1 Ekꞌu woꞌora na jinta chi qꞌatbꞌal tzij re kamik pakiwi janipa ri e kꞌo puqꞌabꞌ ri Qanimajawal Jesucristo; waꞌ e ri na kitaqem ta chi ri rayibꞌal re ri na utz taj, ma e kitaqem saꞌ ri karaj ri Ruxlabꞌixel ri Dios chike. 2 Ma ri Ruxlabꞌixel ri Dios kuya chomilaj kꞌaslemal ruma ri Qanimajawal Jesucristo, y e rutaqanik ri Ruxlabꞌixel ri Dios pa qanimaꞌ ri xojesan lo chupa ruchuqꞌabꞌ ri mak y ri kamik. 3 Yey rutaqanik ri Tzij Pixabꞌ na jinta uchuqꞌabꞌ re kojresaj lo puqꞌabꞌ ri mak, ma riꞌoj oj tikawex na jinta qakowil chwa ri mak. Ekꞌu ri na xuchꞌij ta uꞌanik ri Tzij Pixabꞌ, ri Dios xuꞌano echiriꞌ xutaq lo Rukꞌajol che ruwachulew tojbꞌal re ri qamak, y xuꞌan tikawex che jelaꞌ pachaꞌ riꞌoj, noꞌj Rire na xmakun taj. Jekꞌulaꞌ, ruma rukamik jun tikawex, waꞌ e ri Jesús, ri Dios xuqꞌat tzij puwi ri qamak. 4 Xuꞌan kꞌu waꞌ chaꞌ utz kojbꞌin jusukꞌ chwach ri Dios jelaꞌ pachaꞌ ri kubꞌiꞌij ri Tzij Pixabꞌ; ma riꞌoj na e ta chi qataqem ri rayibꞌal re ri na utz taj, e qataqem saꞌ ri karaj ri Ruxlabꞌixel ri Dios chiqe. 5 Ma e taq ri kiyaꞌom kibꞌ che taq ri rayibꞌal re ri kitiꞌjil, e kakiya kinaꞌoj puwi ri rayibꞌal na chom taj. Noꞌj janipa ri kiyaꞌom kibꞌ puqꞌabꞌ ri Ruxlabꞌixel ri Dios, riꞌ e kiyaꞌom kinaꞌoj puwi janipa ri karaj ri Ruxlabꞌixel ri Dios. 6 Ma we e lik kaqaya qanaꞌoj puwi taq ri rayibꞌal re ri qatiꞌjil, riꞌ kamik ri kukꞌam lo chiqe. Noꞌj we e lik kaqaya qanaꞌoj puwi janipa ri karaj ri Ruxlabꞌixel ri Dios chiqe, riꞌ kukꞌam lo kꞌaslemal y utzil chomal chiqe. 7 E janipa ri kiyaꞌom kinaꞌoj xew puwi taq ri rayibꞌal re ri kitiꞌjil, riꞌ e aj retzelal kꞌuꞌx chirij ri Dios. Ma rike na kakaj taj kakiya kibꞌ che uꞌanik ri Tzij Pixabꞌ re ri Dios, yey na kakichꞌij tane uꞌanik waꞌ. 8 Ekꞌu ri Dios lik na kukꞌul ta ukꞌuꞌx ri kibꞌinik kisilabꞌik janipa ri kiyaꞌom kibꞌ chupa ri rayibꞌal re ri na utz taj.

9 Noꞌj ralaq na yaꞌom ta chi ibꞌ alaq chupa waꞌ wa rayibꞌal, ma e yaꞌom ibꞌ alaq puqꞌabꞌ ri Ruxlabꞌixel ri Dios, we paqatzij wi kꞌo Rire pa animaꞌ alaq. Yey we kꞌo kꞌu junoq na jinta ri Ruxlabꞌixel ri Cristo pa ranimaꞌ, waꞌ wa tikawex na re ta ri Cristo. 10 Noꞌj we kꞌo ri Cristo pa animaꞌ alaq, riꞌ kꞌo chomilaj kꞌaslemal alaq ruma ri uꞌanom alaq jusukꞌ chwach ri Dios, tobꞌ ri cuerpo alaq kakam na ruma ri mak. 11 We kꞌo kꞌu pa animaꞌ alaq ri Ruxlabꞌixel ri Jun xukꞌastajisaj lo ri Qanimajawal Jesucristo chikixoꞌl ri ekaminaq, riꞌ kꞌo jun qꞌij Rire kuya jun kꞌakꞌ kꞌaslemal che ri cuerpo alaq yey kuꞌan waꞌ ruma ri Ruxlabꞌixel kꞌo pa animaꞌ alaq.

12 Ruma kꞌu laꞌ, hermanos, chirajawaxik e kaqaꞌan ri utz y maqaꞌan ri na utz taj, ma riꞌoj na oj jinta chi puqꞌabꞌ taq ri rayibꞌal re ri qatiꞌjil. 13 Ma we yaꞌom ibꞌ alaq chupa waꞌ, riꞌ e kukꞌam lo ri kamik pawiꞌ alaq. Noꞌj we rukꞌ rutoꞌbꞌal ri Ruxlabꞌixel ri Dios kakamisaj alaq taq ri rayibꞌal re ri tiꞌjil alaq, riꞌ kꞌo kꞌaslemal alaq chwach ri Dios. 14 Ma konoje ri kakꞌam kiwach ruma ri Ruxlabꞌixel ri Dios, riꞌ e ralkꞌoꞌal ri Dios. 15 Yey ri Ruxlabꞌixel ri Dios xkꞌul alaq, na e ta kuya tanchi alaq chi xiꞌin ibꞌ; ma e kuꞌan ralkꞌoꞌal ri Dios che alaq, y jelaꞌ utz kaqabꞌiꞌij che ri Dios: «¡Tat, Lal Nuqaw!» 16 Ekꞌu ri Ruxlabꞌixel ri Dios ri kajikibꞌan uwach pa qanimaꞌ: Riꞌoj oj chi ralkꞌoꞌal ri Dios. 17 Yey ruma kꞌu oj ralkꞌoꞌal ri Dios, kaqakꞌul ri bꞌiꞌtisinik uꞌanom ri Dios chike ri ralkꞌoꞌal, yey kaqakꞌul kꞌu waꞌ junam rukꞌ ri Cristo. Pero lik chirajawaxik wi kaqatij na kꞌax woꞌora pachaꞌ ri xikꞌow wi Rire, chaꞌ jelaꞌ chiqawach apanoq, oj jun pa ri yakbꞌal uqꞌij Rire.

18 Yey chinuwach riꞌin ri kꞌaxkꞌobꞌik kaqatij riꞌoj woꞌora na kuꞌmaja ta kꞌenoq rukꞌ runimal uchomalil ri Dios, ri kaqꞌalajin qukꞌ chiqawach apanoq. 19 Ma e janipa taq ri ꞌanatal ruma ri Dios lik royeꞌem chik jampalaꞌ kaqꞌalajin kiwach ri e ralkꞌoꞌal ri Dios. 20 Ma ri qꞌatbꞌal tzij xuꞌan ri Dios pakiwi ri tikawex, xtzaq ne puwi taq ri ꞌanatal ruma ri Dios. Y ruma kꞌu riꞌ, na e ta chi uꞌanom pachaꞌ ri uchꞌobꞌom lo ri Dios che ri jeqebꞌal loq. E taq kꞌu ri ꞌanatal ruma ri Dios na xraj taj kayaꞌiꞌ chuxeꞌ wa qꞌatbꞌal tzij; na rukꞌ ta kꞌu riꞌ, e ri Dios xuya chuxeꞌ waꞌ. Pero e janipa taq ri ꞌanatal ruma ri Dios, kꞌa royeꞌem ri qꞌij echiriꞌ ri Dios kuyijbꞌaꞌ na ronoje waꞌ. 21 Ma kopon na jun qꞌij e janipa taq ri ꞌanatal ruma ri Dios, e laꞌ junam kukꞌ ri e ralkꞌoꞌal ri Dios, kebꞌesax na lo chupa ri kꞌaxkꞌobꞌik y puqꞌabꞌ ri kamik yey kayaꞌiꞌ kꞌu unimal chomalil chike.

22 Qetaꞌam kꞌut, e janipa ri ꞌanatal ruma ri Dios, e pachaꞌ kajilow pa kꞌaxkꞌobꞌik, jelaꞌ pachaꞌ kuꞌan juna ixoq echiriꞌ kutzir uwach rukꞌ uchꞌutiꞌn.*Jn. 16:21 23 Y na xew ta kꞌo pa kꞌax janipa ri ꞌanatal ruma ri Dios, ma jelaꞌ koj-jilow pa kꞌax qonoje riꞌoj, ri yaꞌtal chi chiqe ri nabꞌe sipanik ubꞌiꞌtisim ri Dios, waꞌ e ri Ruxlabꞌixel ri Dios pa qanimaꞌ. Yey lik kꞌa kꞌo ne ri qoyeꞌem. E lik kaqarayij kopon ri qꞌij echiriꞌ ri Dios kuqꞌalajisaj qawach oj ralkꞌoꞌal Rire y karesaj kꞌu ri qacuerpo puqꞌabꞌ ri kꞌax y ri kamik. 24 Ma echiriꞌ xojkolobꞌetajik, xujeq kakubꞌiꞌ pana qakꞌuꞌx che kaqakꞌul na ri bꞌiꞌtisim lo chiqe ruma ri Dios y kꞌa qoyeꞌem waꞌ. Yey we kaqabꞌiꞌij kꞌo qoyeꞌem, e keꞌelawi riꞌ kꞌamajaꞌ kaqakꞌul ri qoyeꞌem. Ma we jun ukꞌulum chi ri royeꞌem, ¿suꞌchak kꞌu riꞌ kꞌa karoyꞌej? 25 Noꞌj we riꞌoj kaqoyꞌej na ri kꞌamajaꞌ kaqilo, lik chirajawaxik kꞌu riꞌ kaqachuqꞌubꞌej qibꞌ che royꞌexik waꞌ rukꞌ kubꞌulibꞌal qakꞌuꞌx.

26 Jekꞌulaꞌ, ri Ruxlabꞌixel ri Dios kojutoꞌo echiriꞌ na jinta qakowil, ma riꞌoj na kaqariq ta utzꞌonoxik saꞌ ri kajawax che ri qakꞌaslem; pero Rire lik kachꞌaw paqawiꞌ chwach ri Dios rukꞌ jilowem na kariqitaj ta kꞌana ubꞌiꞌxikil. 27 Ekꞌu ri Dios, ri karil ronoje ri kꞌo pa qanimaꞌ, Rire lik kumaj usukꞌ saꞌ ri karaj ri Ruxlabꞌixel, ma ri Ruxlabꞌixel kachꞌaw paqawiꞌ e chirij ri karaj ri Dios chiqe riꞌoj ri oj re ri Dios.

28 Qetaꞌam kꞌut, janipa ri kꞌax kenaꞌw re ri Dios, e taq ronoje ri kebꞌikꞌow chupa katoꞌbꞌik chaꞌ kꞌo kutiqoj chike, waꞌ e chike janipa ri esikꞌim ruma ri Dios re kakiꞌan ri karaj Rire. 29 Ma ri Dios ojertan lo riꞌ xuchꞌobꞌo e kꞌo ri kebꞌuchaꞌo re kebꞌuꞌana pachaꞌ Rukꞌajol, chaꞌ e Rire ri nabꞌe chikixoꞌl rukꞌiyal e ralkꞌoꞌal ri Dios. 30 Yey taq waꞌ wa kꞌo uchꞌobꞌom lo pakiwiꞌ, xebꞌusikꞌij kꞌu riꞌ. Ekꞌu wa xebꞌusikꞌij, xuꞌan jusukꞌ chike. Yey ri xuꞌan jusukꞌ chike, e xutakꞌabꞌaꞌ uwa kiqꞌij.

31 ¿Saꞌ kꞌu riꞌ ri kaqabꞌiꞌij che waꞌ? We ri Dios kꞌo qukꞌ, ¿china ri kꞌo puqꞌabꞌ kuyak ribꞌ chiqij? ¡Na jinta junoq! 32 Yey ri Dios na xuxuꞌyaj tane Rukꞌajol chiqe, ma xuya loq chaꞌ koꞌlkam che ruwachulew quma qonoje ri oj aj mak. ¿Na kuya ta kami riꞌ chiqe junam rukꞌ Rukꞌajol, ronoje ri kajawax chiqe? ¡Kuyaꞌo! 33 ¿China ri kꞌo puqꞌabꞌ kukoj kimak ri ebꞌuchaꞌom ri Dios? ¡Na jinta junoq! Ma ri Dios e kaꞌanaw jusukꞌ chike. 34 ¿China ri kꞌo puqꞌabꞌ kuqꞌat tzij paqawiꞌ? ¡Na jinta junoq! Ma ri Cristo kachꞌaw paqawiꞌ chwach ri Dios, yey e Rire ri xkam quma riꞌoj. Y na xew ta waꞌ, ma xkꞌastaj lo chikixoꞌl ri ekaminaq y woꞌora tzꞌul puwikiqꞌabꞌ ri Dios.

35 ¿Kꞌo nebꞌa kesan qeꞌoj chupa ri rutzil ukꞌuꞌx ri Cristo? ¡Na jintaj! Ma tobꞌ kape kꞌaxkꞌobꞌik o paxibꞌal kꞌuꞌx paqawiꞌ, tobꞌ kojternabꞌex rukꞌ kꞌax, tobꞌ na jinta qawa y na jinta qaqꞌuꞌ, tobꞌ katewun kꞌax paqawiꞌ o kojkamisax rukꞌ espada, ¡na jinta kꞌo kojesan chupa! 36 Ma jewaꞌ ri tzꞌibꞌital kan pa Ruchꞌaꞌtem ri Dios:

38 Ruma kꞌu laꞌ, riꞌin lik nujikibꞌam uwach na jinta kꞌana kojesan chirij ri rutzil ukꞌuꞌx ri Dios. Na kojresaj taj tobꞌ ne e ri kamik o ri kꞌaslemal, tobꞌ ne e ri ángeles, ri kꞌo kiwach y ri kꞌo kichuqꞌabꞌ. Na kojresaj taj tobꞌ ne e ri kojtajin che ukꞌulumaxik woꞌora o ri kaqakꞌulumaj chiqawach apanoq, 39 tobꞌ ne e ri e kꞌo lo kꞌa che ruwa kaj o ri e kꞌo lo kꞌa chuxeꞌ rulew. Na jinta kꞌu kꞌo ꞌanatal ruma ri Dios kojesan chirij ri rutzil ukꞌuꞌx, ri xqakꞌul ruma ri Cristo Jesús, ri Qanimajawal.