50
1 Ẕnne X̱anžo Dios, na' ẕtobe' benne' dot yežlyó,
benne' ka' žé'gake' gan ẕla' wbíž, na' gan ženen.
2 Ḻo Ya'a Sión, da' naken x̱tanḻe'e ba bza'ní' Dios.
3 Yeḻá' Dios chežo, na' bi soe' žize.
Ẕenkze yi' ḻawe' Ḻe', na' gakḻe'e be' bdone' dan' chechjlen Ḻe'.
4 Wtobe' benne' ka' nníta'gake' ya'abá na'le,
na' benne' ka' nníta'gake' yežlyó nga,
nich wchi'a ḻaže'e benne' chie' ka'.
5 Ẕnne': “Le wtób benne' chia' ka',
benne' ka' bénḻengake' neda' to diža',
dan' bzoa chóchgake' ḻen žen chegak biado' ka'.”
6 Da' zoan ya'abá ẕḻoe'e ḻawn nak Dios chawe',
dan' nake' Benne' wchi'a ḻaže'e benách ka'.
7 Ẕnne': “Le yenle, benne' chia' ka', na' wchaḻja'.
Le wzé nag, benne' Israel ka',
na' nnia' da' yesbaga'a ḻe'e ẕia.
Neda', Dios, naka' Dios chele.
8 Bi tiḻa' ḻe'e ni'a chegak biado' ka' betle ḻawa',
na' ni'a chegak biado' ka' bzeyle,
da' ka' ẕgó'otezele ḻawa' neda'.
9 Bi si'a beždo ka' ḻo na'le ḻe'e,
na' chibo byo ka', bia chele ka'.
10 Yógo'te bia yix̱e' ka' zej nakba' chia',
na' yógo'te bia beždo' ka',
bia zej zoaba' ḻo ya'ado' ka'.
11 Yógo'te bia ka' zoa x̱ílgakba' yó'ogakba' ḻo na'a,
na' ḻezka' yógo'te bia ka' zej zoaba' nbángakba'.
12 Cha' tona' neda', bi yapa' ḻe'e bi da' gonnle chia'
dan' yežlyó, na' yógo'te da' zej den ḻawlen zej naken chia'.
13 ¿Žon byenen gawa' x̱péḻa'gak bež ka',
cha' ye'ja' žen chegak chibo byo ka'?”
14 Le ko'o ḻaw Dios da' wká'n ẕenle Ḻe',
na' le wneẕjw da' wchebe ḻáže'le ḻaw Dios ẕente.
15 Ḻezka' ẕnne': “Bḻiž neda' ḻo ža katen' gak da' wžía yin' benách ka',
na' yeslá' le', na' le' gapo' neda' ba la'ne.”
16 Dios ži'e no benne' wen da' ẕinnj:
“¿Žeklo' ẕchaḻjo' le' kan nak da' wnnakza' neda',
na' ẕnnio' che x̱tiža'a dan' bénḻena' benách chia' ka'?
17 Le' bi ẕḻe'elo' neda' chawe' kate' ẕḻoe'ela' le' da' bi nak chawe' da' žono',
na' ẕzo' cheḻa'ale diža' chia'.
18 Kate' ẕḻe'elo' to benne' wbán, na' žono' ḻe' tẕen,
na' nako' toze ḻen benne' ka', benne' ẕbej yíchjgake' neda'.
19 Žónteze žono' da' ẕia,
na' ẕcháḻjtezo' da' wen ḻaže'.
20 Ẕnnétezo' che lježkzo',
na' žesbago'o ẕia x̱kwide' che x̱na'kzo'.
21 Beno' da' ki, san neda' wzóa' žize.
Goklo' naka' neda' to benne' ka nako' le',
san tiḻkza' le', na' wḻoe'ela' le' ka nak da' beno'.
22 Le chejní'il da' ni na'a, ḻe'e žaḻ ḻáže'le Dios,
nich bi wzóẕj Dios ḻe'e,
na' biž soa no benne' yeslé' ḻe'e.
23 Bennen' ko'e ḻawa' da' wká'n ẕene' neda' gape' neda' ba la'ne,
na' bennen' ẕzoa choch kwine' nich gone' da' chawe',
wḻoe'ela' ḻe' zoa' yeslá' ḻe', na' naka' Dios chie'.”