1 Ekꞌu rilal ixoq, e taqej la ri achijil la. ꞌAna kꞌu la waꞌ ma we rire na ukojom ta Ruchꞌaꞌtem ri Dios, tobꞌ na jinta kabꞌiꞌij la che chwi waꞌ, kꞌo pa saq kukojo ruma ri bꞌinik silabꞌik rilal 2 ma karilo lik ubꞌe ri kaꞌan la y lik lal nimay tzij. 3 Ruchomalil juna ixoq na e ta ruma ri wiqital che rucuerpo; e uwariꞌche na utz ta kꞌu riꞌ we kikꞌow uwiꞌ che uyijbꞌaxik ruwiꞌ, o kikꞌow uwiꞌ rukꞌ ri uwaaj y usansilo re oro o ri kꞌul lik kꞌi rajil kukojo. 4 Ma ruchomalil rixoq e ri kꞌo chupa ri ranimaꞌ; waꞌ e ri lik utz ukꞌuꞌx y na aj ta tzukul chꞌaꞌoj. Yey waꞌ wa uchomalil na kasach ta kꞌana uwach y lik kꞌo uqꞌij chwach ri Dios. 5 Rojertan jelaꞌ xkiꞌan rixoqibꞌ e jusukꞌ, ri lik xkubꞌiꞌ kikꞌuꞌx rukꞌ ri Dios. Ma ri kichomalil rike xilitaj che ri kibꞌinik kisilabꞌik ruma xekitaqej ri kachijil. 6 Jelaꞌ xuꞌan ri Sara, e lik xukoj utzij ri Abraham y ruchꞌaꞌbꞌexik xuꞌano e “lal wajawal”. Ekꞌu ralaq kuꞌana alaq ralkꞌoꞌal ri Sara we kaꞌan alaq ri utz y na jinta kꞌo kuxiꞌij ribꞌ kꞌuꞌx alaq che.

7 Ekꞌu rilal achi, jeqela la rukꞌ ri ixoqil la rukꞌ saqil naꞌoj. ꞌAna la che janipa ri taqal che rire. Kꞌuna kꞌu chikꞌuꞌx la e rire lik na jinta ko ukowil yey junam uwach ukꞌ la, ma junam kakꞌul alaq ri unimal rutzil ukꞌuꞌx ri Dios che ri kꞌaslemal alaq. We kaꞌan kꞌu la waꞌ, echiriꞌ kaꞌan la orar, na jinta kalatzꞌan re ri chꞌaꞌtem la chwach ri Dios.

8 Kꞌisbꞌal kꞌu re waꞌ, e chuꞌana xa jun kꞌuꞌx alaq, kꞌola kꞌaxnaꞌbꞌal kꞌuꞌxaj ukꞌ alaq, lik kꞌax naꞌa ibꞌ alaq chiwach alaq ma chaqꞌ ibꞌ alaq chwach ri Qaqaw, kꞌutu kꞌu alaq ri rutzil kꞌuꞌx alaq y ꞌana alaq chꞌutiꞌn che ibꞌ alaq. 9 Matzelej alaq uwach ri na utz taj kaꞌan che alaq. We kꞌo junoq kubꞌiꞌij itzelilaj chꞌaꞌtem che alaq, matzelej alaq uwach rukꞌ itzelilaj chꞌaꞌtem; ri ꞌana alaq e tzꞌonoj alaq ri utz puwi ri kaꞌanaw re waꞌ. Yey we kaꞌan alaq waꞌ, ri Dios kuya na ri utz pawiꞌ alaq, ma ruma waꞌ xusikꞌij alaq. 10 Ma jewaꞌ tzꞌibꞌital kan pa Ruchꞌaꞌtem ri Dios:

13 ¿China kꞌu ri kaꞌanaw ri na utz taj che alaq we e lik yaꞌom ibꞌ alaq che uꞌanik ri utz?*Ro. 8:31 14 Pero we katij alaq kꞌax ruma kaꞌan alaq ri lik jusukꞌ, riꞌ lik nim qꞌij alaxik alaq. E uwariꞌche, maxiꞌij ibꞌ alaq che ri xibꞌibꞌal pa alaq kaꞌanik yey masach kꞌuꞌx alaq che waꞌ. 15 Ri ꞌana alaq e loqꞌoj alaq uqꞌij ri Cristo chupa ri animaꞌ alaq, ma Rire e Qajawal. Xaqi yijbꞌaꞌ ibꞌ alaq che ukꞌulik uwach taq ri tzꞌonobꞌal kaꞌan che alaq puwi ri kubꞌul pan kꞌuꞌx alaq che; yey ꞌana alaq waꞌ rukꞌ uchꞌutiꞌnal kꞌuꞌx alaq y xiꞌin ibꞌ alaq chwach ri Dios. 16 Bꞌina alaq chi jusukꞌ chaꞌ jelaꞌ kunaꞌ kꞌuꞌx alaq na jinta mak ꞌanom alaq. ꞌAna kꞌu alaq waꞌ chaꞌ e janipa ri kechꞌaꞌt chirij ri chomilaj bꞌinik alaq rukꞌ ri Cristo, kayaꞌtaj kikꞌix ruma ri raqꞌubꞌal kakiꞌan chiꞌij alaq. 17 Ma we e karaj riꞌ ri Dios katij alaq kꞌax ruma kaꞌan alaq ri utz, waꞌ e más utz chwa ri katij alaq kꞌax ruma kaꞌan alaq ri na utz taj. 18 Kꞌuna chikꞌuꞌx alaq, ri Cristo lik xutij kꞌax echiriꞌ xa jumul xkam ruma ri qamak. Tobꞌ Rire na jinta umak, xkam quma riꞌoj oj aj makibꞌ chaꞌ jelaꞌ kojukꞌam bꞌi rukꞌ ri Dios. Echiriꞌ ri Cristo xkamisax kuma ri winaq, paqatzij wi xkam rucuerpo; pero Rire xkꞌastajik, ma na xkam ta ri ranimaꞌ. 19 Jekꞌulaꞌ xeꞌek pa ekꞌowi ri ekaminaq, waꞌ e ri tzꞌapim kichiꞌ, y xuꞌtzijoj chike janipa ri xuꞌano. 20 Yey xtataj waꞌ kuma ri na xkikoj ta utzij ri Dios ojertan chupa ruqꞌijol ri Noé. Ma ri Dios rukꞌ unimal ukꞌuꞌx xeroyꞌej kakitzelej kitzij chupa taq laꞌ la qꞌij echiriꞌ ri Noé katajin che uꞌanik ri nimalaj barco. Yey chupa kꞌu ri barco xa e ajilam ri xebꞌok bꞌi, ma e wajxaqibꞌ ri xekolobꞌetaj che runimal jabꞌ. 21 Y waꞌ e pachaꞌ ri bautismo kaqakꞌul riꞌoj waqꞌij ora re kolobꞌetajik. Wa bautismo na re ta karesaj ri chꞌul kꞌo che ri qacuerpo, ma e re karesaj ri mak kꞌo pa qanimaꞌ y ruma kꞌu waꞌ kaqajikibꞌaꞌ chwach ri Dios kojkꞌojiꞌ chi jusukꞌ. Yey qetaꞌam lik jikibꞌam uwach ri qakolobꞌetajik ruma rukꞌastajibꞌal ri Qanimajawal Jesucristo, 22 ri xeꞌek chilaꞌ chikaj y tzꞌul puwikiqꞌabꞌ ri Dios. Konoje kꞌu ri ángeles, kukꞌ taq ri kꞌo kiwach y ri kꞌo kichuqꞌabꞌ e kꞌo chuxeꞌ rutaqanik Rire.