4
Xa jun qaꞌanom chwach ri Cristo tobꞌ junwi taq ri qachak
1 Riꞌin in kꞌo pa cárcel xa ruma ruchak ri Cristo; lik kantzꞌonoj kꞌu che alaq bꞌina alaq jusukꞌ jelaꞌ pachaꞌ ri taqal che alaq ma alaq sikꞌim ruma ri Dios. 2 Maꞌan kꞌu nim che ibꞌ alaq; e chuꞌana ri lik utz kꞌuꞌx alaq chiwach alaq. Kuyu kꞌu ibꞌ alaq chiwach alaq rukꞌ unimal kꞌuꞌxaj ruma ri kꞌax kanaꞌ ibꞌ alaq. 3 Ri Ruxlabꞌixel ri Dios xuꞌan xa jun che alaq y xukoj utzil chomal chiwach alaq; maya kꞌu alaq luwar kajach pa alaq. 4 Chwach ri Dios xa oj jun ma oj ucuerpo ri Cristo, xa jun ri Ruxlabꞌixel ri Dios qakꞌulum y xa jun oj uꞌanom che royꞌexik ri utz xubꞌiꞌtisij ri Dios chiqe echiriꞌ xojusikꞌij. 5 Xa jun ri Qanimajawal, na jinta jun chik; xa jun ri Utzilaj Tzij qakojom y xa jun ri bautismo qakꞌulum. 6 Xa jun ri Dios kꞌolik; Rire e Qaqaw ri kꞌo paqawiꞌ qonoje riꞌoj, kuꞌan ruchak quma qonoje riꞌoj y kꞌo pa qanimaꞌ qonoje riꞌoj. 7 Yey chiqajujunal kꞌo ri usipam ri Cristo chiqe e chirij ri relej ukꞌuꞌx Rire. 8 E pachaꞌ ri tzꞌibꞌital kan chupa Ruchꞌaꞌtem ri Dios pa kubꞌiꞌij wi:
Echiriꞌ xeꞌek chilaꞌ chikaj,
xebꞌukꞌam bꞌi ri xekꞌojiꞌ puqꞌabꞌ
yey xuya chomilaj taq sipanik
chike ri tikawex. Sal. 68:18
9 Echiriꞌ kubꞌiꞌij «xeꞌek chilaꞌ chikaj», waꞌ keꞌelawi xtzelej chilaꞌ chikaj, ma nabꞌe xpe chilaꞌ y xkꞌun wara che ruwachulew. 10 Ekꞌu ri Cristo, ri xkꞌunik, e Rire mismo ri xtzelej chilaꞌ chikaj chaꞌ jelaꞌ kataqan pakiwi konoje y jelaꞌ ronoje taq ri kꞌolik kakꞌojiꞌ puqꞌabꞌ Rire.
11 Yey e ri Cristo ri kojoyom taq ke raj chakibꞌ chikiwach rutinamit. E kꞌo jujun xuꞌan chike e utaqoꞌn; jujun chik xuꞌan chike eqꞌalajisay runaꞌoj ri Dios. Jujun chik xuꞌan chike e aj tzijol re ri Utzilaj Tzij. Jujun chik xuꞌan chike e aj chajal rutinamit ri Dios y chike jujun chik xuꞌan chike e kꞌutunel re Rutzij ri Dios. 12 E taq wa e aj chak ekojom re kekitijoj rutinamit ri Dios chaꞌ kakiꞌan ruchak Rire y jekꞌulaꞌ ri kikojom rubꞌiꞌ ri Cristo kekꞌiy chi utz. 13 Ma ri karaj ri Qaqaw chiqe e kojuꞌan xa jun ruma ri kubꞌulibꞌal qakꞌuꞌx rukꞌ Rukꞌajol y ruma ri kaqetaꞌmaj uwach chi utz. Ekꞌu ri qabꞌinik chwach ri Dios lik kakowirik, kuꞌana jelaꞌ pachaꞌ ri chomilaj ubꞌinik ri Cristo. 14 Jekꞌulaꞌ na kaqaꞌan ta chi qeꞌoj kukꞌ ri na jinta kikꞌiyibꞌal chwach ri Dios, ri xa kaketzꞌabꞌej kinaꞌoj puwi ri kikojom yey ketzaq pakiqꞌabꞌ ri e aj sokosoꞌnel, ri kakikꞌut taq ri na e taj y rukꞌ itzel taq naꞌoj kekikꞌam bꞌi pa sachibꞌal ri na e tikil ta chi utz. 15 Pero ri chirajawaxik wi chiqe e kojtikiꞌ chi utz chupa ri Qꞌijsaq y kaqatzijoj kꞌu waꞌ rukꞌ rutzil qakꞌuꞌx. Jekꞌulaꞌ kojkꞌiy pa saqil wi chaꞌ rukꞌ ronoje ri kaqaꞌano kojuꞌana pachaꞌ ri Jun Aj Kꞌamal Qawach, waꞌ e ri Cristo.
16 Ekꞌu ri Cristo kayaꞌw ri qakꞌiyibꞌal echiriꞌ chiqajujunal kaqaꞌan ri chak uyaꞌom Rire paqaqꞌabꞌ y kaqatoꞌ qibꞌ rukꞌ rutzil qakꞌuꞌx. Ma oj uꞌanom xa jun rukꞌ Rire; e pachaꞌ ri qacuerpo, lik kꞌi taq ri chapayom re, pero waꞌ xa jun uꞌanom.
Qayaꞌa kan ri qabꞌinik qasilabꞌik re ojer
17 Kampixabꞌaj kꞌu alaq chupa rubꞌiꞌ ri Qanimajawal: Maꞌan chi e alaq pachaꞌ ri kakiꞌan ri na ketaꞌam ta uwach ri Dios, ma ri kinaꞌoj rike kꞌo puwi ri xa na jinta uchak. 18 Rike e kꞌo pa qꞌequꞌm ma na kakaj ta kakimaj usukꞌ ri Qꞌijsaq. Ruma kꞌu lik kiꞌanom ko che ri kanimaꞌ, na jinta kꞌo ketaꞌam puwi ri Dios y lik naj e kꞌo wi che ri chomilaj kꞌaslemal kuya Rire. 19 Waꞌ wa winaq qabꞌi ke che kakiꞌan ri kꞌixbꞌal uwach; xkiya kꞌu kibꞌ che taq ri rayibꞌal re ri kitiꞌjil y jelaꞌ kiyaꞌom kibꞌ che uꞌanik taq ri chꞌulilaj mak.
20 Noꞌj ralaq na je ta laꞌ ri kꞌutunik xmaj alaq puwi ri Cristo, 21 we paqatzij wi e xta alaq rutzij y xmaj alaq usukꞌ ri Qꞌijsaq xukꞌut Rire. 22 Maꞌan chi alaq pachaꞌ ri xꞌan alaq echiriꞌ kꞌamajaꞌ kaya ibꞌ alaq puqꞌabꞌ ri Cristo. Yaꞌa kꞌu kan ri ojer bꞌinik silabꞌik alaq pa xsokotaj wi alaq ruma taq ri rayinik xa re sachibꞌal e alaq. 23 Chirajawaxik kꞌut kꞌo jun jalkꞌatajibꞌal che ri naꞌoj alaq. 24 Yaꞌa kꞌu ibꞌ alaq chupa ri kꞌakꞌ kꞌaslemal uyaꞌom ri Dios che alaq chaꞌ jelaꞌ kabꞌin alaq chupa ri Qꞌijsaq rukꞌ jun bꞌinik lik jusukꞌ y lik chom.
25 Maꞌan chi alaq raqꞌubꞌal, xew chꞌaꞌtibꞌej alaq ri lik qatzij chiwach alaq, ma qonoje ri oj re ri Cristo, xa jun qaꞌanom.
26 We kape oyowal alaq, mamakun alaq rukꞌ waꞌ; ri ꞌana alaq e chesaj chikꞌuꞌx alaq ri oyowal xaloqꞌ kꞌamajaꞌ ne katzaq bꞌi ri qꞌij. 27 Maya kꞌu alaq luwar che ritzel winaq kusok alaq.
28 We kꞌo junoq chixoꞌlibꞌal alaq kuꞌan eleqꞌ, muꞌan chik. Ri chuꞌanaꞌ e chakunoq chaꞌ jelaꞌ kuchꞌak ri kajawax che y kebꞌutoꞌ ne taq ri e kꞌo pa kꞌaxkꞌobꞌik.
29 Mabꞌiꞌij ne alaq juna itzel chꞌaꞌtem; e chꞌaꞌtibꞌej alaq ri chomilaj taq chꞌaꞌtem, toꞌbꞌal re ri kibꞌinik kisilabꞌik ri ketaw re.
30 Rukꞌ kꞌu riꞌ ri kaꞌan alaq, maya alaq pa bꞌis ri Santowilaj Ruxlabꞌixel ri Dios. Ma ri Ruxlabꞌixel pa animaꞌ alaq e kꞌutubꞌal re, alaq chi re ri Dios y e jikibꞌal uwach ri kolobꞌetajik kakꞌul alaq chupa ruqꞌijol rukꞌunibꞌal ri Cristo.
31 Chesaj alaq ronoje ri oyowal kꞌo pa animaꞌ alaq. Maꞌan alaq ri alaq kꞌaꞌn. Masikꞌin alaq rukꞌ oyowal. Machꞌaꞌt alaq chirij junoq. Chesaj kꞌu ibꞌ alaq che ronoje ri na utz taj. 32 Ri ꞌana alaq e kꞌutu alaq ri rutzil kꞌuꞌxaj chiwach alaq, kꞌax naꞌa ibꞌ alaq. Kuyu mak alaq chiwach alaq jelaꞌ pachaꞌ xuꞌan ri Dios echiriꞌ xukuy mak alaq ruma ri Cristo.