1 Gokḻen neda', Dios, ḻo yeḻa' ži'i ḻaže' chio'.

Ḻo yeḻa' žeyache' ḻaže' chio' beká'a ẕia da' nbaga'a.

2 Wdíb neda' che da' bi nak chawe' da' bena'.

Bka'n chawe' neda' che doḻa' da' nbaga'a.

3 Žeyónbi'a bži'a chio' Le' ḻen dan' bena'.

Doḻa' ka' bena' žesbága'gaken neda' ẕia.

4 Ḻawo' Le' bena' doḻan'. O', ḻawo' Le'.

Bena' da' bi naken chawe' ḻawo' Le'.

Ki ẕnno' naken chia' nich gak bia' nako' chawe' ni'a che da' ẕnno'.

Naken ḻi ḻaže' kan ẕchi'a ḻažo'o benách ka'.

5 Bwia nga, bache nbága'kza' doḻa' katen' golja'.

Ḻo doḻa' wzoakza' katen' bsan x̱na'a neda'.

6 Žak ḻažo'o Le' soa da' likze ḻo yichj ḻáẕda'wa',

na' ḻo yichj ḻáẕda'wa' bzo' yeḻa' žejní'il.

7 Bka'n chawe' neda' ḻen da' ẕkonlo' žin, na' yega'na' chawe'.

Wdíb neda', na' gakža' chiche ka nak bejw.

8 Bzoa chia' yeḻa' žebele, na' yeḻa' ba nez,

na' žit ka' da' yoa'a gá'ngaken choch, žit ka' bdichjo' Le'.

9 Bi chejsá' ḻažo'o doḻa' ka' nbaga'a,

na' beká'a yógo'te da' bi nak chawe' da' bena'.

10 Dios, beyón chawe' yichj ḻáẕda'wa',

na' bzoa to be' ḻi ḻaže' ḻo yichj ḻáẕda'wa'.

11 Bi wkwaso' neda' ḻawo' Le',

na' bi yekó'o be' la'y chio' ḻo yichj ḻáẕda'wa'.

12 Bebí'i chia' yeḻa' žebele che yeḻa' weslá chio',

na' bzoa choch be' chawe' dan' yoa'a.

13 Naž wsedla' benne' wen da' ẕinnj ka' da' žaz ḻažo'o góngake',

na' benne' doḻa' ka' yeyákgake' chio' Le'.

14 Beslá neda' ḻo ẕia da' nbaga'a, beta' to benne'.

Dios, nako' Benne' Weslá chia',

na' goḻkza' che da' chawe' da' nako' Le'.

15 X̱ana' Dios, bsaljw žoa'a,

na' wzenla' benách ka' da' we ḻawa' Le'.

16 Bi žaz ḻažo'o biado' ka' gota'-ba' ḻawo' Le',

na' bi žaz ḻažo'o biado' ka' wzeya' ḻawo' Le'.

17 Da' žaḻa' ko'ožo ḻaw Dios da' žaz ḻaže'e naken to ḻaẕdo' gax̱jw ḻaže'.

To ḻaẕdo' gax̱jw ḻaže', na' da' žeyát ḻažen' bi wzó' cheḻa'ale, Dios.

18 Ḻo yeḻa' ži'i ḻaže' chio', ben chawe' yež Sión.

Beyón ze'e da' žape chi'in yež Jerusalén'.

19 Naž chaz ḻažo'o biado' ka' gotto' ḻawo' Le' ḻo da' nak chawe',

na' biado' ka' wzeyto' ḻawo' Le'.

Naž gótgake' biado' ka' ḻo bkog la'y chio'.