1 Kinchꞌaꞌt ukꞌ alaq hermanos, ri kꞌo naꞌoj alaq puwi taqanik. Etaꞌam kꞌu alaq waꞌ: Ri taqanik xew kꞌo uchuqꞌabꞌ puwi juna tikawex echiriꞌ wa tikawex kꞌa kꞌaslik. 2 E pachaꞌ juna ixoq kꞌulanik. Rire kꞌo chuxeꞌ ri tzij re ri kꞌulanikil. Ruma kꞌu waꞌ kꞌo puqꞌabꞌ ri rachijil xaloqꞌ kꞌa kꞌas ri rachijil. Noꞌj we xkam rachi, rixoq na jinta chi puqꞌabꞌ ri rachijil. 3 Jekꞌulaꞌ riꞌ, we rixoq kuyoj ribꞌ rukꞌ jun chik achi yey kꞌa kꞌas ri rachijil, riꞌ kabꞌiꞌx che e jun ixoq na jusukꞌ ta rubꞌinik ma kamakun chirij ri tzij re ri kꞌulanikil. Noꞌj we xkam ri rachijil, rixoq kel chuxeꞌ rutaqanik wa tzij; na kamakun ta kꞌu riꞌ chirij ri kꞌulanikil we kakꞌuliꞌ rukꞌ jun chik achi.

4 Jekꞌulaꞌ ralaq alaq nu hermanos, kaminaq chi alaq chwach taq ri Tzij Pixabꞌ ruma rukamik ri Cristo. Waꞌ keꞌelawi na e ta chi ri Tzij Pixabꞌ ri kataqan pawiꞌ alaq. Ruma kꞌu riꞌ, utz kuꞌan alaq re jun chik, waꞌ e ri Cristo, ri xkꞌastaj lo chikixoꞌl ri ekaminaq. Jekꞌulaꞌ ri qabꞌinik lik kꞌo kutiqoj chwach ri Dios ruma oj kꞌo puqꞌabꞌ ri Cristo. 5 Ma ojertan echiriꞌ kꞌa oj kꞌo pa mak, ri rayinik na utz ta uwach xkꞌojiꞌ uchuqꞌabꞌ puwi ri qacuerpo. Ma echiriꞌ ri Tzij Pixabꞌ xuqꞌalajisaj chiqe saꞌ ri na utz taj, e más xqarayij kaqaꞌan ri na utz taj. Yey ri xutiqoj waꞌ chiqe e xojukꞌam bꞌi pa kamik. 6 Noꞌj woꞌora na oj jinta chi chuxeꞌ ri qꞌatbꞌal tzij re wa tzij, ma pachaꞌ oj chi kaminaq che ri kꞌo paqawiꞌ ojertan. Ekꞌu woꞌora riꞌoj kaqaloqꞌnimaj ri Dios rukꞌ jun kꞌakꞌ qabꞌinik ruma ruchuqꞌabꞌ ri Ruxlabꞌixel pa qanimaꞌ, yey waꞌ na e ta chi pachaꞌ ri qabꞌinik ojertan echiriꞌ xqaj kaqaꞌan jusukꞌ che qibꞌ chwach ri Dios ruma ri kaqataqej taqanik.

7 ¿Saꞌ kꞌu riꞌ ri kaqabꞌiꞌij? ¿E nebꞌa keꞌeloq ri Tzij Pixabꞌ na utz taj ma kukꞌam lo ri mak? ¡Na e ta kꞌana riꞌ! Ma riꞌin xinwetaꞌmaj saꞌ ri mak ruma ri Tzij Pixabꞌ; yey we tamaji ri Tzij Pixabꞌ, na kanwetaꞌmaj ta kꞌu riꞌ saꞌ ri mak. Ma riꞌin na wetaꞌam taj we mak ri rayinik we tamaji ri Tzij Pixabꞌ kubꞌiꞌij: «Marayij uwach ri na awe taj.»*Éx. 20:17 8 Ruma kꞌu riꞌ ri taqanik, ri mak kukꞌosoj ronoje itzel rayinik chupa ri wanimaꞌ. We tamaji kꞌu ri taqanik, ri mak na jinta uchuqꞌabꞌ panuwiꞌ. 9 E ri petinaq loq echiriꞌ riꞌin kꞌamajaꞌ kanmaj usukꞌ ri Tzij Pixabꞌ, na jinta kꞌo kubꞌisoj nukꞌuꞌx che. Pero xopon jun qꞌij echiriꞌ xinwetaꞌmaj saꞌ ri taqanik re ri Tzij Pixabꞌ panuwiꞌ. Kꞌa chiriꞌ kꞌu riꞌ xumaj uchuqꞌabꞌ ri mak panuwiꞌ; y xinmaj kꞌu usukꞌ in kaminaq chwach ri Dios ruma ri numak. 10 E chinuwach riꞌin, ri taqanik re ri Tzij Pixabꞌ e kayaꞌw kꞌaslemal; noꞌj ri xuya chwe riꞌin, e ri kamik. 11 Ma ri mak e xuchapabꞌej ri taqanik y rukꞌ kꞌu waꞌ, xinusoko y jelaꞌ xukꞌam lo ri kamik panuwiꞌ. 12 Kaqꞌalajin kꞌu riꞌ ri Tzij Pixabꞌ re ri Dios lik santo yey taq ri taqanik re ri Tzij Pixabꞌ lik santo, lik jusukꞌ y lik utz.

13 Pero ¿e nawi keꞌeloq e ri utz xukꞌam lo kamik panuwiꞌ? ¡Na e ta riꞌ! Ma ri mak e xuchapabꞌej ri utz y rukꞌ waꞌ xukꞌam lo kamik panuwiꞌ. Ruma kꞌu riꞌ ri taqanik re ri Tzij Pixabꞌ, xa jumul kaqꞌalajinik lik itzel uwach ri mak.

14 Qetaꞌam chi kꞌut, ri Tzij Pixabꞌ petinaq rukꞌ ri Dios. Noꞌj riꞌin xa weqam wulewal nupoqlajil, yey in yaꞌtal kꞌu puqꞌabꞌ ri mak. 15 Na kanꞌan ta kꞌu riꞌ ri kuaj riꞌin kanꞌano; ma e ri tzel kanwilo, e kanꞌan riꞌ. Lik na kanmaj ta kꞌu usukꞌ suꞌbꞌe kanꞌan waꞌ. 16 Yey echiriꞌ e kanꞌan ri na kuaj taj, kannaꞌ kꞌu riꞌ chinukꞌuꞌx na utz ta ri kintajin che uꞌanik. Rukꞌ kꞌu riꞌ waꞌ kanjikibꞌaꞌ uwach lik utz ri taqanik re ri Tzij Pixabꞌ. 17 Jelaꞌ kꞌu riꞌ e pachaꞌ na in ta ri kinꞌanaw re ri na utz taj, ma e kataqan ri mak pa wanimaꞌ. 18 Riꞌin lik wetaꞌam, wa in tikawex na jinta kꞌana utz chwe we na jinta ri Dios wukꞌ. Ma tobꞌ kuaj kanꞌan ri utz, pero nutukel na kanriq ta uꞌanik waꞌ. 19 Ma na kanꞌan ta ri utz, ri lik kuaj kanꞌano; e lik kanꞌan ri na utz taj, ri na kuaj taj kanꞌano. 20 Jekꞌulaꞌ riꞌ, we e kanꞌan ri na kuaj taj, riꞌ na in ta ri kinꞌanaw re, ma e ri mak kataqan pa wanimaꞌ ri kaꞌanaw re. 21 Jekꞌulaꞌ tobꞌ lik kuaj kanꞌan ri utz, e ri na utz taj ri kataqan panuwiꞌ. 22 Na rukꞌ ta kꞌu riꞌ, kunaꞌ ri wanimaꞌ e lik chom rutaqanik Rutzij Upixabꞌ ri Dios y lik kinkiꞌkot che waꞌ. 23 Pero kannaꞌo kꞌo jun chik tzij kataqan chwi ri nucuerpo; waꞌ e ruchuqꞌabꞌ ri mak. Ekꞌu waꞌ kachꞌoꞌjinik chaꞌ na kankoj ta utzij ri kubꞌiꞌij ri nunaꞌoj y jekꞌulaꞌ inyututal pa mak. 24 ¡Lik toqꞌoꞌ nuwach riꞌin! ¿China kesan we riꞌin puqꞌabꞌ ri na utz taj kꞌo chwe, ri kinkꞌamaw bꞌi pa kamik? 25 Lik kantioxij che ri Dios, ma xew Rire katoꞌw weꞌin, yey kuꞌan waꞌ ruma ri Jesucristo, ri Qanimajawal. Jekꞌulaꞌ kanmaj usukꞌ lik chirajawaxik kanya wibꞌ puqꞌabꞌ rutaqanik Rutzij Upixabꞌ ri Dios; noꞌj echiriꞌ kanya wibꞌ puqꞌabꞌ ri rayinik re ri nucuerpo, riꞌ e kataqan ruchuqꞌabꞌ ri mak panuwiꞌ.