1 Neno krei, es reꞌ krei feꞌu in neon ahunut, bi Maria naꞌko kuan Makdala nnao kik-kiuk anaꞌ nbi Naiꞌ Yesus in nopu. Antea nee te, in nkius faut koꞌu reꞌ ntoeb noup fatu naan, natnani nrair naꞌko in baran. 2 Onaim in naen anfain neu naiꞌ Simon Petrus ma au, es reꞌ Naiꞌ Yesus In atoup noniꞌ reꞌ In nneek naan ee, onaim in natoon am nak, “Sin nabaak neik hit Usiꞌ naꞌko In nopu! Hai ka mihiin fa sin antao Goe et mee!”

3 Onaim au ꞌok naiꞌ Petrus maen meu nopu naan. 4 Hai nua kai maen mibu-bua, mes au unapaꞌ ꞌneis. Rarit au ꞌtea uhuun uꞌbi nopu naan. 5 Mes au ka ꞌtaam fa ꞌbi in nanan. Au uꞌbees ma ꞌkisu ꞌtaam aah. Anbi naan, au ꞌkius tai manihas reꞌ sin npaek je he nꞌaum naan Naiꞌ Yesus In aon-taꞌun amates naan.

6 Mes oras naiꞌ Petrus neu ntea te, in ntaam ankono ntea nopu naan in nanan. In nkius niit tai manihas reꞌ naan amsaꞌ. 7 In nkius niit aꞌpiruꞌ es amsaꞌ, reꞌ sin anpaek je he nkuub naan Naiꞌ Yesus In human. Mes aꞌpiruꞌ naan, mariꞌik ma nbaits on naꞌko tai manihas naan. 8 Rarit Au, reꞌ feꞌe na ꞌtea uhuun uꞌbi nopu naan, aꞌtaam utuin aꞌbi in nanan. Oras au ꞌkius ꞌiit reꞌ baerꞌ ein naan ok-okeꞌ, au ꞌpirsai Naiꞌ Yesus In uab ein afi unuꞌ, reꞌ nak, In of anmoni nfain naꞌko In aꞌmaten. 9 Fin oras naan, hai reꞌ mjair In atoup noinꞌ ein ka mihiin fa feꞌ Uisneno In Suur Akninuꞌ reꞌ ntui nani mnak, Kristus ro he nmoni nfain naꞌko In aꞌmaten. 10 Rarit hai nua kai mtebi mfain.

11 Mes bi Maria nhaek feꞌe nbi noup fatu naan in enon. In ankae piut. Oras in ankae feꞌ, in naꞌbees ma nkisu ntaam anbi nopu naan. 12 In nkius niit Uisneno In ameput naꞌko neno tunan tuaf nua. Sin nua sin npaken paek mutiꞌ. Sin nua sin ntokon nbin bare reꞌ maeb es ii, natupaꞌ Naiꞌ Yesus In aon-taꞌun amates. Es antoko nbi bare ꞌnakaf in baran. Es antein antoko nbi baer haef ein sin baark ein. 13 Sin nataan ee mnak, “Nansaaꞌ am es ho mkae, ain?”

Onaim in nataah am nak, “Au ꞌkae, natuin sin nait neik au Usiꞌ in aon-taꞌun amates. Mes au ka uhiin fa neu sin ntao Goe et mee?” 14 In naꞌuab anrair on naan ate, in nateut gon ma nabaniꞌ. In nkius niit tuaf es anhake nbi poꞌon naan, mes in ka nahiin fa nak, Tuaf naan, es reꞌ Naiꞌ Yesus.

15 Onaim Naiꞌ Yesus nataan ee mnak, “Nansaaꞌ am es ho mkae, ain? Fin ho maim sekau?”

Bi Maria in teenb ee, atoniꞌ naan, suma araip poꞌon anbi naan. Onaim in anfur-furiꞌ mnak, “Aam. Karu ho mait meik In aon-taꞌun amates, mutoon kau feꞌ neu ho mutuun Ee et mee, tua. Maut he au ꞌeik Je ꞌeu bare bian he ꞌsuub Ee nok rek-reko. Amturun kau, tua!”

16 Rarit Naiꞌ Yesus anhaamn ee mnak, “Maria.”

Onaim in nbaniꞌ nꞌain Naiꞌ Yesus am nak, “Raboni!” (Anbi uab Aram, in oten nak, “Au Tungguru!”)

17 Naiꞌ Yesus natoon ee mnak, “Kais amreoꞌ Kau feꞌ, fin Au ka ꞌsae fa feꞌ ꞌeu Au Amaꞌ et sonaf neno tunan. Mes ho mnao feꞌ, he mutoon meu Au aok-bian sin im mak, ‘Au he ꞌnao ꞌeu Au Amaꞌ et sonaf neno tunan. In es reꞌ hi Amaꞌ msaꞌ. In reꞌ naan, Au Uisneno. Onaim In reꞌ naan, hi Uisneon nggoa msaꞌ.’ ”

18 Rarit bi Maria naꞌko Makdala nnao natoon Naiꞌ Yesus In atoup noinꞌ ein am nak, “Au uteef aꞌrair ꞌok hit Usiꞌ, Naiꞌ Yesus!” Onaim In natoon Naiꞌ Yesus In haan beno neu sin.

19 Neno naan nateef nok neno krei, es reꞌ krei feꞌu in neon ahunut. Maans ee feꞌe nmouf. Onaim Naiꞌ Yesus In atoup noinꞌ ein nabuan. Sin naꞌeek uim je in eonꞌ ein mates, natuin sin namtausan atoin Yahudis sin aꞌnaet ma kaes kouꞌn ein. Rarit Naiꞌ Yesus neem anhake nbi sin atnaank ein am nak, “Saloom!” 20 Oras Naiꞌ Yesus nasee sin on naan ate, In naruruꞌ ma nakriraꞌ paap ein reꞌ nbin In aꞌniman ma In abnapan. In atoup noinꞌ ein anmariin anmaten oras sin nkius niit sin Usin. 21 Rarit Naiꞌ Yesus natonan sin im nak, “Maut he hi mamut ma mtaininaꞌ. Mimnau, fin Au Amaꞌ anhaefan Kau on mee te, Au ꞌhaefan ki on naan amsaꞌ.” 22 In naꞌuab anrair on naan ate, In anpaumak-maak sin, onaim anfuu In asnasan neu sin meseꞌ-meseꞌ. Rarit In nak, “Au ꞌfee Uisneno In Asmaan Akninuꞌ ꞌeu ki. Amtoup maan Ee. 23 Onaim karu hi mnikaꞌ main atoniꞌ in sanat, sanat naan namneku nrair, fin Uisneno nnoes nain saant ein naan amsaꞌ. Mes karu hi ka mnikan main fa atoniꞌ in sanat, Uisneno ka nnoes nain fa in sanat naan amsaꞌ.”✡Naiꞌ Mateos 16:19, 18:18

24 Anmuiꞌ tuaf es naꞌko Naiꞌ Yesus In atoup noinꞌ ein tuaf boꞌes am nua, kaan ee naiꞌ Tomas. Sin nteek ee msaꞌ am nak, ‘riꞌaan koen’. Oras Naiꞌ Yesus neem nakriraꞌ In tuan ee neu sin, naiꞌ Tomas ka nabua nok fa atoup noinꞌ ein naan. 25 Es naan ate, oras in partei ngguin nak, “Hai miteef amrair mok hit Usiꞌ,” in nataah am nak, “On nai. Au ro he ꞌkius papaꞌ naꞌko kuust ee in baran abit In aꞌniman feꞌ. Ma au ro he urepaꞌ au kruruk ꞌeu In papaꞌ abit In abnapan. Fin karu au ka ꞌmoeꞌ je fa feꞌe te, au ka ꞌpirsai fa feꞌ ꞌak, In anmoni nfain.”

26 Ankono krei jes antein, Naiꞌ Yesus In atoup noinꞌ ein nabuan nfanin nok naiꞌ Tomas anbin uim jes. Eonꞌ ein maꞌreut ein mates anrair, mes Naiꞌ Yesus antaam anhake nbi sin atnaank ein. In nasee sin im nak, “Hoore tua! Saloom!” 27 Onaim In naꞌuab neu naiꞌ Tomas am nak, “Amnonaꞌ ho krurum meu ia, he mparikas Au ꞌnimak feꞌ. Rarit amkonob ho krurum meu papaꞌ abit Au bnapak. Ampirsai nai mak, Au ꞌmoni ꞌfain jen! Kais muꞌoniꞌ ho neek pirsait reꞌ naan.”

28 Naiꞌ Tomas nataah am nak, “Usiꞌ! Oras ia au ꞌpirsai batuur! Ho kuum reꞌ ia, es reꞌ au Usiꞌ ma au Uisneno msaꞌ!”

29 Onaim Naiꞌ Yesus natoon ee mnak, “Tomas! Ho mpirsai mak, Au ꞌmoni ꞌfain jen, natuin ho mkius miit amrair meik ho matam fuam kuum. Mes neu tuaf reꞌ napein upan ma paꞌe reko nneis, es reꞌ tuaf reꞌ ka nkius niit Kau fa, mes sin npirsain.”

30 Naiꞌ Yesus anmoeꞌ rais sanmakat amfaun bian antein, reꞌ au ka ꞌtui sin fa ꞌbi surat reꞌ ia. In atoup noinꞌ ein ankius niit rais sanmaakt ein naan nok sin humak ma matak fuak ein kuuk. 31 Mes rasi reꞌ au ꞌtui ꞌrari ꞌbi surat reꞌ ia, au ꞌtui, maut he hi mpirsai mmak,