1 Echiriꞌ kaꞌan pixabꞌanik, mayaj juna achi nimalaj winaq chik; ri chaꞌana e chapixabꞌaj pachaꞌ chi aqaw; yey chebꞌapixabꞌaj ralabꞌo pachaꞌ chi e awatz o e achaqꞌ 2 y rixoqibꞌ e nimaq winaq pachaꞌ chi e achu. Yey rukꞌ saqil anaꞌoj chebꞌapixabꞌaj ralito pachaꞌ chi e awanabꞌ.

3 Taq rixoqibꞌ e malkaꞌnibꞌ, ri paqatzij wi na jinta katoꞌw ke, chirajawaxik wi ketoꞌ ruma rutinamit ri Dios. 4 Noꞌj we kꞌo juna ixoq malkaꞌn yey e kꞌo ralkꞌoꞌal o e kꞌo taq umam, riꞌ e rike ri lik chirajawaxik kekichajij chi utz ri kifamilia y kekitoꞌ ri kichu malkaꞌnibꞌ o ri katiꞌ malkaꞌnibꞌ, ma waꞌ e pachaꞌ rajil ukꞌaxel chike ri xekꞌiyisan ke, yey waꞌ e lik utz y e kukꞌul ukꞌuꞌx ri Dios. 5 Noꞌj chirajawaxik kꞌut e riglesia katoꞌw ke rixoqibꞌ e malkaꞌnibꞌ, ri paqatzij wi na jinta chi kifamilia y na jinta kꞌu junoq katoꞌw ke, yey waꞌ e taq ri lik kikubꞌam pan kikꞌuꞌx rukꞌ ri Dios y lik kiyaꞌom kibꞌ che uꞌanik orar chipaqꞌij chichaqꞌabꞌ. 6 Noꞌj e juna ixoq malkaꞌn we xew e keꞌek ukꞌuꞌx che uꞌanik ri karaj rire, riꞌ pachaꞌ kaminaq chi chwach ri Dios tobꞌ ne kꞌaslik, y na taqal ta kꞌu riꞌ che katoꞌik. 7 E chebꞌataqa kꞌu riglesia che uꞌanik taq wa kambꞌiꞌij chawe chaꞌ chom kilitaj ri kibꞌinik kisilabꞌik chikiwach ri jujun chik. 8 Lik kꞌu chirajawaxik riꞌ che junoq kebꞌutoꞌ taq ri ratz-uchaqꞌ e kꞌo chux che, y más ne chirajawaxik kuꞌan waꞌ chike rufamilia.*Éx. 20:12 Ma e junoq na kuꞌan ta waꞌ, riꞌ na taqal ta che kubꞌiꞌij e kukꞌil ri e re ri Cristo, yey más ne kꞌo umak riꞌ chikiwa ri na kikojom ta rubꞌiꞌ ri Cristo, ma e ne rike kekichajij ri kifamilias.

9 Chupa ri wuj pa tzꞌibꞌital wi taq ri bꞌiꞌaj ke rixoqibꞌ e malkaꞌnibꞌ ketoꞌik, xew katzꞌibꞌax rubꞌiꞌ rixoq ukꞌisom chi sesenta junabꞌ, we jusukꞌ xkꞌojiꞌ rukꞌ ri rachijil, 10 we chom ruchꞌaꞌtibꞌexik kaꞌan chwi taq ri chak uꞌanom, waꞌ e ebꞌukꞌiyisam chi utz ri ralkꞌoꞌal, ebꞌukꞌulum chi utz ri hermanos kebꞌopon chirocho y uchꞌajom ne ri kaqan,*“Uchꞌajom ne ri kaqan”: Ojertan kakiꞌan waꞌ ruma rulew kok che ri kaqan pa bꞌe. ebꞌutoꞌom taq ri e kꞌo pa kꞌaxkꞌobꞌik y lik kꞌu uꞌanom utzilaj taq chak.

11 Noꞌj taq ri malkaꞌnibꞌ kꞌa e kꞌakꞌal, matzꞌibꞌax ri kibꞌiꞌ ma kꞌaxtaj ruma ri kirayibꞌal xew kakitzukuj kekꞌuliꞌ tanchik y kakesaj kꞌu kibꞌ chirij ri Cristo. 12 Jekꞌulaꞌ e kakeqelej ri qꞌatbꞌal tzij pakiwiꞌ ruma na xkiꞌan taj janipa ri kibꞌiꞌim kakiꞌano.†“Janipa ri kibꞌiꞌim kakiꞌano”: Ri malkaꞌnibꞌ xetoꞌ ruma riglesia, xkiꞌan jun tzij na kekꞌuliꞌ taj y kakiya kꞌu kibꞌ chupa ruchak ri Dios piglesia. 13 Kebꞌuꞌan kꞌu e xepuꞌabꞌ y xaqi keqꞌeꞌkot chiꞌtaq ja. Yey na xew ta kebꞌuꞌan e xepuꞌabꞌ, ma kebꞌuꞌan ne e aj molot, xaqi kakimin kibꞌ che ri na jinta ke che y e xaqi kakitzijoj ri na taqal ta chike kakibꞌiꞌij. 14 E uwariꞌche riꞌin kambꞌiꞌij chike ri e malkaꞌnibꞌ kꞌa e kꞌakꞌal, chekꞌuliꞌoq, chekikꞌiyisaj ri kalkꞌoꞌal y e kilaꞌ kꞌut janipa ri chirajawaxik kaꞌan pa kocho chaꞌ jelaꞌ ri tzel kebꞌilow re ri Cristo na jinta kꞌo kakichꞌaꞌtibꞌej chikij rutinamit Rire. 15 Ma e kꞌo ne jujun chike waꞌ wa malkaꞌnibꞌ na kitaqem ta chi ri Cristo, ma e kitaqem ri Satanás.

16 We kꞌo junoq ukojom rubꞌiꞌ ri Cristo yey e kꞌo ixoqibꞌ malkaꞌnibꞌ chike rufamilia, riꞌ chirajawaxik che chebꞌutoꞌoꞌ chaꞌ na kuya ta alkꞌayew che riglesia, y jekꞌulaꞌ riglesia xew kebꞌutoꞌ ri malkaꞌnibꞌ paqatzij wi na jinta katoꞌw ke.

17 Chike konoje ri e aj wach re riglesia, ri kikꞌamom uwach chi utz rutinamit ri Dios, chirajawaxik kaꞌan kukꞌ janipa ri taqal chike ruma ri chak kakiꞌano; y e ne más chirajawaxik kaꞌan waꞌ kukꞌ ri yaꞌtal pakiqꞌabꞌ ketzijonik y kekꞌutunik. 18 Ma jewaꞌ tzꞌibꞌital kan chupa Rutzij Upixabꞌ ri Dios: «Makoj bꞌozal che ri bꞌoyex echiriꞌ kuqil uwi ri trigo, ma taqal che katzuqik.»*Dt. 25:4 Y kubꞌiꞌij: «E junoq kachakunik, lik taqal che katojik.»*Jer. 22:13; Lc. 10:7; 1 Co. 9:14

19 Echiriꞌ kꞌo junoq kutzꞌaq uchiꞌ juna aj wach re riglesia; makoj ne waꞌ we na e jinta kaꞌibꞌoq o oxibꞌoq kakijikibꞌaꞌ uwach rumak. 20 We kꞌo juna aj wach re riglesia na karaj taj karoqꞌotaj kan rumak, chachꞌaꞌbꞌej upa chikiwach konoje chaꞌ jelaꞌ kok xiꞌin ibꞌ kukꞌ riglesia. 21 Chwach kꞌu ri Dios y chwach ri Qanimajawal Jesucristo y chikiwach ri ángeles re ri Dios ri echaꞌtalik re kakiloqꞌnimaj Rire, kambꞌiꞌij kꞌu chawe chaꞌana taq waꞌ chi jusukꞌ kukꞌ konoje tobꞌ e chinoq y na xa ta katchaꞌwik. 22 Maꞌan tan aj wach re riglesia che junoq‡Pa ri chꞌaꞌtem griego kubꞌiꞌij: “Maya tan raqꞌabꞌ puwi junoq”. 1 Ti. 4:14 we kꞌamajaꞌ awilom chi utz ri jusukꞌ ubꞌinik,*1 Ti. 3:6, 10 ma amak kꞌu riꞌ riꞌat we rire kuꞌan ri na utz taj chupa ri chak re ri Dios. Lik chachajij kꞌu awibꞌ riꞌat chwach ronoje ri na utz taj.

23 Ruma kꞌu lik kuya kꞌax pamaj chawe, matij xew joronaꞌ, utz we e kachꞌurij kꞌana vino rukꞌ ri joronaꞌ katijo.

24 Lik chirajawaxik kawetaꞌmaj chi utz rubꞌinik usilabꞌik china ri kakojo re aj wach re riglesia. Ma e kꞌo jujun achijabꞌ lik qꞌalaj ri kimak tobꞌ kꞌamajaꞌ ne kaqꞌat tzij pakiwiꞌ; pero e kꞌo jujun chik kꞌunaj kaqꞌalajin ri kimak. 25 Jekꞌuriꞌlaꞌ, e kꞌo ri lik kaqꞌalajin ri chomilaj chak kakiꞌano; pero e kꞌo jujun chik kakiꞌan chomilaj taq chak, yey waꞌ kamayin retaꞌmaxik. Na rukꞌ ta kꞌu riꞌ, kopon ri qꞌij kel lo chi saq.