4
Taq ri kakesaj kibꞌ chirij ri Qꞌijsaq
Ri Ruxlabꞌixel ri Dios uqꞌalajisam chi utz kopon na ruqꞌijol echiriꞌ e kꞌo jujun tikawex kakiya kan ri Qꞌijsaq re ri Dios chaꞌ kakitaqej kꞌutunik petinaq kukꞌ taq ri itzel uxlabꞌixel e sokosoꞌnel. Rike e kekitaqej ri winaq xa kebꞌ kipalaj y e aj raqꞌul, ri lik uꞌanom chi achꞌiꞌy ri kinaꞌoj. Waꞌ e ri kekitaq taq ri winaq chaꞌ na kekꞌuliꞌ taj y chaꞌ na kakitij ta jujun waꞌim tobꞌ waꞌ e ri Dios xuꞌano re katijik; ekꞌu riꞌoj, ri qetaꞌam y qakojom ri Qꞌijsaq, utz kaqakꞌul waꞌ rukꞌ tioxibꞌal. Ma ronoje ri ꞌanatal ruma ri Dios, lik chom; na utz ta kꞌu riꞌ we kaqakꞌaq bꞌi uqꞌij ri kuya ri Dios chiqe. Ri qaꞌanaꞌ e qakꞌulu rukꞌ tioxibꞌal. Ma Ruchꞌaꞌtem ri Dios kubꞌiꞌij ronoje ri kuya Rire chiqe lik chom;* Gn. 1:31; Mr. 7:19 yey echiriꞌ kaqatioxij waꞌ chwach ri Dios, kojuꞌan xa oj jun rukꞌ Rire che ubꞌiꞌxikil: Ronoje lik chom.
Jun utzilaj aj chak re ri Qanimajawal Jesucristo
We riꞌat kakꞌut chike rutinamit ri Dios wa kantzꞌibꞌaj pan chawe, riꞌ katuꞌana jun utzilaj aj chak re ri Qanimajawal Jesucristo; ma wa Utzilaj Tzij akojom y ri saqil kꞌutunik ataqem e kayaꞌw achuqꞌabꞌ chwach ri Dios. Matok kꞌu il che taq ri ojer tzijobꞌal na rukꞌ ta ri Dios petinaq wi, ma waꞌ xa noꞌjibꞌal ke winaq.* 1 Ti. 1:4 E chatijoj awibꞌ che jun saqil bꞌinik silabꞌik chwach ri Dios. Ma we kaqatij uqꞌij kakꞌojiꞌ uchuqꞌabꞌ ri qacuerpo, utz kꞌu riꞌ; pero waꞌ xa joqꞌotaj kojutoꞌo. Noꞌj we e kaqaya qibꞌ che jun saqil bꞌinik silabꞌik chwach ri Dios, waꞌ lik utz che ronoje, ma kꞌo kutiqoj che ri qakꞌaslemal waqꞌij ora y chiqawach apanoq. Wa kambꞌiꞌij lik qatzij y lik taqal che kakikoj konoje ri tikawex. 10 Ruma kꞌu waꞌ kojchakunik y kaqatij taq kꞌaxkꞌobꞌik, ma kubꞌul pan qakꞌuꞌx rukꞌ ri Dios kꞌaslik, ri kakolobꞌen ke taq ri tikawex che ruwachulew; y paqatzij wi, e kebꞌukolobꞌej konoje ri kakubꞌiꞌ kikꞌuꞌx rukꞌ ri Cristo. 11 Janipa kꞌu ri nubꞌiꞌim chawe, e chakꞌutu riꞌ chikiwach ri kikojom rubꞌiꞌ ri Cristo y chabꞌiꞌij chike e lik kakitaqej waꞌ.
12 Maya luwar che junoq kukꞌaq bꞌi aqꞌij ruma kꞌa at ala. E chakꞌutu ri lik ubꞌe chikiwach ri kikojom rubꞌiꞌ ri Cristo, yey chaꞌana waꞌ rukꞌ rachꞌaꞌtem, rukꞌ rabꞌinik asilabꞌik, rukꞌ ri rutzil akꞌuꞌx, rukꞌ ri kubꞌulibꞌal akꞌuꞌx y rukꞌ ri saqil anaꞌoj. 13 Xaloqꞌ kꞌu kꞌamajaꞌ kinoponik, e chayaꞌa awibꞌ che rajilaxik Ruchꞌaꞌtem ri Dios y che uꞌanik pixabꞌanik y kꞌutunik chikiwach riglesia. 14 Mawoqꞌotaj uyaꞌik ri yaꞌtal chawe ruma ri Dios, ri xqꞌalajisax pawiꞌ riꞌat echiriꞌ ri e aj wach re riglesia xkiya ri kiqꞌabꞌ pawiꞌ. 15 Chayaꞌa kꞌu awibꞌ che taq waꞌ: Chaꞌana janipa ri amajom chik chaꞌ jelaꞌ konoje kakilo jalan utz ri chak kat-tajin che uꞌanik. 16 Lik chachajij awibꞌ che rabꞌinik asilabꞌik y che ukꞌutik ri saqil kꞌutunik. Chachuqꞌubꞌej awibꞌ che uꞌanik taq waꞌ, ma jelaꞌ riꞌat y ri ketaw awe kixkolobꞌetaj che ri qꞌatbꞌal tzij re ri Dios.

*4:5 Gn. 1:31; Mr. 7:19

*4:7 1 Ti. 1:4