1 E uwariꞌche chojkꞌiy chwach ri Dios, na xew ta keꞌek qanaꞌoj chwi lo ri nabꞌe kꞌutunik puwi ri Cristo; waꞌ e kꞌutunik puwi ri roqꞌotaxik taq kan ri na jinta kutiqoj ma xew kukꞌam lo kamik, kꞌutunik puwi ri kubꞌulibꞌal kꞌuꞌxaj chwach ri Dios, 2 kꞌutunik puwi ri bautismo, kꞌutunik puwi taq ri kakꞌul che ri Dios echiriꞌ raj wach re riglesia kakiya ri kiqꞌabꞌ puwi junoq,*Hch. 8:17; 19:6 kꞌutunik puwi ri kꞌastajibꞌal ke ri ekaminaq y kꞌutunik puwi ri qꞌatbꞌal tzij kuꞌan ri Dios pakiwi ri tikawex pa ri kꞌisbꞌal qꞌij yey ri kubꞌiꞌij Rire na jinta utaqexik e kuꞌano.*Kopon ri qꞌij echiriꞌ ri Dios kubꞌiꞌij china chike kayaꞌiꞌ wi ri kꞌaslemal na jinta utaqexik y china taq ri keyaꞌ pa ri kamik na jinta utaqexik. Ap. 20:11-15 3 Kojkꞌiy kꞌu riꞌ xew we ri Dios kuya qakꞌiyibꞌal.

4 Ma we e kꞌo ri xkikoj ri Qꞌijsaq julajoq, lik xekiꞌkot rukꞌ ri sipanik re chilaꞌ chikaj, e jun kukꞌ ri xkikꞌul ri Santowilaj Ruxlabꞌixel ri Dios, 5 lik xukꞌul kikꞌuꞌx ri Utzilaj Tzij re ri Dios y xkinaꞌ ne ruchuqꞌabꞌ ri Dios ri lik kaqꞌalajisax pa saqil wi chiqawach apanoq; 6 yey we rike kakesaj kibꞌ chirij ri Cristo, riꞌ na kayaꞌtaj ta chi chike kakitzelej kitzij y ketzelej tanchi pa ri Qꞌijsaq. Ma e pachaꞌ ketajin tanchi che ukamisaxik Rukꞌajol ri Dios chwa ri cruz y kakikꞌixbꞌesaj Rire chiwachil ruma ri kakiꞌano.

7 Ma ri kꞌo kikꞌiyibꞌal chwach ri Dios e jelaꞌ pachaꞌ rulew echiriꞌ kutzꞌubꞌaj chi utz ri jabꞌ katzaqik. We xel kꞌu lo riꞌ ri tikoꞌn, ri rutzil ukꞌuꞌx ri Dios kakꞌojiꞌ puwi wuꞌlew, ma xuya ri kajawax chike ri xetikow re. 8 Noꞌj we chwa rulew xew kel lo kꞌiix y tzakam, riꞌ na jinta kꞌana uchak chwach ri Dios. Ruma kꞌu riꞌ, kaqꞌat tzij puwiꞌ y chiqawach apanoq kaporox uwach.

9 Hermanos ri lik kꞌax kannaꞌ alaq, tobꞌ kꞌu jewaꞌ ubꞌiꞌxikil kanꞌan che alaq, nujikibꞌam nukꞌuꞌx na esam ta ibꞌ alaq chirij ri Cristo y kꞌo alaq pa ri bꞌe re kolobꞌetajik. 10 Ri Dios lik jusukꞌ ma na kumeskꞌutaj ta ri chomilaj chak ꞌanom alaq pa rubꞌiꞌ y ri rutzil kꞌuꞌxaj kꞌutum alaq chike ri kikojom rubꞌiꞌ, ma lik xenimaj alaq y kꞌa katajin ne alaq che uꞌanik waꞌ woꞌora. 11 Yey ri kaqaj riꞌoj e chijujunal alaq chuqꞌubꞌej ibꞌ alaq che uꞌanik ri utz woꞌora y kꞌa echiriꞌ kopon na ruqꞌijol kakꞌul alaq janipa ri oyeꞌem alaq che ri Dios. 12 Muꞌan ne alaq xepu, e ꞌana alaq ri utz jelaꞌ pachaꞌ ri kakiꞌan janipa ri lik kubꞌul kikꞌuꞌx rukꞌ ri Dios y na kapax ta kikꞌuꞌx che ri kꞌaxkꞌobꞌik yey ruma kꞌu waꞌ kakikꞌul ri ubꞌiꞌtisim lo ri Dios chike.

13 Ma echiriꞌ ri Dios xuꞌan rubꞌiꞌtisinik che ri Abraham, xujikibꞌaꞌ uwach waꞌ chupa rubꞌiꞌ Rire ma na jinta chi junoq más kꞌo uwach chwa Rire. 14 Jewaꞌ xubꞌiꞌij che:

15 Ri Abraham lik naj xroyeꞌej waꞌ rukꞌ unimal ukꞌuꞌx y jekꞌulaꞌ xukꞌul rubꞌiꞌtisim ri Dios che.

16 Paqatzij wi ri tikawex echiriꞌ kꞌo kakijikibꞌaꞌ uwach, kakiꞌan pubꞌiꞌ junoq más kꞌo uwach chikiwa rike; y jekꞌulaꞌ riꞌ kakꞌis ronoje chꞌaꞌoj puwi ri xkijikibꞌaꞌ uwach. 17 Jekꞌulaꞌ, ri Dios lik xraj xuqꞌalajisaj pa saqil wi na kujalkꞌatij ta ri xubꞌiꞌij kan chike ri kakikꞌul rubꞌiꞌtisim; e uwariꞌche lik xujikibꞌaꞌ uwach Ruchꞌaꞌtem. 18 Rukꞌ kꞌu wa bꞌiꞌtisinik xujikibꞌaꞌ uwach, lik qꞌalaj na kajalkꞌatix ta rubꞌiꞌtisim ri Dios, ma Rire na kuꞌan ta raqꞌubꞌal. E uwariꞌche riꞌoj ri qariqom rutoꞌbꞌal ri Dios, lik nimarinaq qakꞌuꞌx kaqaꞌan qe che ri bꞌiꞌtisim kan chiqe. 19 Ruma kꞌu kubꞌul pan qakꞌuꞌx che wa bꞌiꞌtisim kanoq, oj tikil chi utz y jikil uwach ri qanimaꞌ,†Pa ri chꞌaꞌtem griego kubꞌiꞌij e ri kubꞌul pan qakꞌuꞌx che e jun “ancla”. Waꞌ e jun nimalaj chꞌichꞌ pachaꞌ ansuelo tzayal che ri barco. Echiriꞌ katzꞌir chupa ri yaꞌ, kamuqutaj pa ri sanyebꞌ re kutakꞌabꞌaꞌ ri barco. ma lik kubꞌul qakꞌuꞌx rukꞌ ri Jun okinaq kꞌa chilaꞌ chikaj chirij ri telón chupa ri Luwar lik Santo.*Heb. 9:3-12 20 Waꞌ e ri Jesús, ri xok chilaꞌ quma riꞌoj; y jekꞌulaꞌ xujaq pan ri qabꞌe chaꞌ kojopon rukꞌ ri Dios. Jekꞌulaꞌ, ri Jesús xuꞌana Qajawal na jinta utaqexik kachꞌaw paqawiꞌ chwach ri Dios; xuꞌana kꞌu riꞌ pachaꞌ ri Melquisedec.*Sal. 110:4