1 Ri Pablo, ri Silas y ri Timoteo xebꞌikꞌow pa taq ri tinamit Anfípolis y Apolonia, y xebꞌopon kꞌu pa ri tinamit Tesalónica. Chiriꞌ kꞌu riꞌ kꞌo jun sinagoga ke raj judiꞌabꞌ. 2 Ekꞌu ri Pablo jelaꞌ pachaꞌ xex kuꞌan wi, xeꞌek pa ri sinagoga; oxibꞌ semana kꞌut e riꞌ xopon chilaꞌ chupa taq ri qꞌij re uxlanibꞌal y xchꞌaꞌt kukꞌ puwi ri Cristo, Ruchaꞌoꞌn lo ri Dios. Lik kꞌut xuqꞌalajisaj ri tzꞌibꞌital kan chupa Ruchꞌaꞌtem ri Dios 3 pa kubꞌiꞌij wi lik chirajawaxik wi ri Cristo xutij kꞌax, xkamisaxik y xkꞌastaj lo chikixoꞌl ri ekaminaq. Y xubꞌiꞌij kꞌu chike: «Ri Jesús, wa kantzijoj che alaq, waꞌ e ri Cristo, Ruchaꞌoꞌn lo ri Dios» xchaꞌ.

4 E kꞌo kꞌu jujun chike wa aj judiꞌabꞌ xkikoj rubꞌiꞌ ri Cristo y xebꞌuꞌan e kukꞌil ri Pablo y ri Silas. Jekꞌulaꞌ, lik e kꞌi chike ri e aj Grecia ri kakiloqꞌoj uqꞌij ri Dios, xkikoj rubꞌiꞌ ri Cristo; yey e kꞌi chike waꞌ e ixoqibꞌ lik kꞌo kiwach.

5 Ruma waꞌ xok retzelal kꞌuꞌx pa kanimaꞌ raj judiꞌabꞌ na kikojom ta rubꞌiꞌ ri Cristo. Xekiriq kꞌu jujun achijabꞌ itzel kikꞌuꞌx xa eqꞌeꞌkotel pa taq bꞌe, y kukꞌ waꞌ xekimol ukꞌiyal winaq y xekichꞌuꞌjerisaj kꞌu ri tinamit. Xeꞌkimina kꞌu kibꞌ pa rocho ri Jasón, kekitzukuj ri Pablo y ri Silas chaꞌ kekesaj loq y kekiya pakiqꞌabꞌ ri tinamit. 6 Pero na xekiriq taj. Xekikꞌam kꞌu lo ri Jasón y jujun chike ri kikojom rubꞌiꞌ ri Cristo, y xeꞌkiyaꞌa chikiwach ri e aj wach re ri tinamit. Kesikꞌin kꞌu riꞌ, kakibꞌiꞌij: «¡Waꞌ waꞌchijabꞌ e kisachom kinaꞌoj konoje ri tikawex che ruwachulew rukꞌ ri kikꞌutunik, yey woꞌora e kꞌuninaq wara! 7 Ri Jasón ebꞌukꞌulum chirocho. Yey rike na e ta kakiꞌan janipa ri taqanik re ri nimalaj taqanel re Roma, ma kakibꞌiꞌij kꞌo jun chik rey, Jesús rubꞌiꞌ» kechaꞌ.

8 Echiriꞌ ri winaq y ri e aj wach re ri tinamit xkita waꞌ, xkijeq lik ketukukik. 9 Ekꞌu ri Jasón y taq ri rachbꞌiꞌil xkiya chike ri e aj wach jun tojonik chirajawaxik kaꞌanik chaꞌ ketzoqopix bꞌi, y jekꞌulaꞌ xetzoqopix bꞌi.

10 Ewi ri hermanos na jampatana chaqꞌabꞌ xekitaq bꞌi ri Pablo y ri Silas pa ri tinamit Berea. Echiriꞌ rike xebꞌoponik, xebꞌek pa ri sinagoga ke raj judiꞌabꞌ. 11 Yey wa aj judiꞌabꞌ e kꞌo Berea na tzꞌapil ta ri kinaꞌoj pachaꞌ ri e kꞌo pa ri sinagoga re Tesalónica, ma xkiya kixikin che ri xtzijox chike y lik xkikꞌulu. Ronoje qꞌij kꞌut lik kakiya kinaꞌoj chwi Ruchꞌaꞌtem ri Dios tzꞌibꞌital kanoq, ma e kakaj kakimaj usukꞌ we qatzij janipa ri tzijom chike. 12 Lik e kꞌi chike waꞌ xkikoj rubꞌiꞌ ri Cristo. Yey chike ri e aj Grecia, e kꞌi xkikoj rubꞌiꞌ ri Cristo, na xew ta achijabꞌ ma chikixoꞌl e kꞌo ixoqibꞌ lik kꞌo kiwach.

13 Echiriꞌ raj judiꞌabꞌ e kꞌo Tesalónica xketaꞌmaj katajin ri Pablo che utzijoxik ri Utzilaj Tzij re ri Dios pa ri tinamit Berea, xebꞌek chilaꞌ y jelaꞌ xeꞌkiꞌana chike rukꞌiyal winaq pachaꞌ ri kiꞌanom Tesalónica, xebꞌekichꞌiꞌo chaꞌ kakijeq ketukukik.

14 Ewi ri hermanos na jampatana xkitaq bꞌi ri Pablo chaꞌ keꞌek chuchiꞌ ri mar y kukoj bꞌi juna barco; yey ri Silas y ri Timoteo xekanaj chiriꞌ Berea. 15 E kꞌo kꞌu jujun xkachbꞌilaj bꞌi ri Pablo y xkikꞌam bꞌi chupa ri tinamit Atenas. Chilaꞌ ri Pablo xubꞌiꞌij chike ri aj Berea: «Chibꞌiꞌij chike ri Silas y ri Timoteo kakilij loq chaꞌ kakiriq kibꞌ wukꞌ wara.» Y echiriꞌ xetzelej Berea, xkibꞌiꞌij waꞌ chike ri Silas y ri Timoteo.

16 Xaloqꞌ kꞌu ri Pablo eroyeꞌem ri Silas y ri Timoteo pa ri tinamit Atenas, rire lik xuꞌan kꞌax ranimaꞌ che echiriꞌ xrilo kiyaꞌom kibꞌ ri tinamit che kiloqꞌnimaxik ukꞌiyal tiox. 17 Ewi pa ri sinagoga xujeq kachꞌaꞌt kukꞌ ri e aj judiꞌabꞌ y ri na e ta aj judiꞌabꞌ, ri lik kakiloqꞌoj uqꞌij ri Dios. Yey jelaꞌ xuꞌan ronoje qꞌij chwa ri kꞌaybꞌal kukꞌ konoje ri kakimol kibꞌ chiriꞌ.

18 Chikixoꞌl rike e kꞌo jujun achijabꞌ kabꞌiꞌx chike “e aj naꞌoj”, waꞌ e kukꞌil raj epicúreos y raj estóicos. Rike xkichapalaꞌ kibꞌ rukꞌ ri Pablo puwi ri kukꞌutu. Jujun kakibꞌiꞌij: «¿Saꞌ ri karaj kubꞌiꞌij wa werewotel re chꞌaꞌtem?» kechaꞌ. Yey jujun chik kakibꞌiꞌij: «Waꞌ waꞌchi pachaꞌ tzijonel ke jujun chik dios e aj naj» kechaꞌ. Xkibꞌiꞌij waꞌ ma ri Pablo kutzijoj ri Utzilaj Tzij re ri Jesús chike y katzijon puwi ri kꞌastajibꞌal.

19 Xkikꞌam kꞌu bꞌi ri Pablo y xeꞌkiyaꞌa pa ri luwar Areópago kecha che, pa kakimol wi kibꞌ rachijabꞌ lik kꞌo kinaꞌoj. Y jewaꞌ xkibꞌiꞌij che: «Riꞌoj kaqaj kaqetaꞌmaj saꞌ wa kꞌakꞌ kꞌutunik kaꞌan rilal, 20 ma lik junwi ri kꞌutunik katzijoj la chiqawach riꞌoj. Kaqaj kꞌut kaqamaj usukꞌ saꞌ keꞌelawi ri kakꞌut la» xechaꞌ. 21 Jelaꞌ xkibꞌiꞌij ma konoje raj Atenas y ri e aj naj ejeqel chiriꞌ, xew bꞌenaq kikꞌuꞌx che taq ri kakito y kechꞌaꞌt chwi taq kꞌakꞌ naꞌoj katajin utayik.

22 Ewi ri Pablo, xtakꞌiꞌ chikixoꞌl pa ri Areópago y jewaꞌ xubꞌiꞌij:

«Alaq achijabꞌ aj Atenas, che ronoje ri kaꞌan alaq, kanwilo e lik bꞌenaq kꞌuꞌx alaq kukꞌ taq ri tiox alaq. 23 Ma xaloqꞌ xinmalakat pa wa tinamit alaq, xinwil taq ri luwar pa keloqꞌnimaj taq wi ri tiox alaq, yey xineꞌtzaq ne chwi jun altar pa tzꞌibꞌital wi waꞌ: «CHE RI DIOS NA ETAꞌMATAL TA UWACH.» Ekꞌu riꞌ wa jun kaloqꞌnimaj alaq uqꞌij tobꞌ na etaꞌam ta alaq uwach, e waꞌ Rire ri kantzijoj che alaq. 24 Rire e Dios xꞌanaw ruwachulew y ronoje taq ri kꞌo chwach yey e Rajaw ruwa kaj y ruwachulew. Na jeqel ta kꞌu pa juna ja ꞌanom xa kuma achijabꞌ. 25 Na kajawax ta che Rire ri oj tikawex kaqatoꞌo; ma e ne Rire ri kayaꞌw lo chiqe qonoje ri qakꞌaslem, ri quxlabꞌ y ronoje ri kajawax chiqe.

26 »Yey xa kꞌu che jun tikawex, ri Dios xukꞌiyarisaj kiwach konoje ri tikawex chaꞌ kejeqiꞌ che ronoje ruwachulew. Yey e Rire chꞌobꞌoyom loq pa taq kebꞌeꞌjeqela wi chujujunal tinamit y janipa taq ri kiqꞌijol che ruwachulew. 27 Xuꞌan waꞌ chaꞌ kakitzukuj Rire, yey tobꞌ ne pachaꞌ kemalal pa qꞌequꞌm, kakiriq na. Pero paqatzij wi, ri Qaqaw na naj ta kꞌo wi chiqe chiqajujunal. 28 Ma ruma ri Dios oj kꞌaslik, kojsilabꞌik y oj jeqel che ruwachulew; e pachaꞌ ri kibꞌiꞌim kan jujun aj tzꞌibꞌanel re ri tinamit alaq: “Riꞌoj oj ralkꞌoꞌal ri Dios.”

29 »Ruma kꞌu oj ralkꞌoꞌal ri Dios, maqachꞌobꞌ kꞌu riꞌ we Rire junam uwach kukꞌ ri tiox xa e ꞌanom rukꞌ oro, rukꞌ plata o rukꞌ abꞌaj, xa yijbꞌitalik y noꞌjital kuma rachijabꞌ. 30 Ojertan lo riꞌ jelaꞌ ri kinaꞌoj taq ri winaq puwi ri Dios, noꞌj ya kꞌu xikꞌow ruqꞌijol waꞌ. Ma woꞌora ri Dios kebꞌutaq konoje ri tikawex che ronoje luwar chaꞌ kakitzelej kitzij chwach. 31 Ma Rire uqꞌatom chi jun qꞌij echiriꞌ kuꞌan ri jusukꞌ qꞌatbꞌal tzij pakiwi konoje ri tikawex che ruwachulew. Kuꞌana kꞌu waꞌ ruma ri Jun Achi Uchaꞌom loq. Yey echiriꞌ ri Dios xukꞌastajisaj lo ri Jesús chikixoꞌl ri ekaminaq, e xujikibꞌaꞌ uwach Rire e ri Jun uchaꞌom loq chaꞌ kuꞌan waꞌ» xchaꞌ.

32 Ekꞌuchiriꞌ xkita puwi ri kꞌastajibꞌal ke ri ekaminaq, jujun chike xkijeq kakichꞌamij waꞌ. Noꞌj jujun chik xkibꞌiꞌij: «Kaqata tanchi la puwi wa kꞌutunik juna chik qꞌij» xechaꞌ.

33 Tekꞌuchiriꞌ, xel bꞌi ri Pablo chikixoꞌl ri kimolom kibꞌ. 34 Noꞌj jujun kꞌu chike wa tikawex xebꞌuꞌan e kukꞌil rukꞌ ri Pablo, ma xkikoj rubꞌiꞌ ri Cristo. Chikixoꞌl waꞌ kꞌo ri Dionisio (rire e kukꞌil rachijabꞌ lik kꞌo kinaꞌoj, ri kakimol kibꞌ pa ri Areópago), yey kꞌo jun ixoq Dámaris rubꞌiꞌ y jujun chik.