1 Etaꞌmatal chi kꞌut kꞌo jun chixoꞌlibꞌal alaq xuꞌan rixoqil che rukaꞌm uchu. Yey wa katajin che uꞌanik lik na e ta kꞌenoq, ma waꞌ na kilitaj tane chikixoꞌlibꞌal ri na ketaꞌam ta uwach ri Dios. 2 Y na rukꞌ ta kꞌu riꞌ, ¡ralaq lik ꞌanom nim che ibꞌ alaq! ¿Suꞌbꞌe na xbꞌisoj ta alaq waꞌ wa mak? Ma ri xraj e ta xesaj bꞌi alaq chikixoꞌlibꞌal rutinamit ri Dios ri kaꞌanaw waꞌ.

3 Riꞌin nuqꞌatom chi tzij puwi ri xꞌanaw re waꞌ wa mak. Y tobꞌ ne na in jinta ukꞌ alaq chiwachil, e kunaꞌ nukꞌuꞌx riꞌin pachaꞌ in kꞌo ukꞌ alaq. 4 Kambꞌiꞌij kꞌu che alaq, molo ibꞌ alaq chupa rubꞌiꞌ ri Cristo rukꞌ ruchuqꞌabꞌ Rire; yey mikꞌow chikꞌuꞌx alaq, riꞌin e pachaꞌ in kꞌo chixoꞌlibꞌal alaq tobꞌ na in jintaj. 5 Ekꞌu ri kaꞌan alaq e kaya alaq wa aj mak puqꞌabꞌ ri Satanás*“Kaya alaq wa aj mak puqꞌabꞌ ri Satanás”: Ri xraj ri Pablo e ri xmakunik kunaꞌ chukꞌuꞌx ri mak xuꞌano, kakꞌun kꞌu saq chwach y kutzelej utzij. 1 Jn. 5:19 chaꞌ jelaꞌ kasach uwach ri rayibꞌal re rutiꞌjil y jelaꞌ kakolobꞌetaj chupa ruqꞌijol rukꞌunibꞌal ri Qanimajawal.

6 Lik na utz taj katakꞌabꞌaꞌ qꞌij alaq ma kꞌo mak chixoꞌlibꞌal alaq. ¿Na etaꞌam ta nebꞌa alaq e jubꞌiqꞌ levadura kusipowirisaj upa ronoje ri qꞌor? Waꞌ e keꞌeloq, we kꞌo mak chixoꞌl alaq yey we na kesax taj, ri jujun chik kepachabꞌ rukꞌ. 7 Ri pam re ri nimaqꞌij Pascua, waꞌ ꞌanom rukꞌ kꞌakꞌ qꞌor na jinta levadura che; jekꞌuriꞌlaꞌ ralaq, chesaj ibꞌ alaq chupa ri na utz taj re ri qꞌeꞌl bꞌinik silabꞌik alaq chaꞌ kuꞌan alaq jun saqil tinamit re ri Dios. Yey ralaq alaq chi saqil utinamit ri Dios, ma ri Cristo ya xkam paqakꞌaxel riꞌoj jelaꞌ pachaꞌ ri bꞌexex re Pascua, ri xkamisaxik echiriꞌ ri Dios xebꞌukolobꞌej rutinamit Israel.*Éx. 12; 1 P. 1:18-19 8 Ekꞌu woꞌora ruma ri xuꞌan ri Cristo, qaꞌana jun saqil nimaqꞌij chwach ri Dios rukꞌ ri qabꞌinik qasilabꞌik, chaꞌ jelaꞌ oj pachaꞌ ri pam re Pascua na jinta levadura che, ruma qayaꞌom kan ri na utz taj, waꞌ e ri chꞌulilaj mak xojkꞌojiꞌ wi ojertan, y pa saqil wi chojkꞌola chupa ri Qꞌijsaq.

9 Chupa ri jun nucarta nutaqom bꞌi, ximbꞌiꞌij pan che alaq machbꞌilaj alaq ri kaketzꞌabꞌej uwa kiqꞌij kukꞌ jujun chik na kikꞌulel taj. 10 Wa ximbꞌiꞌij na e ta keꞌeloq xa jumul kesaj ibꞌ alaq kukꞌ konoje raj makibꞌ, ri na kikojom ta rubꞌiꞌ ri Cristo. Waꞌ e ri kakiyoj kibꞌ kukꞌ jujun chik, ri lik e rayinel, ri e eleqꞌomabꞌ y ri e aj tioxabꞌ. Ma we kꞌo junoq karaj karesaj ribꞌ chikixoꞌl konoje raj makibꞌ, ¿suꞌanik kꞌu riꞌ kakꞌojiꞌ wara che ruwachulew? 11 Rukꞌ ri xintzꞌibꞌaj xuaj ximbꞌiꞌij y e kambꞌiꞌij woꞌora: Machbꞌilaj alaq junoq kubꞌiꞌij ralkꞌoꞌal ri Dios yey karetzꞌabꞌej uwa uqꞌij rukꞌ jun chik na ukꞌulel taj, o junoq aj rayinel, aj tiox, aj chꞌaminel, qꞌabꞌaꞌrel o eleqꞌom. Kukꞌ waꞌ wa tikawex jelaꞌ kibꞌinik kisilabꞌik, tobꞌ ne xa waꞌim maꞌan alaq kukꞌ. 12 Ma paqꞌabꞌ ralaq kꞌo wi kaqꞌat alaq tzij pakiwi ri hermanos re ri iglesia alaq. Pero ¿kꞌo nawi panuqꞌabꞌ riꞌin o paqꞌabꞌ ralaq ri kaqꞌat tzij pakiwi ri na kikojom ta rubꞌiꞌ ri Cristo? Na jintaj, 13 ma e ri Dios ri kaqꞌataw tzij pakiwi rike. Ekꞌu laꞌ la jun aj mak kꞌo piglesia, chesaj bꞌi chixoꞌlibꞌal alaq.