10
Ri Jesús kebꞌunabꞌesaj bꞌi setenta utijoꞌn chwach
1 Tekꞌuchiriꞌ, ri Qanimajawal xebꞌuchaꞌ chi setenta utijoꞌn y xebꞌutaq bꞌi pa kakabꞌ chaꞌ kenabꞌej bꞌi chwach Rire pa ronoje taq tinamit y luwar pa keꞌek wi. 2 Echiriꞌ kꞌamajaꞌ kebꞌel bꞌi, ri Jesús xubꞌiꞌij chike:
«Paqatzij wi kambꞌiꞌij chiwe: Ri molonik kajawaxik kaꞌanik, lik nim; noꞌj raj chak na e kꞌi taj. E uwariꞌche chitzꞌonoj che ri Dios, ri Rajaw ri molonik, chaꞌ kebꞌutaq lo aj chak re kakiꞌan ri molonik. 3 ¡Jix! Pero chitapeꞌ: Riꞌin kixintaq bꞌi pachaꞌ ix bꞌexex chikixoꞌl utiw.*Ri Jesús xubꞌiꞌij waꞌ ma e kꞌo winaq tzel kekil ri kakitzijoj ri Utzilaj Tzij y kakiꞌan kꞌax chike.
4 »Echiriꞌ kixꞌek, mikꞌam bꞌi ukꞌolibꞌal imeyo, mikꞌam bꞌi itebꞌ, mikꞌam bꞌi jun chik molaꞌj ixajabꞌ. Yey mixtakꞌiꞌ pa bꞌe re kiya kan rutzil uwach junoq.
5 »We xixok chuchiꞌ juna ja, ri nabꞌe ichꞌaꞌtem kibꞌiꞌij e waꞌ: “Kꞌola ri utzil chomal re ri Dios pawiꞌ alaq.” 6 We kꞌo junoq chiriꞌ lik karaj kukꞌul ri utzil chomal re ri Dios, kukꞌul kꞌu riꞌ. Noꞌj we na jinta kakꞌuluw re ri utzil chomal re ri Dios, waꞌ katzelej tanchi lo iwukꞌ. 7 Pa kixkꞌul wi, chixkanaj chiriꞌ chupa ri ja; mixqꞌax che jujun chik ja. Utz kitij ri kayaꞌ chiwe; ma e junoq kachakunik, lik taqal che katojik. 8 We xixok chupa juna tinamit y xixkꞌul pa juna ja, chitijaꞌ saꞌ ri kayaꞌ lo chiwach y mitzꞌonoj ri kiwaj riꞌix.
9 »Chebꞌikunaj kꞌu ri e yewaꞌibꞌ e kꞌo chupa ri tinamit y chibꞌiꞌij chike konoje: “Rutaqanik ri Dios xa naqaj chi kꞌo wi lo che alaq.”†Xubꞌiꞌij “Rutaqanik ri Dios xa naqaj chi kꞌo wi” ma ya xkꞌun ri Qanimajawal yey rutaqanik ya e riꞌ kujeq kukꞌ konoje ri kakikoj rubꞌiꞌ.
10 »We xixok kꞌu chupa juna tinamit yey na kixkꞌul taj, chixelubꞌi pa taq bꞌe y chibꞌiꞌij: 11 “Tobꞌ ne rulew re wa tinamit alaq kꞌo che ri qaqan, kaqapuꞌ kanoq chaꞌ ketaꞌmaj alaq na utz ta ri xꞌan alaq. Pero chetaꞌmaj alaq chi utz waꞌ: Rutaqanik ri Dios xa naqaj chi kꞌo wi lo che alaq” kixchaꞌ. 12 Kambꞌiꞌij kꞌu chiwe: Más lik kꞌax ri kape na pakiwi ri tinamit na kakikꞌul ta ri Utzilaj Tzij, chwa ri kape pakiwi ri e aj Sodoma y ri e aj Gomorra.*Gn. 19:24-28
Ri kꞌaxkꞌobꞌik kape pakiwi ri tinamit na kakitzelej ta kitzij
(Mt. 11:20-24)
13 »¡Lik toqꞌoꞌ iwach ri ix aj Corazín! ¡Lik toqꞌoꞌ iwach ri ix aj Betsaida! Ma we ta chupa ri tinamit Tiro y ri tinamit Sidón‡Lik etaꞌmatalik ri ejeqel pa wa kebꞌ tinamit Tiro y Sidón e aj tioxabꞌ y lik e aj makibꞌ. Is. 23:1-18 xilitaj wi wa kꞌutubꞌal re ruchuqꞌabꞌ ri Dios xinꞌan chiwach riꞌix, kꞌo tan qꞌij ta lo riꞌ xkitzelej kitzij chwach ri Dios, kikojom kꞌu kiqꞌuꞌ kꞌax rij y kitzꞌuyubꞌam kibꞌ pa chaaj ruma ri kibꞌis. 14 E uwariꞌche echiriꞌ kopon ri qꞌij re ri qꞌatbꞌal tzij, más nim ri kꞌaxkꞌobꞌik kape piwiꞌ chwa ri kꞌaxkꞌobꞌik kape pakiwi ri winaq re ri tinamit Tiro y ri tinamit Sidón.§Ri tikawex kitom ri Utzilaj Tzij y na kakikoj taj, más kꞌax ri kape pakiwiꞌ chikiwa ri tikawex na jinta kitom. 15 Ekꞌu ri ix aj Capernaúm, e chiwach riꞌix lik yakom chi iqꞌij kꞌa chikaj; yey na e ta riꞌ, ma lik kakꞌaq ne bꞌi iqꞌij y kixkꞌaq ne bꞌi kꞌa chi xibꞌalbꞌaꞌ re tijbꞌal kꞌax.
16 »China ri kataw iweꞌix, in ri kinuto; china ri tzel kilow iwe, in ri tzel kinrilo; china ri tzel kilow we riꞌin, e tzel karil ri Jun taqayom lo we riꞌin» xcha ri Jesús.
17 Xebꞌek kꞌu riꞌ ri setenta. Y ekꞌuchiriꞌ xetzelej loq, lik kekiꞌkotik. Xkitzijoj kꞌu che ri Jesús:
—Qajawal, ¡taq ri itzel uxlabꞌixel xkikoj qatzij echiriꞌ chupa ri bꞌiꞌ la xojtaqan che kebꞌel bꞌi chike ri winaq! —xechaꞌ.
18 Ri Jesús xubꞌiꞌij chike:
—Riꞌin xinwil ri Satanás xkꞌaq lo chikaj pachaꞌ jun rayo.*Ap. 12:7-9 19 ¡Chiwilapeꞌ! Riꞌin nuyaꞌom ichuqꞌabꞌ chaꞌ kichꞌij uchuqꞌabꞌ ritzel winaq y na jinta kꞌo kikꞌulumaj tobꞌ ne kiyiqꞌiyaꞌ kiwiꞌ kumatz y sinaꞌj.
20 Pero riꞌix mixkiꞌkot ruma kakikoj itzij ri itzel uxlabꞌixel; e chixkiꞌkota ruma tzꞌibꞌital ribꞌiꞌ*Flp. 4:3; Ap. 13:8 chilaꞌ chikaj —xchaꞌ.
Rukiꞌkotemal ri Jesús
(Mt. 11:25-27; 13:16-17)
21 Ekꞌu laꞌ la joqꞌotaj, ri Jesús lik xkiꞌkot ruma ri Santowilaj Ruxlabꞌixel ri Dios y xubꞌiꞌij:
«Nuqaw, kanyak qꞌij la, Lal Rajaw ruwa kaj y ruwachulew, ma taq ri qꞌalajisam la chike ri lik kakiꞌan chꞌutiꞌn che kibꞌ, waꞌ ewam la chikiwach ri lik kꞌo kinaꞌoj y lik kꞌo kimajom. Jelaꞌ xꞌan la, Nuqaw, ma e xꞌaj la riꞌ» xchaꞌ.
22 Tekꞌuchiriꞌ, xubꞌiꞌij chike ri tikawex:
«Ronoje taq ri kꞌolik yaꞌtal lo panuqꞌabꞌ ruma ri Nuqaw. Na jinta kꞌu junoq umajom usukꞌ chi utz saꞌ ruwach Rukꞌajol ri Dios; xew ri Qaqaw Dios etaꞌmayom re. Y na jinta ne junoq umajom usukꞌ chi utz saꞌ ruwach ri Qaqaw Dios, xew Rukꞌajol ri Dios etaꞌmayom re; yey puqꞌabꞌ kꞌu riꞌ Rukꞌajol kꞌo wi china chike karaj kuqꞌalajisaj wi waꞌ» xchaꞌ.
23 Tekꞌuchiriꞌ xqibꞌ kukꞌ rutijoꞌn y e laꞌ xa kitukel xubꞌiꞌij chike:
«Nim kiqꞌij kalaxik ri kakilo janipa ri iwilom riꞌix. 24 Ma kambꞌiꞌij kꞌu chiwe lik e kꞌi ri qꞌalajisanelabꞌ y ri taqanelabꞌ re ojertan lik xkaj kakil bꞌi janipa ri kiwil riꞌix woꞌora, pero na xkimaj ta chi rilik bꞌi. Lik xkaj kakita bꞌi janipa ri kita riꞌix woꞌora, pero na xkimaj ta chi utayik bꞌi»*Heb. 11:13, 39-40 xchaꞌ.
Ri kꞌambꞌal naꞌoj puwi rachi aj Samaria lik utz ukꞌuꞌx
25 Kꞌo jun aj kꞌutunel re ri tzijpixabꞌ xyaktajik y jewaꞌ xubꞌiꞌij chaꞌ kukꞌam upa ri Jesús:
—Wajawal, ¿saꞌ ri kanꞌano chaꞌ kꞌo nukꞌaslemal na jinta utaqexik? —xchaꞌ.
26 Ri Jesús xubꞌiꞌij che:
—¿Saꞌ ri tzꞌibꞌital chupa Rutzij Upixabꞌ ri Dios? ¿Saꞌ ri kamaj la usukꞌ che? —xchaꞌ.
27 Y raj wach xukꞌul uwach:
—Jewaꞌ tzꞌibꞌitalik:
Kꞌax chanaꞌa ra Dios Qajawxel rukꞌ ronoje awanimaꞌ,
rukꞌ ronoje akꞌuꞌx, rukꞌ ronoje achuqꞌabꞌ y rukꞌ ronoje anaꞌoj; Dt. 6:5
yey
Kꞌax chanaꞌa rawatz-achaqꞌ
jelaꞌ pachaꞌ ri kꞌax kanaꞌ awibꞌ riꞌat Lv. 19:18
—xchaꞌ.
28 Y ri Jesús xubꞌiꞌij che:
—Lik utz ri xkꞌulubꞌej wi la uwach. ꞌAna kꞌu la waꞌ y kakꞌojiꞌ kꞌaslemal la na jinta utaqexik*Lv. 18:5 —xchaꞌ.
29 Pero raj wach na karaj taj kutzaq ribꞌ y xubꞌiꞌij kꞌu che ri Jesús:
—¿Yey china ri watz-nuchaqꞌ? —xchaꞌ.
30 Ri Jesús jewaꞌ xubꞌiꞌij che:
«Kꞌo jun achi xel chupa ri tinamit Jerusalem y xeꞌek pa ri tinamit Jericó. Pa bꞌe kꞌut xtzaq pakiqꞌabꞌ jujun eleqꞌomabꞌ. Releqꞌomabꞌ xkimaj bꞌi ronoje rubꞌitaq re y lik xkiꞌan kan kꞌax che. Kajekꞌowik xkiya kanoq y xebꞌek.
31 »Ekꞌuchiriꞌ, chupa ri bꞌe xkꞌun lo jun aj chakunel pa Rocho Dios. Y echiriꞌ xril rachi ꞌanom kan kꞌax che, xa xutzuꞌ kanoq y xikꞌowik.
32 »Tekꞌuchiriꞌ xkꞌun lo jun chik achi aj levita, toꞌbꞌel ke raj chakunel pa Rocho Dios. Echiriꞌ xopon chunaqaj rachi ꞌanom kan kꞌax che, xa xutzuꞌ kanoq y xikꞌowik.
33 »Xkꞌun kꞌu lo jun achi aj Samaria. Echiriꞌ xkꞌun chunaqaj rachi ꞌanom kan kꞌax che y xrilo saꞌ ruꞌanom, lik xjuchꞌ kaꞌn pa ranimaꞌ.**Waꞌchi aj Samaria xutoꞌ rachi e kukꞌil raj judiꞌabꞌ, tobꞌ ri e aj Samaria y ri e aj judiꞌabꞌ lik tzel kakil kibꞌ. 34 Xqibꞌ kꞌu rukꞌ, xukunaj uwach rukꞌax rukꞌ aceite y rukꞌ vino, y xuchꞌuq uwach rukꞌax rukꞌ kꞌul. Xuyak bꞌi chwi rukawayuꞌ, xukꞌam bꞌi chupa jun mesón y xuchajij chi utz. 35 Echiriꞌ xel chiriꞌ chukaꞌm qꞌij, xresaj lo kaꞌibꞌ denarios pubꞌolxa y xuya kan che ri rajaw ri mesón, y jewaꞌ xubꞌiꞌij che: “Chajij ko la waꞌchi chwe. We na xuꞌan ta kꞌu wa puaq kanya kan cheꞌla, echiriꞌ kintzelej loq, kanyijbꞌaꞌ cheꞌla” xchaꞌ.»
36 Tekꞌuchiriꞌ ri Jesús xubꞌiꞌij che raj kꞌutunel:
—Chiwach rilal, ¿china chike wa oxibꞌ achijabꞌ xuꞌan ratz-uchaqꞌ rachi xchapataj kuma releqꞌomabꞌ pa bꞌe? —xchaꞌ.
37 Raj kꞌutunel xubꞌiꞌij:
—Chinuwach riꞌin, e ri jun xukꞌut ri kꞌaxnaꞌbꞌal ukꞌuꞌx che —xchaꞌ.
Ekꞌuchiriꞌ xubꞌiꞌij ri Jesús che:
—Lik areꞌ. Jelaꞌ kꞌu riꞌ ꞌana la rilal —xchaꞌ.
Ri Jesús keꞌbꞌina kukꞌ ri Marta y ri María
38 Echiriꞌ ri Jesús kꞌo chi bꞌe, xok chupa jun aldea. Chiriꞌ kꞌo jun ixoq Marta rubꞌiꞌ y rire xukꞌul ri Jesús chirocho. 39 Wiꞌxoq Marta kꞌo jun uchaqꞌ María rubꞌiꞌ. Ekꞌu ri María xtzꞌuyiꞌ chwach ri Jesús chaꞌ kuta ri kubꞌiꞌij. 40 Noꞌj ri Marta lik e ubꞌis ukꞌuꞌx taq ri kaꞌan pa ja. Ekꞌuchiriꞌ, xqibꞌ rukꞌ ri Jesús y jewaꞌ xubꞌiꞌij che:
—Wajawal, ¿lik kami e laꞌ na kok ta la il che ri kuꞌan ri nuchaqꞌ? Ma inuyaꞌom kan nutukel chwach ri nimanik. Bꞌiꞌij ko la che kinutoꞌo —xchaꞌ.
41 Noꞌj ri Jesús xubꞌiꞌij che:
—Marta, Marta, riꞌat lik e ubꞌis akꞌuꞌx y e sachinaq anaꞌoj puwi ri kaꞌano. 42 Xa jun kꞌu ri lik chirajawaxik wi kaꞌanik, waꞌ e ri más utz, y ri María e uchaꞌom waꞌ;††Ri xuꞌan ri María e xuya ribꞌ che utayik ri kubꞌiꞌij ri Jesús; ekꞌu ri nimanik xuꞌan ri Marta che ri Jesús, utz pero waꞌ xa re joqꞌotaj ma xa re ruwachulew y na jinta ukowil. yey na jinta junoq kamajaw waꞌ che —xchaꞌ.
*10:3 Ri Jesús xubꞌiꞌij waꞌ ma e kꞌo winaq tzel kekil ri kakitzijoj ri Utzilaj Tzij y kakiꞌan kꞌax chike.
†10:9 Xubꞌiꞌij “Rutaqanik ri Dios xa naqaj chi kꞌo wi” ma ya xkꞌun ri Qanimajawal yey rutaqanik ya e riꞌ kujeq kukꞌ konoje ri kakikoj rubꞌiꞌ.
*10:12 Gn. 19:24-28
‡10:13 Lik etaꞌmatalik ri ejeqel pa wa kebꞌ tinamit Tiro y Sidón e aj tioxabꞌ y lik e aj makibꞌ. Is. 23:1-18
§10:14 Ri tikawex kitom ri Utzilaj Tzij y na kakikoj taj, más kꞌax ri kape pakiwiꞌ chikiwa ri tikawex na jinta kitom.
*10:28 Lv. 18:5
**10:33 Waꞌchi aj Samaria xutoꞌ rachi e kukꞌil raj judiꞌabꞌ, tobꞌ ri e aj Samaria y ri e aj judiꞌabꞌ lik tzel kakil kibꞌ.
††10:42 Ri xuꞌan ri María e xuya ribꞌ che utayik ri kubꞌiꞌij ri Jesús; ekꞌu ri nimanik xuꞌan ri Marta che ri Jesús, utz pero waꞌ xa re joqꞌotaj ma xa re ruwachulew y na jinta ukowil.