1 Konoje raj chak e kꞌo puqꞌabꞌ juna patrón*“Raj chak e kꞌo puqꞌabꞌ juna patrón”: Kil “esclavo” pa vocabulario. e lik kiloqꞌoj uqꞌij ri kipatrón che ronoje ri kakiꞌano, chaꞌ jelaꞌ na jinta junoq tzel kachꞌaꞌt chirij rubꞌiꞌ ri Dios y chirij ri saqil kꞌutunik. 2 Yey we juna aj chak kꞌo upatrón ukojom chi rubꞌiꞌ ri Cristo, muchꞌobꞌo: «Na chirajawaxik taj kanꞌan ri karaj ri nupatrón ma junam qawach qachaqꞌ qibꞌ chwach ri Dios.» Na ubꞌe taj kuchꞌobꞌ raqan waꞌ; ri lik usukꞌ e chuꞌana más chi utz ruchak ma ri kunimaj e jun ukojom rubꞌiꞌ ri Cristo y taqal kꞌu riꞌ che kꞌax kanaꞌik. Waꞌ e kꞌutunik y pixabꞌanik chaꞌana riꞌat chike ri e aj chak.

3 We kꞌo junoq junwi ri kukꞌutu y na junam ta runaꞌoj rukꞌ ri saqil kꞌutunik re ri Qanimajawal Jesucristo y rukꞌ ri saqil bꞌinik chwach ri Dios, 4 riꞌ na jinta retaꞌam tobꞌ kuchꞌobꞌo lik kꞌo unaꞌoj. E ne lik keꞌek unaꞌoj chwi taq chꞌaꞌtem na jinta uchak, xa re sachibꞌal naꞌoj. Y taq waꞌ kukꞌam lo retzelal kꞌuꞌx, chꞌaꞌoj, kꞌaxlaj chꞌaꞌtem chikij jujun chik y naꞌoj na ubꞌe taj chikij jujun chik. 5 Ruma kꞌu waꞌ, e taq ri winaq sachinaq kinaꞌoj y na jinta ri Qꞌijsaq kukꞌ, xaqi kakitzukuj chꞌaꞌoj chikiwach. Rike kakichꞌobꞌo, ri kꞌaslemal chwach ri Dios e re kuꞌan bꞌeyomabꞌ chike. Maꞌan kꞌu aweꞌat kukꞌ.

6 Paqatzij wi lik kꞌo kutiqoj ri qakꞌaslemal chwach ri Dios, pero xew we kojkiꞌkot rukꞌ ri kꞌo qukꞌ. 7 Ma na jinta qukꞌaꞌam loq echiriꞌ kojalax wara che ruwachulew y paqatzij wi na jinta kaqakꞌam bꞌi echiriꞌ kojkamik. 8 E uwariꞌche we kꞌo qawa y kꞌo qaqꞌuꞌ, e chojkiꞌkota rukꞌ waꞌ. 9 Noꞌj taq ri lik kakirayij kebꞌuꞌan e bꞌeyomabꞌ, riꞌ lik na kꞌayew ta chike ketzaq puqꞌabꞌ ritzel y kechapataj ruma ukꞌiyal rayinik na jinta uchak. Yey waꞌ xew kukꞌam lo ukꞌiyal kꞌaxkꞌobꞌik pakiwi rike woꞌora y chiqawach apanoq. 10 Ma ri rayinik re ri puaq e kukꞌam lo ukꞌiyal taq mak. E kꞌo ne jujun lik e bꞌenaq kikꞌuꞌx rukꞌ ri puaq y ruma waꞌ kiyaꞌom kan ri kubꞌulibꞌal kikꞌuꞌx rukꞌ ri Cristo, y jekꞌulaꞌ kitukel kiyaꞌom kibꞌ pa kꞌaxkꞌobꞌik.

11 Noꞌj riꞌat Timoteo, at jun raj chak ri Dios, chatanimaja kꞌu chwach ronoje taq ri na utz taj. E chatijoj awibꞌ che uꞌanik ri jusukꞌ y ri utz chwach ri Dios, kubꞌula akꞌuꞌx rukꞌ, chakꞌutu ri rutzil kꞌuꞌxaj, kꞌola unimal kꞌuꞌxaj awukꞌ y chaꞌana chꞌutiꞌn che awibꞌ. 12 Chachuqꞌubꞌej awibꞌ chi utz chupa ri Utzilaj Tzij akojom y e chatok il che ri kꞌaslemal na jinta utaqexik, ma ruma waꞌ xatusikꞌij ri Dios y ruma waꞌ chikiwach ukꞌiyal tikawex xaqꞌalajisaj ri kubꞌulibꞌal akꞌuꞌx rukꞌ ri Cristo. 13 Chupa kꞌu rubꞌiꞌ ri Dios, ri aj yaꞌl kꞌaslemal che ronoje taq ri kꞌolik, y chupa rubꞌiꞌ ri Qanimajawal Jesucristo, ri na xuxiꞌij ta ribꞌ che uqꞌalajisaxik ri Qꞌijsaq echiriꞌ kꞌo chwach ri aj qꞌatal tzij Poncio Pilato,*Jn. 18:37; 19:10-11 katintaq che waꞌ: 14 Chaꞌana kꞌu chi jusukꞌ janipa ri katutaq ri Dios che chaꞌ na jinta kꞌana mak kariqitaj chawe echiriꞌ kakꞌun tanchi lo ri Qanimajawal Jesucristo.

15 Kakꞌun kꞌu ri Jesús chupa ri qꞌij chaꞌtal chi lo ruma ri Dios.

17 Chabꞌiꞌij kꞌu chike konoje taq ri bꞌeyomabꞌ che ruwachulew makiꞌan nim che kibꞌ, makubꞌiꞌ kikꞌuꞌx rukꞌ ri kibꞌeyomal ma waꞌ xa kakꞌisik; e kubꞌula kikꞌuꞌx rukꞌ ri Dios kꞌaslik, ri kayaꞌw re ronoje ri kajawax chiqe chaꞌ kojkiꞌkot rukꞌ. 18 Chebꞌataqa che kiꞌana ri utz chaꞌ jelaꞌ kakꞌojiꞌ kibꞌeyomalil chwach ri Dios. Kiꞌana kꞌu ukꞌiyal chomilaj taq chak, chesipanoq y chekitoꞌo ri na jinta kꞌo kukꞌ. 19 Jekꞌulaꞌ riꞌ e ketajin che ukꞌolik chilaꞌ chikaj ri bꞌeyomalil na kakꞌis taj, yey lik jikil uwach kakikꞌul waꞌ chiqawach apanoq y kakiriq kikꞌaslemal na jinta utaqexik.

20 Timoteo, chachajij chi utz janipa ri yaꞌtal paqꞌabꞌ; maya axikin che taq chꞌaꞌtem na jinta kꞌo kutiqoj che rabꞌinik asilabꞌik chwach ri Dios y maya axikin che kꞌutunik kabꞌiꞌx che lik kuya naꞌoj tobꞌ na e ta kꞌu riꞌ. 21 Ma e kꞌo jujun ruma kikojom taq waꞌ, e xkiya kan ri bꞌe re ri Qꞌijsaq.

Chikꞌulu iwonoje riꞌix ri unimal rutzil ukꞌuꞌx ri Dios. Amén.