1 Hermanos, echiriꞌ xinkꞌojiꞌ ukꞌ alaq, na xinchꞌaꞌt ta ukꞌ alaq jelaꞌ pachaꞌ kinchꞌaꞌt kukꞌ tikawex kataqan ri Ruxlabꞌixel ri Dios pa kanimaꞌ; ma e xinchꞌaꞌt ukꞌ alaq jelaꞌ pachaꞌ kinchꞌaꞌt kukꞌ tikawex kꞌa kakitaqej taq ri rayibꞌal re ri kitiꞌjil, ri kꞌamajaꞌ kꞌo kikꞌiyibꞌal chwach ri Cristo. 2 Jelaꞌ pachaꞌ kaꞌan che juna ralko akꞌa, na kayaꞌ ta wa che ma xew kutij utzꞌum; jekꞌulaꞌ xinꞌan riꞌin, xinya kꞌutunik lik na kꞌayew taj che alaq, ma kꞌamajaꞌ kariq alaq ukꞌulik ri kꞌutunik taqal chike ri kꞌo chi kikꞌiyibꞌal chwach ri Dios. Yey kꞌamajaꞌ ne kariq alaq umajik usukꞌ waꞌ, 3 ma kꞌa taqem alaq taq ri rayibꞌal re ri tiꞌjil alaq. Ma chixoꞌl alaq e kꞌo ri kꞌax kikꞌuꞌx chikij jujun chik y e kꞌo ri e aj chꞌaꞌoj. ¿Na junam ta nebꞌa ri bꞌinik silabꞌik alaq rukꞌ ri kibꞌinik taq ri winaq na ketaꞌam ta uwach ri Qaqaw y e kakitaqej ri xa re ruwachulew? 4 Ma chixoꞌl alaq e kꞌo ri kakibꞌiꞌij: «In re ri Pablo» yey jujun chik kakibꞌiꞌij: «In re ri Apolos.»

5 Kantzꞌonoj kꞌu che alaq: ¿Saꞌ ruwach ri Pablo? ¿Y saꞌ ruwach ri Apolos? Riꞌoj oj nimanel chwach ri Dios yey ruma ri chak xqaꞌan ukꞌ alaq, xkoj alaq rubꞌiꞌ ri Cristo. Riꞌin y ri Apolos xa e xqaꞌan ri chak uyaꞌom ri Qanimajawal chiqe. 6 E riꞌin xintzijoj ri Utzilaj Tzij che alaq pachaꞌ kuꞌan juna awanel; y ri Apolos xutoꞌ alaq chaꞌ katikiꞌ alaq chi utz chwach ri Dios pachaꞌ kuꞌan juna aj tikoꞌn echiriꞌ kuꞌan jaꞌanik. Pero ri kꞌiyibꞌal alaq, e ri Dios xyaꞌwik. 7 ¿China kꞌu riꞌ ri más kꞌo uwach? ¿E nawi ri xtikow re? ¿E nawi ri xjaꞌan re? Na e taj, ma e ri Dios, ri kakꞌiyisan re. 8 Ri katikow re y ri kajaꞌan re, xa jun kiwach; yey chikijujunal kakikꞌul ri rajil ukꞌaxel e chirij ri chak xkiꞌano. 9 Ekꞌu riꞌ riꞌoj xa oj umokom ri Dios yey ralaq e pachaꞌ alaq rulew kachakux uwach ruma ri Dios.

Jenelaꞌ ralaq e pachaꞌ alaq juna ja katajin ri Dios che uyakik. 10 Yey Rire e xyaꞌw panuqꞌabꞌ xinjeq ruchak chixoꞌlibꞌal alaq. E pachaꞌ juna aj yakal ja, nabꞌe kutzꞌaq ruparaqan ri ja; tekꞌuchiriꞌ jun chik aj chak kulem ri xan puwiꞌ. Jekꞌulaꞌ riꞌin nabꞌe xintik riglesia; tekꞌuchiriꞌ kꞌo jun chik xutoꞌ alaq chaꞌ kakꞌiy alaq chwach ri Dios. Ri chirajawaxik wi e chikijujunal raj chak kakilo suꞌanik kechakunik chaꞌ kel chi utz ri chak. 11 Ma na utz ta kꞌenoq we kꞌo junoq kukoj jun chik uparaqan ri ja junwi chwa ri kojotal chik; yey ruparaqan ri ja kojotal chik, e ri Qanimajawal Jesucristo.

12 Puwi ruparaqan juna ja kꞌo ri kuchapabꞌej oro, plata o chomilaj abꞌaj; y kꞌo ri kuchapabꞌej tzꞌalam, xlabꞌ o kꞌim. 13 Che taq waꞌ wa kachapabꞌexik kꞌo ri kakowin chupa ri aqꞌ y kꞌo ri na kakowin taj; jekꞌulaꞌ ri chak uꞌanom junoq pubꞌiꞌ ri Cristo, ma pa ri qꞌij re ri qꞌatbꞌal tzij, ri Dios kuqꞌalajisaj we utz ri chak uꞌanom o na utz taj. 14 We ri chak uꞌanom kꞌo ukowil, kukꞌul kꞌu riꞌ ri rajil ukꞌaxel kuya ri Dios; 15 noꞌj we na jinta ukowil, riꞌ na jinta rajil ukꞌaxel kukꞌulu. Kasach kꞌu uwach riꞌ ruchak, tobꞌ rire kꞌa kakolobꞌetajik, e pachaꞌ junoq kukolobꞌej ribꞌ echiriꞌ kakꞌat ri rocho.

16 ¿Na etaꞌam ta nebꞌa ralaq, alaq rocho ri Dios yey e ri Ruxlabꞌixel ri Dios ri jeqel ukꞌ alaq? 17 E uwariꞌche we kꞌo junoq kusach uwach ri rocho ri Dios,*“Kusach uwach ri rocho ri Dios”: Waꞌ e keꞌelawi echiriꞌ junoq kusach uwach ruchak ri Dios chikixoꞌl rutinamit. ri Dios kusach uwach ri kaꞌanaw waꞌ. Ma ri rocho ri Dios e santo; yey waꞌ e ralaq. 18 Makꞌo musok ribꞌ chiribꞌil ribꞌ. Ma we kꞌo junoq kuchꞌobꞌo lik retaꞌam chi ronoje che ruwachulew, chirajawaxik riꞌ chuꞌana che ribꞌ pachaꞌ junoq na jinta kꞌana retaꞌam, chaꞌ e karetaꞌmaj runaꞌoj ri Dios. Jekꞌulaꞌ kuꞌana lik kꞌo unaꞌoj paqatzij wi. 19 Ma runimal naꞌoj re ruwachulew na jinta kꞌana uwach chwach ri Dios. E pachaꞌ ri tzꞌibꞌital kan chupa Ruchꞌaꞌtem ri Dios: