3
1 We kꞌastajinaq chi alaq junam rukꞌ ri Cristo, e tzukuj alaq janipa ri kape chilaꞌ chikaj pa tzꞌul wi ri Cristo puwikiqꞌabꞌ ri Dios. 2 E lik taqej alaq janipa ri re chilaꞌ chikaj y mataqej kꞌu alaq taq ri xa re ruwachulew. 3 Ma e ralaq kaminaq chi alaq chwa taq ri xa re ruwachulew; ekꞌu woꞌora ri kꞌaslemal alaq puqꞌabꞌ ri Cristo kꞌo wi yey Rire rukꞌ ri Dios kꞌo wi. 4 E ri Cristo ri uyaꞌom kꞌaslemal alaq. Yey echiriꞌ Rire kakꞌun tanchik, junam rukꞌ Rire kaqꞌalajisax wach alaq pa ri unimal uchomalil.
Ri bꞌinik re ojer y ri kꞌakꞌ bꞌinik
5 E uwariꞌche, e chesaj bꞌi chupa ri animaꞌ alaq ri na utz ta uwach re ruwachulew: metzꞌabꞌej uwa qꞌij alaq kukꞌ jujun chik na kꞌulel ta alaq, maꞌan alaq taq chꞌulilaj mak, maya ibꞌ alaq che rayibꞌal na chom ta uwach, marayij ne alaq kaꞌan alaq ri na utz taj. Kiꞌkota alaq rukꞌ ronoje ri kꞌo ukꞌ alaq y marayij ne alaq más; ma we kꞌo ri más kꞌax kanaꞌ alaq chwa ri Dios, e pachaꞌ kaꞌan alaq dios che waꞌ. 6 Ma ri Dios kutaq lo kꞌaxkꞌobꞌik pakiwi ri kakiꞌan taq waꞌ ruma na kakikoj ta utzij. 7 Yey jenelaꞌ xꞌan ralaq ojertan echiriꞌ kꞌa kꞌo alaq pa mak. 8 Ekꞌu woꞌora hermanos e yaꞌa kan alaq ronoje taq waꞌ: ri kaꞌan alaq oyowal, ri alaq kꞌaꞌn, ri kaꞌan alaq ri na utz taj che jun chik, ri kachꞌaꞌt alaq chirij junoq, ri kabꞌiꞌij alaq chꞌaꞌtem na chom ta uwach. 9 Maꞌan alaq raqꞌubꞌal chiwach alaq, ma esam chi ibꞌ alaq che ri ojer bꞌinik silabꞌik alaq y che ronoje ri na utz taj reqelem taq waꞌ. 10 E jalkꞌatajinaq chi kꞌu alaq che jun kꞌakꞌ bꞌinik silabꞌik, ma jalan katajin jalkꞌatixik alaq chaꞌ jelaꞌ kuꞌana alaq pachaꞌ ri Jun ri xuya kꞌakꞌ kꞌaslemal alaq. Jekꞌuriꞌlaꞌ ketaꞌmaj alaq uwach ri Dios pa saqil wi. 11 Che wa jun kꞌakꞌ bꞌinik silabꞌik na il ta chi uwach we junoq e kukꞌil raj judiꞌabꞌ o e kukꞌil ri na e ta aj judiꞌabꞌ, we ukojom ri retalil re circuncisión o na ukojom taj, we aj naj o na jinta kꞌana retaꞌam, we kꞌo puqꞌabꞌ juna rajaw*“Kꞌo puqꞌabꞌ juna rajaw”: Kil “esclavo” pa vocabulario. o na jinta rajaw; ma xew ri Cristo kuꞌan xa jun chiqe qonoje y puqꞌabꞌ Rire oj kꞌo wi qonoje.
12 Ralaq alaq chaꞌtal chi ruma ri Dios y alaq chi re Rire, yey lik kꞌax kanaꞌ alaq ruma Rire. Rukꞌ kꞌu ri bꞌinik silabꞌik alaq, lik kꞌutu alaq waꞌ: Kꞌola kꞌaxnaꞌbꞌal kꞌuꞌxaj ukꞌ alaq che kitoꞌik jujun chik, kꞌutu alaq ri relej kꞌuꞌx alaq, maꞌan nim chibꞌil ibꞌ alaq, chuꞌana ri lik utz kꞌuꞌx alaq chiwach alaq y kꞌola unimal kꞌuꞌx alaq. 13 Lik kuyu ibꞌ alaq chiwach alaq. We kꞌo junoq xuꞌan ri na utz taj che alaq, kuyu alaq umak. Jelaꞌ pachaꞌ xuꞌan ri Cristo echiriꞌ xukuy mak ralaq, jekꞌulaꞌ riꞌ ꞌana ralaq. 14 Yey chwi kꞌu ronoje taq waꞌ, ri más chirajawaxik e lik kꞌax kanaꞌ ibꞌ alaq chiwach alaq, ma e waꞌ ri kuꞌan xa jun che alaq pa saqil wi. 15 Ekꞌu ri utzil chomal re ri Dios taqana pa animaꞌ alaq, ma ruma waꞌ xusikꞌij alaq ri Dios chaꞌ kuꞌan alaq xa jun. Yey lik tioxin alaq chwach ri Dios.
16 Ruchꞌaꞌtem ri Cristo chunojisaj ronoje ri kꞌaslemal alaq. Kꞌutu kꞌu alaq waꞌ wa chꞌaꞌtem chibꞌil ibꞌ alaq y pixabꞌaj ibꞌ alaq rukꞌ saqil naꞌoj. Rukꞌ ronoje kꞌuꞌx alaq tioxin alaq chwach ri Dios y bꞌixoj alaq rubꞌiꞌ rukꞌ salmos, rukꞌ taq bꞌix tzꞌibꞌital kanoq y rukꞌ bꞌixobꞌal yaꞌom che alaq ruma ri Ruxlabꞌixel. 17 Yey ronoje ri kaꞌan alaq y ronoje ri kabꞌiꞌij alaq, ꞌana alaq chupa rubꞌiꞌ ri Qanimajawal Jesucristo y tioxin alaq chwach ri Qaqaw Dios ruma Rire.
Ri qabꞌinik qasilabꞌik chikiwach ri tikawex
18 E rilal ixoq, ri kꞌulan la, lik nimaj la ri achijil la, ma e taqal riꞌ chike ri kikojom rubꞌiꞌ ri Qaqaw.
19 Yey rilal achi, ri kꞌulan la, lik kꞌax naꞌa la ri ixoqil la. Makꞌachkꞌat la chwa ujolom.
20 Ekꞌu riꞌix ix alkꞌoꞌal, lik chikojo kitzij richu-iqaw che ronoje, ma waꞌ e kukꞌul ukꞌuꞌx ri Qanimajawal Jesucristo.
21 Yey ralaq ri kꞌo alkꞌoꞌal alaq, mapetisaj alaq koyowal ri alkꞌoꞌal alaq, chaꞌ jelaꞌ na kapax ta kikꞌuꞌx.
22 Ekꞌu rilal lal mokom, lik kojo la utzij ri patrón la che ronoje. Chakuna la rukꞌ xiꞌin ibꞌ chwach ri Dios y rukꞌ ronoje kꞌuꞌx la, na xew ta echiriꞌ katzutzuꞌx la ruma ri patrón pachaꞌ ri kakiꞌan ri xa kakitzukuj ri yakbꞌal kiqꞌij. 23 Ronoje kꞌu ri kaꞌan la, ꞌana la rukꞌ ronoje kꞌuꞌx la, ma e ri Qanimajawal ri kanimaj la y na e ta ri tikawex. 24 Ma etaꞌam chi la kꞌo rajil ukꞌaxel kuya ri Dios cheꞌla e chirij ri ꞌanom la, ma ri kanimaj la e ri Cristo ri Qajawal. 25 Noꞌj kꞌu ri kaꞌanaw ri na utz taj, riꞌ e kukꞌul ri tojbꞌal re ri na utz taj uꞌanom, ma ri Dios kuya chikijujunal saꞌ ri taqal chike e chirij ri kiꞌanom.