Ri carta xutzꞌibꞌaj ri Pablo che riglesia kꞌo Éfeso
1
Ri Pablo kuya pan rutzil kiwach ri hermanos e kꞌo Éfeso
Riꞌin in Pablo in taqoꞌn re ri Qanimajawal Jesucristo; e ri Dios intaqayom re, ma e xraj riꞌ chwe. Kantzꞌibꞌaj pan wa carta che alaq ri kꞌo alaq pa ri tinamit Éfeso,* Hch. 18:19-21; 19:1 ri kꞌo alaq puqꞌabꞌ ri Cristo y tikil alaq chi utz chupa rubꞌiꞌ. Kꞌulu kꞌu alaq ri unimal rutzil kꞌuꞌxaj y ri utzil chomal re ri Qaqaw Dios y re ri Qanimajawal Jesucristo.
Ronoje taq ri utz uchꞌobꞌom lo ri Dios e kuya chiqe ruma ri Cristo
¡Lik nim uqꞌij ri Dios, Ruqaw ri Qanimajawal Jesucristo! Ruma oj chi re ri Cristo, ri Dios uyaꞌom lo chiqe ronoje taq ri toꞌbꞌal petinaq chilaꞌ chikaj. Ma ri Dios kꞌamajaꞌ ne kuꞌan ruwachulew echiriꞌ xojuchaꞌ loq chaꞌ kojuya puqꞌabꞌ ri Cristo, y jelaꞌ kojuꞌan jusukꞌ y na jinta chi ne kꞌana qamak chwach. Ruma kꞌu rutzil ukꞌuꞌx ri Dios, lik ojertan xujikibꞌaꞌ lo uwach chaꞌ kuꞌan ralkꞌoꞌal chiqe ruma ri Qanimajawal Jesucristo. Yey lik pa ranimaꞌ xalax wi kuꞌan waꞌ. Kaqayak kꞌu uqꞌij ri Dios ruma ri unimal rutzil ukꞌuꞌx paqawiꞌ, ri xuya chiqe ruma Rukꞌajol, ri lik kꞌax kunaꞌ Rire. Rukꞌ kꞌu riꞌ ri Cristo kꞌo qakolobꞌetajik y kꞌo kuybꞌal qamak ruma rukikꞌel xturuwik, yey qariqom waꞌ ruma ri unimal rutzil ukꞌuꞌx ri Dios. Na jinta kꞌu utaqexik wa rutzil ukꞌuꞌx uyaꞌom lo paqawiꞌ. Yey xuya ne chi saq ri qanaꞌoj chaꞌ kaqetaꞌmaj saꞌ runaꞌoj Rire, ri na uyaꞌom ta che retaꞌmaxik ojertan. Ma uchꞌobꞌom chi lo ojertan chiribꞌil ribꞌ saꞌ ri karaj kuꞌan ruma ri Cristo 10 echiriꞌ kopon na ruqꞌijol kukꞌam lo ronoje taq ri kꞌolik, waꞌ e taq ri e kꞌo chilaꞌ chikaj y ri e kꞌo che ruwachulew, yey kuya na ronoje waꞌ puqꞌabꞌ ri Cristo chaꞌ kataqan puwiꞌ.
11 Ruma kꞌu oj re ri Cristo, kaqakꞌul na rubꞌiꞌtisim lo ri Dios chiqe, ma xojuchaꞌ lo ojertan chaꞌ kaqaꞌan janipa ri uchꞌobꞌom chi lo Rire. Yey Rire lik e kuꞌana ronoje ri karaj kuꞌano jelaꞌ pachaꞌ ri uchꞌobꞌom chi uloq. 12 Xojuchaꞌ kꞌu riꞌ re yakbꞌal uqꞌij Rire chaꞌ kilitaj ruchomalil quma riꞌoj, ri nabꞌe xkubꞌiꞌ qakꞌuꞌx rukꞌ ri Cristo. 13 Ekꞌuchiriꞌ ralaq xta alaq rutzijoxik ri Qꞌijsaq, ri Utzilaj Tzij puwi suꞌanik kakolobꞌetaj alaq; xkubꞌiꞌ kꞌuꞌx alaq rukꞌ ri Cristo y xkꞌul kꞌu alaq ri bꞌiꞌtisim kanoq: Waꞌ e ri Santowilaj Ruxlabꞌixel ri Dios pa animaꞌ alaq, kꞌutubꞌal re, alaq chi re ri Dios. 14 Yey ri Ruxlabꞌixel ri Dios pa qanimaꞌ e kajikibꞌan uwach chiqe, chiqawach apanoq kaqakꞌul na rutzꞌaqatibꞌal janipa ri ubꞌiꞌtisim kan ri Dios chiqe chaꞌ jelaꞌ kaqayak uqꞌij ri Dios ruma ri unimal uchomalil.
Ri Pablo kuꞌan orar pakiwi ri hermanos
15 Ruma kꞌu nutom lik kubꞌul kꞌuꞌx alaq rukꞌ ri Qanimajawal Jesucristo y lik kꞌutum ri rutzil kꞌuꞌx alaq chike konoje ri kikojom rubꞌiꞌ, 16 na kinuxlan ta che kintioxin chwach ri Dios uma ralaq echiriꞌ kanꞌan orar. 17 Kanꞌan orar chwach ri Qaqaw ri lik nim uqꞌij, ri Dios re ri Qanimajawal Jesucristo. Kantzꞌonoj kꞌu che chuyaꞌa lo naꞌoj alaq ruma ri Ruxlabꞌixel y chuqꞌalajisaj kꞌu chiwach alaq runaꞌoj Rire chaꞌ jelaꞌ ketaꞌmaj alaq uwach chi utz. 18 Yey kantzꞌonoj che ri Dios kuya chi saq ri naꞌoj alaq chaꞌ jelaꞌ ketaꞌmaj alaq chi utz saꞌ taq ri oyeꞌem alaq, ma alaq sikꞌim ruma ri Dios. Chetaꞌmaj kꞌu alaq saꞌ ri chomilaj bꞌeyomalil ubꞌiꞌtisim chike konoje ri e re Rire. 19 Kuaj kꞌut lik ketaꞌmaj alaq runimal uchuqꞌabꞌ ri Dios, ma waꞌ na jinta kajunumitaj wi. Y wa uchuqꞌabꞌ kꞌo chi qukꞌ, ma rukꞌ waꞌ ri Dios kachakun chiqaxoꞌl riꞌoj ri lik kubꞌul qakꞌuꞌx rukꞌ. 20 Waꞌ wa uchuqꞌabꞌ e xukꞌutu echiriꞌ xukꞌastajisaj lo ri Cristo chikixoꞌl taq ri ekaminaq y xutzꞌuyubꞌaꞌ puwikiqꞌabꞌ chilaꞌ chikaj. 21 Jelaꞌ ri Dios xuya puqꞌabꞌ ri Cristo kataqan pakiwi konoje ri e taqanelabꞌ, ri lik kꞌo kiwach, ri kꞌo kichuqꞌabꞌ y ri lik yakom kiqꞌij. Ma rubꞌiꞌ ri Cristo e más nim uqꞌij chwach ronoje taq bꞌiꞌaj, ma na jinta jun chik más kꞌo uwach chwa Rire; y waꞌ na xew ta woꞌora ma jelaꞌ chiqawach apanoq. 22 Ekꞌu ri Dios xuya ronoje xeꞌraqan uqꞌabꞌ ri Cristo y xukojo chaꞌ kuꞌan unimal ujolom riglesia 23 y riglesia e ucuerpo Rire. Jekꞌulaꞌ ri Cristo rukꞌ riglesia junam katzꞌaqat kiwach, y e ri Cristo ri katzꞌaqatisan re janipa taq ri kꞌolik.

*1:1 Hch. 18:19-21; 19:1