21
Usif Yesus naruruꞌ ma nakriraꞌ In tuan ee neu In atoup noniꞌ tuaf hiut
1 Ankoon neno fauk on naan ate, Naiꞌ Yesus nakriraꞌ In tuan ee ntein anbi nefo Tiberias in ninin. In reetn ii, on nai: 2 Oras naan, Naiꞌ Yesus In atoup noniꞌ tuaf hiut nabuan. Sin reꞌ naan esan reꞌ:
Naiꞌ Simon Petrus,
naiꞌ Tomas, reꞌ sin nteek ee mnak, ‘riꞌaan koen’,
naiꞌ Nitanel, naꞌko kuan Kana et propinsi Galilea,
naiꞌ Sebedius in anah tuaf nua,
ma Naiꞌ Yesus in atoup noniꞌ tuaf nua ntein.
3 Naiꞌ Simon Petrus naꞌuab neu in partei ngguin am nak, “Au he ꞌnao ꞌokar au pukat.”
Onaim sin natahan am nak, “Neu, reko! Hai mok amsaꞌ.” Rarit sin nnaon neun neof goe in ninen. Onaim sin nsaen kofaꞌ he nnao namin ikaꞌ. Mes mabeꞌ naan sin ka napenin fa saaꞌ-saaꞌ.✡Naiꞌ Lukas 5:5
4 Nokaꞌ kiku on naan ate, Naiꞌ Yesus anhake nbi neof goe ninen. Mes In atoup noinꞌ ein ka nahinin fa neu In reꞌ naan, Naiꞌ Yesus. 5 Onaim In nꞌaupun he nataan sin im nak, “Aupuu! Baꞌe sin! Mipein imrair ika, oo?”
Sin natahan am nak, “Kaah fa, tua! Hai ka mipein fa kreꞌo msaꞌ.”
6 Onaim Naiꞌ Yesus natoon neu sin im nak, “Amꞌokar miit pukat naan neu koofꞌ ee aon-bian. Hi of mipein.”
Rarit sin nmoeꞌ natuin ein. Onaim sin napenin ikaꞌ. Mes iikꞌ ein naan namfa-faun, tar antea sin ka bisa nheer fa pukat naan anfain neu koofꞌ ee nanan.✡Naiꞌ Lukas 5:6
7 Au ꞌbi naan amsaꞌ. Au reꞌ ia, atoup noniꞌ reꞌ Naiꞌ Yesus anneek. Rarit au utoon ꞌeu naiꞌ Petrus ꞌak, “Airoo! Hit Usiꞌ es reꞌ nee!”
Anneen Au uab ii on naan ate, naiꞌ Simon Petrus anpaek nafaniꞌ in baru, rarit anꞌookr on antaam anbi nefo he nabhaeꞌ neu metoꞌ. 8 Fin kofaꞌ naan naꞌroo of oniꞌ suma meter nautn es naꞌko metoꞌ. Rarit in partei ngguin nfoeꞌ kofaꞌ nfain neu metoꞌ, ma nheer neik pukat reꞌ naheun nok ikaꞌ naꞌko kofaꞌ naan in kotin.
9 Oras sin ntean anbin metoꞌ, sin nkius ai makrahaꞌ reꞌ npiin anbi naan. Anbi ai je fafon, anmuiꞌ ikaꞌ, ma nmuiꞌ utunuꞌ msaꞌ. 10 Naiꞌ Yesus naꞌuab neu sin im nak, “Meik neem ikaꞌ fuaꞌ fauk miꞌko reꞌ hi mheek maan sin feꞌe na.”
11 Rarit naiꞌ Simon Petrus ansae nfani nbi koofꞌ ee nanan, he in nheer pukat naan neu metoꞌ. Pukat naan naheun nok iik koꞌu. Sin amfauk ein, nautn es boꞌ niim am teun (153). Maski iikꞌ ein namfaun on naan, mes pukat naan ka natpisuꞌ fa.
12 Rarit Naiꞌ Yesus anhaman sin im nak, “Iim, he mbukae feꞌ!”
Sin nahini nrarin nak, In reꞌ naan, sin Usin. Es naan ate sin ka nabranin fa he nataan am nak, “Baꞌe reꞌ ia, sekau?” 13 Rarit Naiꞌ Yesus nait utunuꞌ ma ikaꞌ, onaim annao nfee sin.
14 Naan, es reꞌ no teun ii Naiꞌ Yesus naruruꞌ ma nakriraꞌ In tuan ee neu In atoup noinꞌ ein, oras In nmoni nfain naꞌko In aꞌmaten.
Usif Yesus naꞌuab nok naiꞌ Petrus
15 Oras sin anbukae nrarin, Naiꞌ Yesus nataan naiꞌ Simon Petrus am nak, “Simon, naiꞌ Yohanis in anah. On mee? Ho mneek Kau mneis muꞌko ho partei ngguin ia nneek Kau, oo?”
In nataah am nak, “Batuur, Usiꞌ! Ho muhiin amrair mak, au ꞌneek Ko, tua.”
Onaim Naiꞌ Yesus anbaasn ee mnak, “Karu on naan ate, mutuuk murek-rekoꞌ Au ꞌbib-kaes aan ein he sin napenin amnahat.”
16 Rarit Naiꞌ Yesus nataan anteinꞌ ee mnak, “Simon, naiꞌ Yohanis in anah. On mee? Ho mneek Kau, oo?”
In nataah am nak, “Batuur, Usiꞌ! Ho muhiin amrair mak, au ꞌneek Ko, tua.”
Onaim Naiꞌ Yesus anbaasn ee mnak, “Karu on naan ate, mpijaar ma mpairoir murek-rekoꞌ Au ꞌbib-kasen.”
17 Rarit Naiꞌ Yesus nataan anteinꞌ ee mnak, “Simon, naiꞌ Yohanis in anah. On mee? Ho reꞌ ia, Au partei ja, oo?”
Onaim naiꞌ Petrus in neekn ee nsuus nain, natuin Naiꞌ Yesus nataan no teun goen nak, “Ho mneek Kau, oo?” Rarit in nataah am nak, “Ho es reꞌ muhiin main raisn ein ok-okeꞌ. Onaim Ho muhini mrair mak, au reꞌ ia, Ho partei ja, tua.”
Rarit Naiꞌ Yesus anbaasn ee mnak, “Karu on naan ate, mutuuk murek-rekoꞌ Au ꞌbib-kasen he sin napenin amnahat. 18 Ho mheke mrair Au sairt ii, oo? Au he utoon ko on nai msaꞌ: unuꞌ te, oras ho munif ko feꞌe te, ho biasa mpaek kuum baru, ma mpaek kuum pasu ꞌfutuꞌ, rarit ho mnao meu mee ja haa, mutuin ho romim. Mes oras ho mumnasi mrair, ho of amnonaꞌ ma mfee ho ꞌnimam he atoniꞌ bian anfuut sin, anpaek kuuk ho pasu ꞌfutuꞌ. Rarit sin nheer neik ko msaꞌ meu baer jes reꞌ ho ka mroim je fa.” 19 (Naiꞌ Yesus naꞌuab on naan, he natoon neu naiꞌ Petrus anmatoom nok saaꞌ reꞌ of anjair neu in tuan. Fin naiꞌ Petrus in aꞌmaten of naruruꞌ ma nakriraꞌ Uisneno In pinan ma krahan.)*Of oniꞌ toon boꞌ seo mnee oras Naiꞌ Yesus anmoin naan een (96 M), anmuiꞌ naan aꞌnaak akrei tuaf es, kaan ee naiꞌ Klemen naꞌko kota Roma, reꞌ antui mnak, atoin ein anroor niis naiꞌ Petrus. Of oniꞌ toon natun nua mboꞌes am nua oras Naiꞌ Yesus anmoin naan een (212 M), anmuiꞌ naan aꞌnaak akrei jes antein, kaan ee naiꞌ Tertulian, reꞌ antui mnak, sin nkuus nakfirit naiꞌ Petrus anbi hau nehe. Ma nmuꞌi tradisi bian anbi krei ji, reꞌ nak, oras sin he nkuus nakfirit naiꞌ Petrus anbi hau nehe, of oniꞌ toon boꞌ nee mhaa ntea toon boꞌ nee mniim oras Naiꞌ Yesus anmoin naan een (64-65 M), naiꞌ Petrus antoit he sin nakfirit nasnuab in aꞌnakan. In ntoit on reꞌ naan, natuin in nnaben ate, in ka pantas fa he nmaet nok in aꞌnakan naan neiki nsae, nahuum on reꞌ Naiꞌ Yesus.
Rarit Naiꞌ Yesus naꞌuab neu naiꞌ Petrus am nak, “Uum he mjair Au ngguin nai!”
Atoup noniꞌ reꞌ Usif Yesus anneek
20 Oras naan, naiꞌ Petrus nabaniꞌ he nkius neu koit. In nkius kau utuin sin nua sin naꞌko sin koitk ein. Au reꞌ ia, atoup noniꞌ reꞌ Naiꞌ Yesus anneek. Au es reꞌ aꞌtook aꞌbi Naiꞌ Yesus In aon-bian amsaꞌ, oras hai mtook ma mbukae fesat Paska. Au reꞌ ia, es reꞌ utaan Ee mꞌak, “Usiꞌ! Sekau of es reꞌ naꞌsosaꞌ Ko, tua?”✡Naiꞌ Yohanis 13:25 21 Oras naiꞌ Petrus ankius niit kau te, in nataan Naiꞌ Yesus am nak, “Usiꞌ! Ho muꞌuab amrair meu kau feꞌe na. Mes on mee, nok tuaf reꞌ nee?”
22 Naiꞌ Yesus naꞌuab neu naiꞌ Petrus am nak, “Ka ho urusn aa fa. Kar-karu Au ꞌroim he in suma npao nbi ia goah tar antea Au ꞌfain ꞌuum ate, in raisn ii saaꞌ? Reꞌ pentiing ii, ho ro he mumnau saaꞌ reꞌ Au ꞌbaꞌan ko feꞌe na, es reꞌ: uum he mjair Au ngguin nai.”
23 Natuin Naiꞌ Yesus naꞌuab on naan, In atoup noniꞌ bian anmurai naꞌuab ein am nak, “Naiꞌ Yohanis naan, ka neu nmaet fa.” Te kaah, Naiꞌ Yesus ka naꞌuab fa on naan. Reꞌ In nak ii, es reꞌ: “Ka ho urusn aa fa. Kar-karu Au ꞌroim he in suma npao nbi ia goah tar antea Au ꞌfain ꞌuum ate, in raisn ii saaꞌ?”
Naiꞌ Yohanis nasoup in surat
24 Atoup noniꞌ reꞌ Naiꞌ Yesus naꞌuab naan, es reꞌ au, naiꞌ Yohanis kau. Au es reꞌ uretaꞌ rasin ia ok-okeꞌ ꞌeu ki. Au es reꞌ aꞌkius ꞌeik au matak fuak ein. Rarit au ꞌtui sin ok-okeꞌ. Onaim hit tahiin tak, rasin reꞌ au utoon ki sin reꞌ naan, ro batuur, tua.
25 Ma nmuiꞌ rasi mfaun bian feꞌ reꞌ Naiꞌ Yesus anmoeꞌ sin. Karu atoniꞌ nsobaꞌ he ntui nain sin ok-okeꞌ, nmurai naꞌko Naiꞌ Yesus nanaob In mepu tar antea narair sin ate, au ꞌak pah-pinan ia ꞌteme-ꞌteme msaꞌ ka bisa nasaeb fa suurt ein naan ok-okeꞌ.
On reꞌ naan, tua,
Au, naiꞌ Yohanis kau, tua.
*21:19 Of oniꞌ toon boꞌ seo mnee oras Naiꞌ Yesus anmoin naan een (96 M), anmuiꞌ naan aꞌnaak akrei tuaf es, kaan ee naiꞌ Klemen naꞌko kota Roma, reꞌ antui mnak, atoin ein anroor niis naiꞌ Petrus. Of oniꞌ toon natun nua mboꞌes am nua oras Naiꞌ Yesus anmoin naan een (212 M), anmuiꞌ naan aꞌnaak akrei jes antein, kaan ee naiꞌ Tertulian, reꞌ antui mnak, sin nkuus nakfirit naiꞌ Petrus anbi hau nehe. Ma nmuꞌi tradisi bian anbi krei ji, reꞌ nak, oras sin he nkuus nakfirit naiꞌ Petrus anbi hau nehe, of oniꞌ toon boꞌ nee mhaa ntea toon boꞌ nee mniim oras Naiꞌ Yesus anmoin naan een (64-65 M), naiꞌ Petrus antoit he sin nakfirit nasnuab in aꞌnakan. In ntoit on reꞌ naan, natuin in nnaben ate, in ka pantas fa he nmaet nok in aꞌnakan naan neiki nsae, nahuum on reꞌ Naiꞌ Yesus.