath-aath. Nilan yimanang komp inangan ma'-aathow pulang. A' nil Jacob.an Joseph.ant ngul thaw, “Ngay inan kan-ngul uthamāng. Nil God.angan ngul pi'ow nintanga, pama, wancha, puk nungkaram anangan. God.ang koyam ngul kalow niiyang aak Canaan.ak. / Aak ngayan Amorites.an ma'ang piiyang thanang-a, an aak nungkar ngul wantāng, thant kuunch nungkaramant ya'a!”