2
1 Hermanos, riꞌin echiriꞌ xinopon ukꞌ alaq chaꞌ kantzijoj ri Utzilaj Tzij re ri Dios, na xintzijoj ta waꞌ rukꞌ nimaq taq chꞌaꞌtem y unimal naꞌoj xa re ruwachulew. 2 Ri xinchꞌobꞌo e xew kantaqej utzijoxik ri Qanimajawal Jesucristo y rukamik Rire chwa ri cruz. 3 Y echiriꞌ xinkꞌojiꞌ ukꞌ alaq, xinnaꞌo na jinta nuchuqꞌabꞌ chiwibꞌil wibꞌ, yey xinjeq ne kinbꞌirbꞌot ruma ri nuxiꞌin ibꞌ ma xinnaꞌo na kanriq ta uꞌanik janipa ri karaj ri Dios chwe. 4 Ekꞌu rutzijoxik xinꞌano na e ta rukꞌ unimal naꞌoj xa re ruwachulew y chomilaj taq chꞌaꞌtem kasokosoꞌnik, ma e rukꞌ ri Ruxlabꞌixel ri Dios y ruchuqꞌabꞌ Rire 5 chaꞌ na kakubꞌiꞌ ta kꞌuꞌx alaq rukꞌ ri Cristo xa ruma unimal naꞌoj re ruwachulew, ma e ruma ruchuqꞌabꞌ ri Dios.
Ri Ruxlabꞌixel ri Dios kuqꞌalajisaj Runaꞌoj ri Dios chiqe
6 Noꞌj echiriꞌ oj kꞌo chikixoꞌl ri lik kijikibꞌam kikꞌuꞌx rukꞌ ri Dios, ri kaqatzijoj kaqaꞌan rukꞌ unimal naꞌoj. Na e ta rukꞌ unimal naꞌoj xa re ruwachulew, na e tane rukꞌ naꞌoj ke ri nimaq taq taqanelabꞌ che ruwachulew, ri xa kasach kiwach. 7 Ma ri kaqaqꞌalajisaj e ri unimal naꞌoj re ri Dios, yey waꞌ na etaꞌmatal ta rojertan.* Col. 2:2-3 Echiriꞌ kꞌamajaꞌ ne kaꞌan ruwachulew, Rire uchꞌobꞌom chi uloq kuya wa naꞌoj chiqe re yakbꞌal qaqꞌij. 8 Waꞌ wa naꞌoj re ri Dios na xkimaj ta usukꞌ ri nimaq taqanelabꞌ re ruwachulew. Ma ta e laꞌ xkimaj usukꞌ, na kakiya tane riꞌ chwa ri cruz ri Qajawal, ri lik nim uqꞌij. 9 E jelaꞌ pachaꞌ ri tzꞌibꞌital kan chupa Ruchꞌaꞌtem ri Dios:
E taq ri winaq na kakimaj ta usukꞌ
ronoje ri utz ujikibꞌam uwach ri Dios
chike ri lik kꞌax kenaꞌw re Rire.
E taq waꞌ wa utz lik na jinta junoq iliyom re,
na jinta junoq tayom re
y na jinta ne junoq noꞌjiyom waꞌ Is. 64:4
kachaꞌ. 10 Yey ri Dios uqꞌalajisam chi waꞌ chiqe riꞌoj ruma ri Ruxlabꞌixel. Ma ri Ruxlabꞌixel Rire ronoje retaꞌam, kumaj ne usukꞌ ri saqil unaꞌoj ri Dios. 11 Chikixoꞌl taq ri winaq, ¿kꞌo nawi junoq retaꞌam saꞌ ri kuchꞌobꞌ juna chik tikawex? Na jintaj. Ma xew wa tikawex retaꞌam saꞌ ri kꞌo pa ranimaꞌ. Jekꞌulaꞌ na jinta junoq retaꞌam runaꞌoj ri Dios, ma xew ri Ruxlabꞌixel ri Dios etaꞌmayom re waꞌ. 12 Yey woꞌora, ri qanaꞌoj riꞌoj na junam ta rukꞌ ri kinaꞌoj ri na ketaꞌam ta uwach ri Dios. Ma riꞌoj e qakꞌulum ri Ruxlabꞌixel ri Dios chaꞌ kaqetaꞌmaj ronoje ri chomilaj sipanik uyaꞌom Rire chiqe. 13 Yey waꞌ wa kaqatzijoj, na e ta rukꞌ chꞌaꞌtem qamajom chikij ri tikawex, ma e rukꞌ ri ukꞌutum ri Ruxlabꞌixel ri Dios chiqe. Y jekꞌulaꞌ e kaqaqꞌalajisaj runaꞌoj ri Dios rukꞌ chꞌaꞌtem re ri Ruxlabꞌixel ri Dios. 14 Ekꞌu rachi na jinta ri Dios pa ranimaꞌ, na kukꞌul ta ukꞌuꞌx ri kubꞌiꞌij ri Ruxlabꞌixel ri Dios che, ma chwach rire waꞌ xa sachibꞌal naꞌoj; yey na kumaj ta usukꞌ, ma waꞌ xew kamajtaj usukꞌ we kaqꞌalajisax ruma ri Ruxlabꞌixel ri Dios. 15 Noꞌj we ri Ruxlabꞌixel ri Dios kataqan pa ranimaꞌ junoq, riꞌ kumaj usukꞌ saꞌ ri utz chwach ri Dios, y na kaqꞌat ta kꞌu tzij puwiꞌ. 16 Ruchꞌaꞌtem ri Dios jenewaꞌ kubꞌiꞌij:
¿Kꞌo nawi junoq majayom usukꞌ ronoje runaꞌoj ri Dios Qajawxel?
¿Kꞌo nawi junoq kayaꞌw unaꞌoj Rire? ¡Na jintaj! Is. 40:13
kachaꞌ. Pero chiqe riꞌoj yaꞌtal runaꞌoj ri Cristo.