1 Waꞌ wa Melquisedec e rey re ri tinamit Salem y aj chakunel chwach ri Dios Qajawxel echiriꞌ ri Abraham tzelejinaq lo pa ri chꞌaꞌoj pa xuchꞌij wi kichuqꞌabꞌ jujun reyes. Ekꞌu ri Melquisedec xuꞌkꞌulu pan ri Abraham y xutzꞌonoj ri rutzil ukꞌuꞌx ri Dios puwiꞌ. 2 Tekꞌuchiriꞌ ri Abraham xresaj rudiezmo che ri xuꞌchꞌaka lo pa chꞌaꞌoj y xuya che ri Melquisedec. Ri bꞌiꞌaj Melquisedec keꞌelawi: “Rey Jusukꞌ” yey ri jun chik ubꞌiꞌ e “Rey re Salem”, waꞌ keꞌelawi: “Rey re Utzil Chomal”.*Gn. 14:17-20 3 Na jinta xetaꞌmax pakiwi ruchu-uqaw o pakiwi ri ratz-uchaqꞌ ri Melquisedec; y na jinta ne xetaꞌmax puwi ri jeqebꞌal re o ri kꞌisbꞌal re rukꞌaslem. Na jinta kꞌu utaqexik rire e aj chakunel chwach ri Dios jelaꞌ pachaꞌ Rukꞌajol ri Dios.

4 Chꞌobꞌo pe alaq puwi runimal uwach ri Melquisedec, ma ri qamam Abraham xresaj ne rudiezmo che ri xuꞌchꞌaka lo pa chꞌaꞌoj y xuya che. 5 Paqatzij wi, ri e aj chakunel pa Rocho Dios kebꞌel lo chikixoꞌl ri e ralkꞌoꞌal kan ri Leví. Ekꞌu ri taqanik utzꞌibꞌam kan ri Moisés kubꞌiꞌij xew rike kꞌo pakiqꞌabꞌ kakikꞌul chike ri tinamit ri diezmo che ronoje ri kꞌo kukꞌ, tobꞌ ri keqasanik e ralkꞌoꞌal kan ri Abraham jelaꞌ pachaꞌ ri kekꞌuluw re waꞌ. 6 Noꞌj ri Melquisedec tobꞌ na e ta kukꞌil ri ralkꞌoꞌal kan ri Leví, xukꞌam rudiezmo ri Abraham, y xutzꞌonoj ri rutzil ukꞌuꞌx ri Dios puwi ri Abraham, ri jun xꞌan ri bꞌiꞌtisinik che ruma ri Dios. 7 Kꞌo kꞌu más uwach ri Melquisedec chwa ri Abraham ma qonoje qetaꞌam we kꞌo junoq kutzꞌonoj ri rutzil ukꞌuꞌx ri Dios puwi jun chik, riꞌ más kꞌo uwach chwa ri kakꞌuluw re waꞌ. 8 Ri ralkꞌoꞌal ri Leví, ri kekꞌuluw re ri diezmo pa ri Rocho Dios, rike e tikawex xa kekamik; noꞌj ri Melquisedec kabꞌiꞌx che pachaꞌ e jun kꞌa kꞌaslik. 9 Pa ri taqanik re ri Moisés, e ri ralkꞌoꞌal kan ri Leví ri taqal chike kekꞌuluw re ri diezmo. Na rukꞌ ta kꞌu riꞌ, echiriꞌ ri Abraham xuya rudiezmo che ri Melquisedec, e pachaꞌ e ri Leví xuya rudiezmo che; 10 ma tobꞌ ri Leví kꞌamajaꞌ ne kalaxik, e junam rukꞌ kꞌo chi rukꞌ rumam Abraham echiriꞌ xeꞌkꞌul pan ruma ri Melquisedec. 11 Chike ri e ralkꞌoꞌal ri Leví xyaꞌ wi ri kebꞌuꞌan e aj chakunel pa Rocho Dios.*Ri kichak raj chakunel pa Rocho Dios e kakikꞌut ri Tzij Pixabꞌ re ri Dios chikiwach ri tinamit, kechꞌaw chwach ri Dios pakiwi ri tinamit, kekikamisaj rawaj chwi raltar y kakikꞌul taq ri qasaꞌn. We ta e laꞌ kasukꞌupitaj ri tikawex kuma rike, ¿saꞌ kꞌu kutiqoj riꞌ kayaktaj jun chik aj chakunel chwach ri Dios pachaꞌ ri Melquisedec, yey na e ta pachaꞌ ri Aarón,†Ri Aarón e nabꞌe kajawal raj chakunel pa Rocho Dios echiriꞌ ri Dios xuya Rutzij Upixabꞌ che ri Moisés. ri jun ralkꞌoꞌal kan ri Leví? 12 Ma we ta kꞌo junoq kakꞌojiꞌ aj chakunel pa Rocho Dios yey na e ta kukꞌil ri e ralkꞌoꞌal kan ri Leví, riꞌ lik chirajawaxik wi kajalkꞌatix ri taqanik tzꞌibꞌital kan ruma ri Moisés puwi china ri taqal che kuꞌan aj chakunel pa Rocho Dios. 13 Ekꞌu ri Qanimajawal, ri Jun kachꞌaꞌt Ruchꞌaꞌtem ri Dios puwiꞌ,*Heb. 7:17 Rire na e ta kukꞌil ri e ralkꞌoꞌal kan ri Leví pa kipetebꞌem wi ri keniman chwach ri altar re ri Dios. Ma Rire e kukꞌil ri ralkꞌoꞌal kan ri Judá, yey na jinta junoq chike rike xuꞌan aj chakunel pa Rocho Dios. 14 Ma lik qꞌalaj ri Qanimajawal e jun chike ri e ralkꞌoꞌal kan ri Judá y pakiwi rike na jinta ne xuchꞌaꞌtibꞌej kan ri Moisés puwi ri chak pa Rocho Dios. 15 Y waꞌ más kaqꞌalajinik we kaqamaj usukꞌ, ri Jun xkojik re kachꞌaw pakiwi ri tikawex, e pachaꞌ ri Melquisedec. 16 Ma ri Jesús na xuꞌan ta aj chakunel pa Rocho Dios jelaꞌ pachaꞌ ri kubꞌiꞌij ri taqanik re ri Tzij Pixabꞌ; ma chupa waꞌ kaqꞌalajin wi xew ri e ralkꞌoꞌal kan ri Leví kekojik e aj chakunel pa Rocho Dios, noꞌj Rire xkojik ruma ruchuqꞌabꞌ rukꞌaslemal na jinta kasachaw uwach. 17 Ma jewaꞌ kubꞌiꞌij ri Dios chwi Rire:

18 Ekꞌu ri taqanik pakiwi raj chakunel pa Rocho Dios na jinta chi kutiqoj, ma waꞌ na jinta ukowil y na jinta uchuqꞌabꞌ re kebꞌukolobꞌej ri tikawex. 19 Ma na jinta junoq kuꞌana jusukꞌ ruma ri taqanik. Yey woꞌora kꞌo ri más kubꞌul pan qakꞌuꞌx che, y ruma kꞌu riꞌ waꞌ, utz kojqibꞌ rukꞌ ri Dios.

20 Echiriꞌ ri Dios xuya che ri Jesús kachꞌaw pakiwi ri tikawex chwach Rire, e lik xujikibꞌaꞌ uwach ri xuꞌano. 21 Ma ri jujun chik aj chakunel pa Rocho Dios xa e kojotalik y na jinta kꞌo xjikibꞌax uwach chike. Noꞌj chwi ri Jesús lik kꞌo jikibꞌam uwach, ma chupa Ruchꞌaꞌtem ri Dios, jewaꞌ kubꞌiꞌij:

23 E taq ri jujun chik e aj chakunel pa Rocho Dios na kekowin taj, ma xa kekamik yey pakikꞌaxel rike kekanaj kan jujun chik. Ruma laꞌ lik xebꞌuꞌana e kꞌi. 24 Noꞌj ri Jesús ruma na jinta utaqexik rukꞌaslemal, na jinta kꞌu utaqexik ri chak kuꞌano re kachꞌaw paqawiꞌ chwach ri Dios. 25 Ruma kꞌu waꞌ na jinta utaqexik ri kolobꞌetajik kuya ri Jesús chike ri keqibꞌ rukꞌ ri Dios ruma Rire. Yey ruma na jinta utaqexik rukꞌaslemal, kꞌo puqꞌabꞌ xaqi kachꞌaw lo pakiwiꞌ chwach ri Dios.

26 E Rire ri Qajawal lik kajawax chiqe kachꞌaw paqawiꞌ chwach ri Dios, ma xukꞌut jun bꞌinik lik jusukꞌ, na jinta kꞌana raqꞌubꞌal xuꞌano, na jinta kꞌana umak, na xuꞌan tane re kukꞌ raj makibꞌ y woꞌora yaktal uqꞌij chilaꞌ chikaj chwi ronoje taq ri uꞌanom ri Dios. 27 Na kajawax ta kꞌu che Rire kuꞌan pachaꞌ ri xkiꞌan ri jujun chik kajawal raj chakunel pa Rocho Dios. Ma rike ri jujun qꞌij, nabꞌe na kakiya puwi raltar ri awaj ekamisam ruma ri kimak rike, y kꞌa tekꞌuchiriꞌ, kakiya ri awaj ekamisam ruma ri kimak ri tinamit. Noꞌj ri Jesús xa julaj xuya ribꞌ pa kꞌaxkꞌobꞌik kuma konoje ri winaq. 28 Ekꞌu ri taqanik re ojertan kataqan che kakoj kajawal raj chakunel pa Rocho Dios. Yey taq wa kajawal xa e achijabꞌ y ruma riꞌ na kakichꞌij ta uꞌanik ronoje Rutzij Upixabꞌ ri Dios. Noꞌj woꞌora ri Dios xujikibꞌaꞌ uwach, Rukꞌajol e Qajawal kachꞌaw lo paqawiꞌ yey na jinta kꞌu utaqexik xew Rire kuꞌan chi jusukꞌ y tzꞌaqat janipa ri uyaꞌom ri Dios puqꞌabꞌ.