1 ¿Saꞌ kꞌu riꞌ ri kaqabꞌiꞌij riꞌoj? ¿Kꞌa kojkꞌojiꞌ kami riꞌ pa mak chaꞌ ri Dios e lik kunimarisaj ri unimal rutzil ukꞌuꞌx paqawiꞌ echiriꞌ kukuy ri qamak? 2 ¡Na e ta kꞌana riꞌ! Ma e janipa ri na oj jinta chi puqꞌabꞌ ri mak, na ubꞌe ta kꞌenoq we kꞌa kojkꞌojiꞌ chupa waꞌ. 3 ¿Na etaꞌam ta nebꞌa ralaq e janipa ri xqakꞌul ri bautismo, xojuꞌan xa jun rukꞌ ri Qanimajawal Jesucristo? Yey ruma waꞌ, xojuꞌan xa jun rukꞌ pa rukamik. 4 Ruma kꞌu ri bautismo xqakꞌulu, e pachaꞌ junam rukꞌ ri Cristo xojkamik y xojmuqik, chaꞌ jelaꞌ kojkꞌastaj lo che jun kꞌakꞌ qabꞌinik jelaꞌ pachaꞌ ri Cristo xkꞌastaj lo chikixoꞌl ri ekaminaq ruma runimal uchuqꞌabꞌ ri Qaqaw Dios. 5 Ma we xꞌan xa jun chiqe rukꞌ ri Cristo chupa rukamik, jekꞌulaꞌ riꞌ xa jun qaꞌanom rukꞌ chupa rukꞌastajibꞌal. 6 Lik kꞌut qetaꞌam e ri ojer qabꞌinik qasilabꞌik xkam rukꞌ ri Cristo chwa ri cruz chaꞌ jelaꞌ kasach uwach ruchuqꞌabꞌ ri mak paqawiꞌ y jekꞌulaꞌ ri mak na kataqan ta chi paqawiꞌ riꞌoj. 7 Ma e junoq kaminaq chi che ri mak, riꞌ na jinta chi uchuqꞌabꞌ ri mak puwiꞌ. 8 Ma we xojkam junam rukꞌ ri Cristo,*E pachaꞌ xojkam junam rukꞌ ri Cristo ma Rire xkam paqakꞌaxel riꞌoj. jekꞌulaꞌ riꞌ lik kaqakojo kꞌo qakꞌaslem rukꞌ Rire woꞌora y chiqawach apanoq. 9 Lik qetaꞌam kꞌut, ri Cristo ruma xkꞌastaj lo chikixoꞌl ri ekaminaq, na kakam ta chik, ma ri kamik na jinta chi uchuqꞌabꞌ puwi Rire. 10 Ma rukꞌ rukamik xa jumul xusachisaj uwach ruchuqꞌabꞌ ri mak; yey ruma kꞌu xkꞌastajik, e kuloqꞌnimaj ri Dios rukꞌ rukꞌaslemal. 11 Jekꞌuriꞌlaꞌ kꞌola chikꞌuꞌx ralaq e pachaꞌ alaq kaminaq chi chwach ri mak yey alaq kꞌaslik re kaloqꞌnimaj alaq ri Dios, ma alaq re ri Cristo Jesús, ri Qanimajawal. 12 E uwariꞌche lik maya alaq luwar kataqan ri mak puwi ri cuerpo alaq, ma waꞌ xa ikꞌowel. Maya ne ibꞌ alaq chupa taq ri rayibꞌal na utz ta uwach. 13 Maya ne ri cuerpo alaq puqꞌabꞌ ri mak che uꞌanik ri na jusukꞌ taj. E yaꞌa ibꞌ alaq puqꞌabꞌ ri Dios, ma alaq kaminaq chi chwa ri mak y alaq kꞌas che jun kꞌakꞌ bꞌinik silabꞌik. Yaꞌa kꞌu alaq riꞌ ri cuerpo alaq puqꞌabꞌ ri Dios chaꞌ rukꞌ waꞌ kaꞌan alaq ri lik jusukꞌ chwach. 14 Ma ri mak na jinta chi uchuqꞌabꞌ re kataqan pawiꞌ alaq y na jinta chi ne alaq chuxeꞌ ri qꞌatbꞌal tzij re rutaqanik ri Dios tzꞌibꞌital kan ruma ri Moisés, ma woꞌora kꞌo alaq puqꞌabꞌ ri Dios ruma ri unimal rutzil ukꞌuꞌx Rire.

15 ¿Saꞌ kꞌu riꞌ ri kaqaꞌano? ¿Kojmakun kami riꞌ ma ri qꞌatbꞌal tzij re rutaqanik ri Dios na jinta chi paqawiꞌ yey e oj kꞌo puqꞌabꞌ ri Dios ruma ri unimal rutzil ukꞌuꞌx Rire? ¡Na e ta kꞌana riꞌ! 16 ¿Na etaꞌam ta nebꞌa alaq we kaya ibꞌ alaq puqꞌabꞌ junoq che uꞌanik janipa ri karaj rire, riꞌ e kuꞌana patrón alaq y chirajawaxik kꞌu riꞌ kakoj alaq utzij? Jekꞌuriꞌlaꞌ we kaya ibꞌ alaq puqꞌabꞌ ri mak che uꞌanik ri na utz taj, riꞌ kukꞌam bꞌi alaq pa kamik. Noꞌj echiriꞌ kaya ibꞌ alaq puqꞌabꞌ ri Dios re kakoj alaq utzij, waꞌ kukꞌam bꞌi alaq che jun jusukꞌ bꞌinik silabꞌik.

17 Lik maltiox kꞌu che ri Dios, ma tobꞌ ojertan xyaꞌ ibꞌ alaq puqꞌabꞌ ri mak che uꞌanik taq ri rayibꞌal alaq; noꞌj woꞌora rukꞌ ronoje kꞌuꞌx alaq yaꞌom ibꞌ alaq che uꞌanik taq ri saqil kꞌutunik xyaꞌ che alaq. 18 Ruma kꞌu ri xel lo alaq puqꞌabꞌ ri mak, woꞌora e xyaꞌ ibꞌ alaq che uꞌanik ri lik jusukꞌ chwach ri Dios.

19 Xinya wa kꞌambꞌal naꞌoj puwi ri patrón y ri aj chakibꞌ chaꞌ kaqꞌalajin ri kambꞌiꞌij y na kꞌayew taj kamaj alaq usukꞌ. Kambꞌiꞌij kꞌu che alaq: Jelaꞌ pachaꞌ rojertan xya alaq ronoje ri uchapom wi ribꞌ ri cuerpo alaq che uꞌanik ri lik chꞌul y ri lik itzel uwach, jekꞌuriꞌlaꞌ woꞌora yaꞌa alaq ronoje ri uchapom wi ribꞌ ri cuerpo alaq che uꞌanik janipa ri lik chom y lik jusukꞌ chwach ri Dios. 20 Ma rojertan echiriꞌ kꞌa kꞌo alaq puqꞌabꞌ ri mak, na yaꞌom ta ibꞌ alaq che uꞌanik ri lik jusukꞌ chwach ri Dios. 21 ¿Saꞌ ri xutiqoj che alaq janipa ri na utz taj xꞌan alaq ojertan? Ma woꞌora kakꞌix ne alaq che taq waꞌ wa kukꞌam bꞌi jun pa kamik. 22 Ekꞌu woꞌora ruma alaq esam chi lo puqꞌabꞌ ri mak, xuꞌana kꞌu alaq aj chakibꞌ re ri Dios. Ri xutiqoj waꞌ che alaq e ri santowilaj bꞌinik silabꞌik alaq; yey kꞌisbꞌal kꞌu re, e ri kꞌaslemal na jinta utaqexik. 23 Ma ri tojbꞌal re ri mak e ri kamik, noꞌj ri sipanik kuya ri Dios e ri kꞌaslemal na jinta utaqexik ruma ri Qanimajawal Jesucristo.