1 Ralaq alaq walkꞌoꞌal chupa rubꞌiꞌ ri Dios, kantzꞌibꞌaj kꞌu pan waꞌ che alaq chaꞌ na kamakun ta alaq. Yey we kꞌo junoq che alaq kamakunik, chetaꞌmaj alaq kꞌo Jun kachꞌaw paqawiꞌ chwach ri Qaqaw, waꞌ e ri Qanimajawal Jesucristo, yey Rire lik jusukꞌ. 2 E Rire ri xuya ribꞌ xkam paqakꞌaxel re tojbꞌal ri qamak. Y na xew ta re tojbꞌal ri qamak riꞌoj, ma re tojbꞌal ri kimak konoje ri e kꞌo che ruwachulew.

3 We kaqaꞌan ri taqanik kuya ri Dios chiqe, kaqꞌalajin kꞌu riꞌ paqatzij wi qetaꞌam uwach Rire. 4 We kꞌo kabꞌiꞌn re: «Riꞌin wetaꞌam uwach ri Dios» yey na kuꞌan ta janipa ri taqanik kuya ri Dios che, riꞌ xa aj raqꞌul y na jinta ri Qꞌijsaq rukꞌ. 5 Noꞌj ri kutaqej ri kubꞌiꞌij ri Dios, riꞌ kaqꞌalajinik paqatzij wi lik kꞌax kunaꞌ ri Dios. We jekꞌulaꞌ kaqaꞌan riꞌoj, qꞌalaj kꞌu riꞌ paqatzij wi xa jun qaꞌanom rukꞌ Rire. 6 We kꞌo junoq kubꞌiꞌij xa jun uꞌanom rukꞌ ri Dios, chirajawaxik kꞌu riꞌ chuꞌana che rubꞌinik jelaꞌ pachaꞌ rubꞌinik ri Qanimajawal Jesucristo.

7 Hermanos, na kantzꞌibꞌaj ta jun kꞌakꞌ tzijpixabꞌ*Wa tzijpixabꞌ e ri kꞌax kaqanaꞌ qibꞌ chiqawach rukꞌ ri saqil rutzil kꞌuꞌxaj xukꞌut ri Jesús. Jn. 13:34 che alaq, ma e kantzꞌibꞌaj chwi ri xex chi kꞌo ukꞌ alaq chwi ri petinaq loq. Wa ojer tzijpixabꞌ e ri xex chi tom wi lo alaq. 8 Na rukꞌ ta kꞌu riꞌ, e pachaꞌ kꞌakꞌ wa kantzꞌibꞌaj che alaq, ma waꞌ lik xqꞌalajin che rubꞌinik ri Jesús yey kaqꞌalajin kꞌu che ri bꞌinik silabꞌik ralaq, ma ri qꞌequꞌmalil katajin upakatajik y ri saqil Qꞌijsaq kawon chik.

9 We kꞌo junoq kubꞌiꞌij kꞌo chupa ri Qꞌijsaq yey tzel karil ri ratz-uchaqꞌ, riꞌ kꞌa kꞌo pa qꞌequꞌmalil. 10 Noꞌj we junoq kꞌax kunaꞌ ri ratz-uchaqꞌ, riꞌ kꞌo chupa ri Qꞌijsaq y na jinta kꞌo kaminow re pa mak. 11 Pero ri tzel karil ri ratz-uchaqꞌ, riꞌ kꞌa kꞌo pa qꞌequꞌmalil y kabꞌin kꞌu chupa waꞌ. Ruma laꞌ, na retaꞌam taj pachawi keꞌek wi, ma ruma kꞌo chupa ri qꞌequꞌmalil e junam rukꞌ pachaꞌ potzꞌ.

15 Meꞌek kꞌuꞌx alaq rukꞌ ri kꞌo che ruwachulew rukꞌ taq ri xa re ruwachulew. Ma we kꞌo junoq e keꞌek ukꞌuꞌx rukꞌ taq waꞌ, riꞌ na kꞌax ta kunaꞌ ri Qaqaw. 16 Ma e ronoje ri na utz taj kꞌo che ruwachulew, na rukꞌ ta ri Dios petinaq wi, xa e re ruwachulew. Yey waꞌ e taq ri rayinik re ri qatiꞌjil, ri rayinik re kaqaꞌan qeꞌoj che janipa ri kaqilo y ri rayinik re yakbꞌal qaqꞌij. 17 Ekꞌu ruwachulew xa kakꞌisik junam rukꞌ ronoje ri rayinik na utz taj kꞌo chwach; noꞌj kꞌu ri kaꞌanaw janipa ri karaj ri Dios, riꞌ na jinta utaqexik rukꞌaslemal.

18 Alaq walkꞌoꞌal chupa rubꞌiꞌ ri Dios, oj kꞌo chi che rukꞌisbꞌal qꞌij. Qetaꞌam chi waꞌ, ma tom chi alaq e kakꞌun lo ri jun kayaktaj chirij ri Cristo, ri kabꞌiꞌx “anticristo”*2 Ts. 2:3-4 che. Yey woꞌora lik e kꞌi chi ri eyaktajinaq chirij ri Cristo. 19 Rike tobꞌ xkimol kibꞌ junam qukꞌ riꞌoj, na junam ta kikꞌuꞌx qukꞌ riꞌoj. Ma we ta e riꞌ, xekanaj ta kan qukꞌ. Pero xebꞌel kꞌu bꞌi chiqaxoꞌl riꞌoj, y rukꞌ waꞌ kaqꞌalajinik na jinta junoq chike rike e qukꞌil riꞌoj.

20 Ekꞌu ralaq na alaq ta jelaꞌ pachaꞌ rike, ma yaꞌtal che ralaq ri Ruxlabꞌixel ri Jun lik nim uqꞌij Santo y ruma kꞌu waꞌ onoje alaq etaꞌam alaq ri Qꞌijsaq. 21 Kantzꞌibꞌaj pan waꞌ che alaq, na e ta ruma na etaꞌam ta alaq ri Qꞌijsaq re ri Dios, ma e ruma ne ri etaꞌam alaq waꞌ yey etaꞌam chi kꞌu alaq na jinta juna raqꞌubꞌal noꞌjital lo che ri Qꞌijsaq.

22 ¿China taq ri lik e aj raqꞌul? E taq ri kakibꞌiꞌij: «Ri Jesús na e ta Ruchaꞌoꞌn lo ri Dios.» Ekꞌu taq ri kakibꞌiꞌij waꞌ, na xew ta eyaktajinaq chirij Rukꞌajol ri Dios, ma jenelaꞌ eyaktajinaq chirij ri Qaqaw Dios. 23 E junoq kubꞌiꞌij: «Ri Jesús na e ta Ukꞌajol ri Dios,» riꞌ na jinta ri Qaqaw Dios rukꞌ. Noꞌj ri kuqꞌalajisaj: «Ri Jesús e Ukꞌajol ri Dios,» riꞌ kꞌo ri Qaqaw Dios rukꞌ.

24 Ekꞌu ri xex chi tom wi lo alaq puwi ri Cristo, e tikila riꞌ chupa ri animaꞌ alaq. Yey we e uꞌanom riꞌ, kꞌo chi alaq puqꞌabꞌ ri Qaqaw Dios y puqꞌabꞌ Rukꞌajol. 25 Ekꞌu bꞌiꞌtisinik waꞌ uꞌanom kan ri Qanimajawal Jesucristo: E ri kuya ri kꞌaslemal na jinta utaqexik chiqe.

26 Kantzꞌibꞌaj kꞌu pan waꞌ che alaq, ma e kꞌo ri kakaj kakisok alaq. 27 Noꞌj ralaq kꞌo chi pa animaꞌ alaq ri Uxlabꞌixel yaꞌtal che alaq ruma ri Qanimajawal Jesucristo. E uwariꞌche na kajawax taj kakꞌun lo junoq rukꞌ kꞌutunik lik junwi chwa ri qꞌalajisam chi che alaq, ma ri Ruxlabꞌixel ri Dios e kakꞌutuw che alaq ronoje ri Qꞌijsaq re ri Dios. Y janipa ri kukꞌut Rire, lik qatzij, na raqꞌubꞌal taj. Ruma kꞌu riꞌ, tikila alaq chi utz chupa ri majom alaq che ri Ruxlabꞌixel ri Dios. 28 Ekꞌu woꞌora, ri alaq walkꞌoꞌal chupa rubꞌiꞌ ri Dios, mesaj ibꞌ alaq puqꞌabꞌ ri Qanimajawal Jesucristo, chaꞌ rukꞌ kubꞌulibꞌal qakꞌuꞌx kaqoyꞌej Rire y na kojkꞌix ta chwach Rire echiriꞌ kaqꞌalajin uwach pa rukꞌunibꞌal. 29 Ralaq etaꞌam chi alaq waꞌ: Rire lik jusukꞌ. Chetaꞌmaj kꞌu alaq riꞌ: E janipa ri kakiꞌan ri lik jusukꞌ, ebꞌalaxinaq chi chupa rubꞌiꞌ Rire.