1-6 Joseph.an iiy Pharaoh.ant, waa' piip nungantama, kuunch nungantam anangan angan aak Goshen.angan wampin. Joseph.angan kuunch nungantam ko'alam wampath thanang, a' Pharaoh.an thaw thant ngul, “Work niiy ngeen iiy-iiyanniiy e?” Thanan kuunch Joseph.antaman thawin nungant, “Ngan min sheep thakan pi'-pi'anan, ka' wuut mangk nganttam al-alangan pi'-pi'in, aak Canaan angan. Ngan aak Goshen.angan ke' wunin ey?” Nil Pharaoh.an thaw Joseph.ant, “Nint piip nungkaramanta, kuunch nungkaramant thawān thant, than aak Goshen.ang wunayn, an puth aak mina! / Than wiy ma' minakwey-a, thawān thant min sheep thak ngatharam pi'ayn.”

7-12 Anpalaniya, Joseph.angan piip-kunchan wampathan Pharaoh.ant. A' nil Jacob.angan ma' thuthan nunang Pharaoh.an. A' nil Pharaoh.angan mepan Jacob.aniy, “Ayyang, wuut-a! kaap ngeen-ngeenang want nintang e?” Nil puth Jacob.aniy thaw Pharaoh.ant, “Ngay kaap 130.akam wunangana. Ngay wuut kath ya' yippak, puth piipa, wuut ngatharaman ep yaamakam wunin. Anpalana, Jacob.an Pharaoh.ant wik min thawant, a' kan-ngul iiy. Nil Joseph.angan piip nungantamanta, kuunch nungantamantan aak min thee' thant a' may thakan thee' thant.

13-19 Than pam wanchangan Egypt.ang may Joseph.antam piiy-piiyin kaap thon-thonan, a' nil money.an Pharaoh.ant thee'. Anpalaniya, than pam wanch aak Egypt.angan thawin nungant, Joseph.ant, “Ngan puth meecha! moneya, may ke'anang ngula! Nint may thee'ān nganta!” Nil puth Joseph.an thaw thant,” / Niiy puth min sheep thakan thee'ān ngath-a, ngay yipam may thee'āng niiyanta!” Than puth pam wanchangan min sheep thakan kalin Joseph.ant, a' nilan may thee' thant ngul.

/ Kaap thonamangan want thanang-a, than pam wanch anangan wampin, a' thawin Joseph.ant, “Ngan moneya, min sheep thakan ya'-ngula! Ngan puth meech, ngul uthamana! Thaa' puy ngan puth ngeen ngul thee'ān nungk e? Puth ngan kemp nganttama, aak nganttam anman pi'anana! / Nint maywey thee'in ngant mungkanakan-a, may kaanch kaampanakanwey-a, nganan puth working men nungkar ngul iiyāna, a' ngan aak nganttaman nungkar thee'ān.” Nil Josephan thaw thant, “Ee'weya! An wik mina!”

20-26 A' ngula, nil Joseph.an thaw thant pam wanch aak Egypt punychan al-alantan, “In ngeeyāna! Ke' konaniy ngathow niiyanga! Niiy-a, puth aak niiyantaman Pharaoh.ant ngula. Ngay niiyant may kaanchan thee'āng, a' niiy kaampāna! / May emayn ngulan-a, niiy thuthāna! a' Pharaoh.ant niiy manyam anman thee'ān, wiyan niiyantakam pi'ān mungkanakana, puth kaampanakan.” Thanan ngangk min ngul weemin, a' thawin, “Yow! ngamp man-yatham yipmam iiyāmp, ngamp ngangk minangam working men iiyāmp nungant, Pharaoh.ant.”

27-31 Anpalan ngulaniya, Jacob.antaman pama, wancha, kampan yot ngul weemin, than yuk way min yot pi'-pi'in, than angan aak Goshen.angan wun-wunin. / Jacob.an kaap 147.angan wantana, nil kan ngaantam-ngeey nungantakam nil mul ngulan wunow. Nil puth Jacob.angan wik kuch Joseph.ant, a' thaw nungant, “/ Ngay uthamāngan-a, niiy ngayang aak Egypt.ang ke' kaampāna! Niiy aak kunttow aawarang anman thenchān ngayang, ngay piip ngatharaman thenchangan, aak Canaan.angan.” Nil puk nengk nungantamang Joseph.angan kaa'-ngakan, “Yaa,” Joseph.an puth thaw, “Ngay nintang koyam ngul kalāng aak ngamparamang thenchāng nintang aak kunttow aawarangan.”