1 Ruma kꞌu alaq ralkꞌoꞌal ri Dios y Rire kꞌax kunaꞌ alaq, lik chirajawaxik ꞌana alaq jelaꞌ pachaꞌ kuꞌan Rire. 2 Ronoje kꞌu ri kaꞌan alaq, ꞌana alaq rukꞌ rutzil kꞌuꞌxaj, jelaꞌ pachaꞌ ri rutzil ukꞌuꞌx ri Cristo ukꞌutum chiqawach. Ma Rire lik kꞌax xojunaꞌo y xuya ribꞌ pa kamik paqakꞌaxel re tojbꞌal ri qamak. Ri xuꞌano e pachaꞌ jun qasaꞌn lik kiꞌ ruxlabꞌ chwach ri Dios.

3 Ralaq ri alaq chi re ri Dios, lik na ubꞌe ta kꞌenoq we chixoꞌlibꞌal alaq kꞌa kꞌo ri karetzꞌabꞌej uwa uqꞌij rukꞌ junoq na ukꞌulel taj o kuꞌan taq chꞌulilaj mak o na kakiꞌkot ta rukꞌ taq ri kꞌo rukꞌ ma xaqi kurayij más. 4 Machꞌaꞌtibꞌej ne alaq chꞌaꞌtem kꞌixbꞌal uwach, chꞌaꞌtem na jinta kutiqoj, chꞌaꞌtem na chom ta kꞌenoq tobꞌ ne tzeꞌbꞌal uwach. Ma ronoje waꞌ lik na taqal ta che ralaq. Ri ꞌana alaq e tioxin alaq chwach ri Dios rukꞌ ri chꞌaꞌtem alaq. 5 Ma lik etaꞌam chi alaq waꞌ: Ri karetzꞌabꞌej uwa uqꞌij rukꞌ junoq na ukꞌulel taj, ri kuꞌan taq chꞌulilaj mak, ri na kakiꞌkot ta rukꞌ taq ri kꞌo rukꞌ ma xaqi kurayij más, ri kaꞌanaw waꞌ e pachaꞌ juna aj tiox ma e kuꞌan “udios” che janipa ri kurayij; konoje kꞌu ri kakiꞌan taq waꞌ, na kakikꞌul ta ri bꞌiꞌtisim lo chike ri kiyaꞌom kibꞌ puqꞌabꞌ ri Cristo y e kꞌo chupa rutaqanik ri Dios. 6 Masokotaj alaq kuma ri kakimin alaq chupa ri mak rukꞌ chꞌaꞌtem lik chakojoꞌ qatzij pero xa raqꞌubꞌal. Ma ri qꞌatbꞌal tzij re ri Dios kape pakiwi ri e aj palajiy tzij, waꞌ e ri kakiꞌan taq waꞌ wa mak.

7 Maꞌan kꞌu e alaq kukꞌ taq wa winaq kakiꞌan ri na utz taj. 8 Ma ralaq ojertan sachinaq alaq chupa ri qꞌequꞌm, noꞌj woꞌora kꞌo chi alaq pa ri Qꞌijsaq ruma ri Cristo. Bꞌina kꞌu alaq pa ri Qꞌijsaq jelaꞌ pachaꞌ ri taqal che alaq. 9 Ma e junoq kꞌo pa ri Qꞌijsaq, riꞌ che rubꞌinik usilabꞌik kilitaj wi ri relej ukꞌuꞌx, lik jusukꞌ ri kuꞌano y lik qatzij ronoje ri kubꞌiꞌij. 10 E lik chꞌobꞌo alaq saꞌ ri kukꞌul ukꞌuꞌx ri Qaqaw y e ꞌana kꞌu alaq riꞌ. 11 Maꞌan e alaq pachaꞌ ri kakiꞌan ri e kꞌo pa qꞌequꞌm, ma ri kakiꞌan rike na jinta kꞌana uchak. Ri ꞌana alaq e qꞌalajisaj alaq chike ri na utz taj kakiꞌano chaꞌ na kakiꞌan ta chik, 12 tobꞌ ne lik kꞌixbꞌal ubꞌiꞌxikil ri kakiꞌan rike xa xeꞌlaqꞌay. 13 Yey echiriꞌ kel chi saq ri kaꞌanik, kaqꞌalajin kꞌu riꞌ we utz o na utz taj, ma ronoje kilitaj chi utz ruma ri Qꞌijsaq. 14 E pachaꞌ ri kabꞌiꞌxik:

15 Lik chajij kꞌu ibꞌ alaq che ri bꞌinik silabꞌik alaq. Maꞌan e alaq pachaꞌ ri kakiꞌan ri na jinta kinaꞌoj; e lik chꞌobꞌo alaq rukꞌ saqil naꞌoj saꞌ taq ri kaꞌan alaq. 16 Lik yaꞌa ibꞌ alaq che uꞌanik taq ri utz, ma waqꞌij ora lik katajin ukꞌiyarik ri mak che ruwachulew. 17 Maꞌan kꞌu alaq ri na kachꞌobꞌ ta alaq chi utz ri kaꞌan alaq; e lik kꞌola naꞌoj alaq puwi saꞌ ri karaj ri Qanimajawal che alaq. 18 Maya ibꞌ alaq che qꞌabꞌarik, ma waꞌ xa kuyojij rubꞌinik junoq. E yaꞌa ibꞌ alaq puqꞌabꞌ ri Ruxlabꞌixel ri Dios chaꞌ e Rire kataqan pa animaꞌ alaq. 19 Ma we kꞌo ri Ruxlabꞌixel ri Dios qukꞌ, jewaꞌ kaqaꞌano: Kaqanimarisaj qakꞌuꞌx chiqawach rukꞌ taq salmos, rukꞌ taq bꞌix tzꞌibꞌital kanoq y rukꞌ kꞌakꞌ bꞌixobꞌal yaꞌom chiqe ruma ri Ruxlabꞌixel ri Dios. Kaqayak kꞌu uqꞌij ri Qaqaw rukꞌ bꞌix kalax lo pa qanimaꞌ. 20 Yey xaqi kojtioxin chwach ri Qaqaw Dios ruma ronoje, y kaqaꞌan kꞌu waꞌ chupa rubꞌiꞌ ri Qanimajawal Jesucristo.

21 Nimaj ibꞌ alaq chiwach alaq rukꞌ xiꞌin ibꞌ chwach ri Cristo, ma e karaj riꞌ Rire chiqe. 22 E uwariꞌche, rixoq kꞌulanik taqal che kutaqej ri rachijil jelaꞌ pachaꞌ ri lik taqal che kutaqej ri Cristo. 23 Ma rachi e kꞌamal uwach ri rixoqil jelaꞌ pachaꞌ ri Cristo e kꞌamal uwach riglesia y na xew tane kꞌamal uwach ma e Kolobꞌenel re. Jekꞌulaꞌ ri Cristo e ujolom riglesia yey riglesia e ucuerpo Rire. 24 Jekꞌulaꞌ pachaꞌ riglesia kꞌo puqꞌabꞌ ri Cristo, jelaꞌ chuꞌana rixoq rukꞌ ri rachijil; che ronoje taq ri kuꞌano, e lik chutaqej ri rachijil.

25 Ekꞌu rachi kꞌulanik taqal che kꞌax kunaꞌ ri rixoqil jelaꞌ pachaꞌ ri Cristo lik kꞌax xojunaꞌ ri oj u iglesia y xuya ribꞌ pa kamik paqakꞌaxel. 26 Xuꞌan kꞌu waꞌ chaꞌ e kuꞌan chom y jusukꞌ che ri qabꞌinik. Xresaj kꞌu ri qamak ruma Ruchꞌaꞌtem; ri xuꞌano e pachaꞌ kaꞌan che ri chꞌul echiriꞌ kachꞌaj rukꞌ yaꞌ. 27 Xuꞌan kꞌu waꞌ chaꞌ echiriꞌ riꞌoj oj u iglesia kojopon chwach, oj jun chomilaj iglesia lik jusukꞌ y na jinta kꞌana mak kariqitaj che. 28 Jekꞌulaꞌ lik chirajawaxik che rachi e kukꞌut ri rutzil ukꞌuꞌx che ri rixoqil. Jelaꞌ pachaꞌ junoq lik kuchajij rucuerpo, jekꞌuriꞌlaꞌ taqal che rachi kuchajij ri rixoqil. Ma we juna achi kꞌax kunaꞌ ri rixoqil, e keꞌelawi kꞌax kunaꞌ ribꞌ, ma rachi rukꞌ rixoq, xa jun kiꞌanom. 29 Na jinta junoq tzel karil rucuerpo; ri kuꞌano e kawaꞌ chi utz y lik kuchajij chi utz. Jelaꞌ ri kuꞌan ri Cristo che riglesia, lik kuchajij chi utz. 30 Kuꞌan waꞌ chiqe ma riꞌoj oj ucuerpo.*Gn. 2:23 31 Jekꞌuwaꞌ ri kubꞌiꞌij Ruchꞌaꞌtem ri Dios: