1 Ri Dios uyaꞌom kꞌakꞌ kꞌaslemal che alaq, tobꞌ ojertan kaminaq alaq chwach ri Dios ruma xmakun alaq y xpalajij alaq Rutzij. 2 Ma rojertan ri bꞌinik silabꞌik alaq e junam rukꞌ ri kibꞌinik taq ri winaq re ruwachulew. E xnimaj alaq janipa rutaqanik ri jun kataqan xa pa tew, waꞌ e ri itzel uxlabꞌixel, ri kataqan waqꞌij ora kukꞌ taq ri winaq kakipalajij Rutzij ri Dios. 3 Qonoje riꞌoj ojertan xqaꞌan qeꞌoj kukꞌ rike, ma e xqataqej janipa taq ri rayibꞌal re ri qatiꞌjil y taq ri na utz taj kakꞌun pa qajolom. Lik qalaxibꞌem chi lo waꞌ oj aj makibꞌ. Ruma kꞌu laꞌ, lik taqal chiqe we ta xpe ri royowal ri Dios paqawiꞌ jelaꞌ pachaꞌ ri kuꞌan kukꞌ konoje ri e aj makibꞌ. 4 Pero ri Dios ruma lik kꞌo unimal rutzil ukꞌuꞌx, xoj-juchꞌ kaꞌn che y kꞌax xojunaꞌo. 5 Ma echiriꞌ kꞌa oj kaminaq chwach Rire ruma ri qamak, xuya kꞌakꞌ kꞌaslemal chiqe junam rukꞌ ri Cristo. Ruma kꞌu ri unimal rutzil ukꞌuꞌx ri Dios kꞌo qakolobꞌetajik. 6 Y junam rukꞌ ri Qanimajawal Jesucristo xojukꞌastajisaj loq y xuya chiqe kojtaqan rukꞌ Rire chilaꞌ chikaj. 7 Ri Dios xuꞌan waꞌ chiqe chaꞌ chiqawach apanoq lik kaqꞌalajin ri unimal rutzil ukꞌuꞌx na jinta utaqexik, ri xuya lo rukꞌ relej ukꞌuꞌx paqawiꞌ ruma ri Qanimajawal Jesucristo. 8 Ma ruma kꞌu ri unimal rutzil ukꞌuꞌx ri Dios kꞌo kolobꞌetajik alaq yey waꞌ e ruma xkubꞌiꞌ kꞌuꞌx alaq rukꞌ ri Cristo. Y ri kolobꞌetajik, na alaq ta xchꞌakow re, ma e jun sipanik re ri Dios che alaq. 9 Ri kolobꞌetajik na kariqitaj ta kꞌu riꞌ ruma ri utz kaꞌan alaq, chaꞌ jelaꞌ na jinta junoq kutakꞌabꞌaꞌ uqꞌij. 10 Ma e ri Dios xuꞌan kꞌakꞌ chiqe ruma ri Qanimajawal Jesucristo chaꞌ kaqaꞌan ri utz chwach jelaꞌ pachaꞌ ri uchꞌobꞌom chi lo ojertan.

11 Echiriꞌ xalax alaq, na alaq ta kukꞌil ri e aj judiꞌabꞌ. Y rike xkibꞌiꞌij kꞌu che alaq: «Lik na junam ta iwach qukꞌ riꞌoj, ma riꞌoj kojotal ri retalil re circuncisión chiqe, kꞌutubꞌal re oj utinamit ri Dios; noꞌj riꞌix na jinta waꞌ chiwe» kechaꞌ. Yey waꞌ kojotal che ri cuerpo xa kuma tikawex. 12 Ekꞌu rojertan na jinta ri Cristo pa animaꞌ alaq, na alaq ta ne kukꞌil raj Israel ri yaꞌtal chike e utinamit ri Dios, y na jinta ne oyeꞌem alaq che ri bꞌiꞌtisinik uꞌanom ri Dios*“Ri bꞌiꞌtisinik uꞌanom ri Dios”: Gn. 9:9; 15:18; Éx. 19:1-8; 2 S. 7:11-16,26 echiriꞌ xuꞌan tzij kukꞌ rutinamit; lik kꞌu xa tukel alaq riꞌ che ruwachulew ma na jinta ri Dios ukꞌ alaq.

13 Noꞌj woꞌora kꞌo chi alaq puqꞌabꞌ ri Qanimajawal Jesucristo; yey na naj ta chi kꞌo wi alaq che ri Dios, ma ruma rukikꞌel ri Cristo, yaꞌtal che alaq kopon alaq chwach ri Dios.*Heb. 4:16 14 Ekꞌu riꞌ ri Cristo xojyaꞌw chi utzil chomal chiqawach ri oj aj judiꞌabꞌ ukꞌ ralaq ri na alaq ta aj judiꞌabꞌ; xuꞌan kꞌu xa jun chiqe y xresaj ri qꞌatbꞌal kajachaw qapa. 15 Ri Cristo echiriꞌ xuya ribꞌ pa kamik, e xusach uwach ri retzelal kꞌuꞌx kꞌo chiqawach ruma ri tzij pixabꞌ kitaqem raj judiꞌabꞌ.†Ri tzij pixabꞌ ke raj judiꞌabꞌ xujach kipa wa kebꞌ tinamit, ma raj judiꞌabꞌ e lik kitaqem wa tzij pixabꞌ, noꞌj ri na e ta aj judiꞌabꞌ na kebꞌok ta il che. Ruma kꞌu laꞌ lik tzel kakil kibꞌ. Jekꞌuriꞌlaꞌ, che wa kebꞌ tinamit xuꞌan xa jun tinamit, jun kꞌakꞌ tinamit uꞌanom xa jun rukꞌ Rire. Xutik kꞌu ri utzil chomal chiqaxoꞌl. 16 Ma rukꞌ rukamik chwa ri cruz, xebꞌuya wa kebꞌ tinamit chi utzil chomal chwach; xuꞌan kꞌu xa jun chike chaꞌ na tzel ta chi kakil kibꞌ. 17 Xkꞌun kꞌu ri Cristo y xutzijoj chike konoje suꞌanik kekꞌojiꞌ chi utzil chomal rukꞌ ri Dios. Xutzijoj kꞌu wa Utzilaj Tzij che ralaq echiriꞌ kꞌa naj kꞌo wi alaq che ri Dios y chike rutinamit Israel ri xa naqaj e kꞌo wi che. 18 Ruma kꞌu ri xuꞌan ri Cristo, qonoje tobꞌ oj aj judiꞌabꞌ o na oj ta aj judiꞌabꞌ yaꞌtal chiqe kojopon chwach ri Qaqaw Dios ruma ri Ruxlabꞌixel Rire kꞌo qukꞌ. 19 Jekꞌuriꞌlaꞌ, woꞌora na alaq ta chi pachaꞌ ri xa e ikꞌowel o ri e jeqel pa juna luwar na kitinamit taj; ma alaq chi kukꞌil rutinamit ri Dios, alaq chi ralkꞌoꞌal ri Dios, junam kukꞌ konoje ri e re Rire.

20 E ralaq pachaꞌ alaq juna ja katajin ri Dios che uyakik. Alaq pachaꞌ xan katajin utzꞌaqik chwi ri kowilaj uparaqan ri ja, yey waꞌ e ri kikꞌutum kan ri e taqoꞌn y ri qꞌalajisanelabꞌ re ri Dios. Ekꞌu rukꞌuꞌxibꞌal lo ruparaqan ri ja‡“Rukꞌuꞌxibꞌal lo ruparaqan ri ja”: Waꞌ pa kaxtila kabꞌiꞌx “piedra maestra” che. E nabꞌe abꞌaj kakoj paskin che ri ja kayakik. e ri Qanimajawal Jesucristo. 21 Lik kꞌu riꞌ kuchap bꞌi ribꞌ chi utz ri ja ma ronoje ri kojotal che, tzꞌaqom bꞌi chi utz chwi ri ratzꞌayaq, chaꞌ jelaꞌ kuꞌana jun santowilaj rocho ri Dios, ma tikil chi utz rukꞌ ri Qanimajawal. 22 Ruma kꞌu ri Dios, alaq junam kukꞌ raj judiꞌabꞌ ri kikojom rubꞌiꞌ ri Cristo; uꞌanom che alaq, alaq rocho ri Dios, ma Rire jeqel ukꞌ alaq ruma ri Ruxlabꞌixel uyaꞌom che alaq.