1 Ri Jesús echiriꞌ katajin chi bꞌe, xril jun achi ralaxibꞌem potzꞌ. 2 Ekꞌu rutijoꞌn xkitzꞌonoj che:

—Lal tijonel, ¿wa jun achi xalaxik potzꞌ ruma nawi kimak ruchu-uqaw o ruma umak rire? —xechaꞌ.

3 Ri Jesús xukꞌul uwach chike:

—Na ruma ta umak rire y na ruma tane kimak ruchu-uqaw; waꞌ e uꞌanom chaꞌ ruchuqꞌabꞌ ri Dios kaqꞌalajin rukꞌ rire.

4 Lik chirajawaxik chwe kanꞌan ruchak ri taqayom lo weꞌin xaloqꞌ kꞌa paqꞌij, ma kakꞌun lo raqꞌabꞌ echiriꞌ na jinta chi junoq utz kachakunik. 5 Xaloqꞌ kꞌu in kꞌo riꞌin wara che wuꞌwachulew, in ri in Qꞌijsaq che ruwachulew —xchaꞌ.

6 Echiriꞌ ubꞌiꞌim chi waꞌ, ri Jesús xchubꞌan chwa rulew, xuꞌan jubꞌiqꞌ xoqꞌoꞌl rukꞌ rukꞌaxaj. Tekꞌuchiriꞌ, xusoqꞌ che ruwach ri potzꞌ. 7 Ekꞌuchiriꞌ, xubꞌiꞌij che:

—Jat, jaꞌchꞌaja rawach pa ri yaꞌ re Siloé —xchaꞌ. (Siloé keꞌelawi “ri Taqom loq”.)

Ri potzꞌ e xuꞌano; xeꞌek y xuꞌchꞌaja ruwach. Ekꞌuchiriꞌ xtzelej loq, katzuꞌn chik.

8 Ekꞌu ri ejeqel lo chunaqaj ri potzꞌ y ri kilom xaqi kuꞌan ulimoxna, jewaꞌ kakibꞌiꞌij: «¿Na e ta nebꞌa achi waꞌ katzꞌuyiꞌ chiꞌ bꞌe y kuꞌan ulimoxna?» kechaꞌ.

9 Jujun chik kakibꞌiꞌij: «Qatzij, areꞌ» kechaꞌ.

Jujun chik kakibꞌiꞌij: «Na e ta rire, tobꞌ lik e katzuꞌnik» kechaꞌ.

Noꞌj rachi kunutajinaq chik, lik kujikibꞌaꞌ uwach, jewaꞌ kubꞌiꞌij: «Qatzij, in waꞌ kꞌut» kachaꞌ.

10 Xkitzꞌonoj kꞌu che:

—¿Chaꞌta laꞌ xat-tzuꞌnik? —xecha che.

11 Rire xukꞌul uwach:

—E ri jun achi Jesús ubꞌiꞌ, xuꞌan jubꞌiqꞌ xoqꞌoꞌl, xusoqꞌ che ri nuwach y xubꞌiꞌij chwe: “Jat pa kꞌo wi ri yaꞌ re Siloé y jaꞌchꞌaja rawach chupa.” Xinꞌek kꞌu riꞌ, y echiriꞌ xinchꞌaj ri nuwach, xinjeq kintzuꞌnik —xchaꞌ.

12 Xkitzꞌonoj kꞌu che:

—¿Pa kꞌo wi riꞌ laꞌ laꞌchi? —xecha che.

Rire xukꞌul uwach:

—Na wetaꞌam taj pa kꞌo wi —xchaꞌ.

13 Ekꞌuchiriꞌ xkikꞌam bꞌi ri potzꞌ kunutajinaq chik chikiwach ri fariseos; 14 ma e pa jun qꞌij re uxlanibꞌal echiriꞌ ri Jesús xuꞌan xoqꞌoꞌl y xukunaj ri potzꞌ.

15 Jenelaꞌ ri fariseos xkitzꞌonoj che chaꞌtaj xtzuꞌnik.

Rire xukꞌul uwach chike:

—Rachi xusoqꞌ xoqꞌoꞌl che ri nuwach, xinchꞌaj kꞌu ri nuwach y woꞌora kintzuꞌnik —xchaꞌ.

16 Ekꞌuchiriꞌ, jujun chike ri fariseos kakibꞌiꞌij chikiwach: «Laꞌ laꞌchi xꞌanaw re waꞌ, na rukꞌ ta ri Dios petinaq wi; ma e kuꞌan ri na ubꞌe taj kaꞌaniꞌ chupa ri qꞌij re uxlanibꞌal» kechaꞌ.

Jujun chik kakibꞌiꞌij: «We rire aj mak, ¿suꞌanik kꞌu riꞌ kuꞌan wa kꞌutubꞌal re ruchuqꞌabꞌ ri Dios?» kechaꞌ.

Ruma kꞌu laꞌ, xkijach kipa ri fariseos chikiwach.

17 Ekꞌuchiriꞌ, xkitzꞌonoj che rachi kunutajinaq chik:

—¿Saꞌ ri kabꞌiꞌij riꞌat chwi rachi xutzuꞌnisaj rawach? —xechaꞌ.

Rire xukꞌul uwach:

—Riꞌin kambꞌiꞌij e jun qꞌalajisanel —xchaꞌ.

18 Pero raj judiꞌabꞌ na xkaj taj kakikojo we rachi xex potzꞌ wi y woꞌora katzuꞌnik. Ruma waꞌ xekisikꞌij ruchu-uqaw, 19 y xkitzꞌonoj kꞌu chike:

—¿E alkꞌoꞌal alaq waꞌ, ri kabꞌiꞌij alaq ralaxibꞌem potzꞌ? ¿Chaꞌtaj katzuꞌn woꞌora? —xechaꞌ.

20 Ruchu-uqaw rachi xkikꞌul uwach:

—Riꞌoj lik qetaꞌam e qalkꞌoꞌal waꞌ y xalaxik potzꞌ. 21 Noꞌj na qetaꞌam taj chaꞌtaj katzuꞌn woꞌora, y na qetaꞌam ta nenareꞌ china xkunan re. Tzꞌonoj alaq che, ma rire nim chik —xechaꞌ.

22 Ruchu-uqaw rachi xkibꞌiꞌij waꞌ ruma kakixiꞌij kibꞌ, ma wa aj wach ke raj judiꞌabꞌ kiꞌanom chi tzij chikiwach chaꞌ na kekꞌul ta chi pa ri sinagoga janipa ri kakijikibꞌaꞌ uwach ri Jesús e ri Cristo, Ruchaꞌoꞌn lo ri Dios. 23 E uwariꞌche ruchu-uqaw rachi xkibꞌiꞌij: «Tzꞌonoj alaq che, ma rire nim chik.»

24 Ekꞌuchiriꞌ, raj judiꞌabꞌ xkitaq tanchi usikꞌixik rachi kunutajinaq chik y xkibꞌiꞌij che:

—Woꞌora chajikibꞌaꞌ uwach chwach ri Dios ri kabꞌiꞌij. Ma riꞌoj qetaꞌam waꞌ waꞌchi lik aj mak —xechaꞌ.

25 Ekꞌu rire xubꞌiꞌij:

—We rire aj mak na wetaꞌam ta kꞌu riꞌ riꞌin, xew wetaꞌam e ri petinaq loq in potzꞌ yey woꞌora kintzuꞌnik —xchaꞌ.

26 Xkitzꞌonoj tanchi che:

—¿Saꞌ ri xuꞌan chawe? ¿Suꞌanik xutzuꞌnisaj rawach? —xechaꞌ.

27 Rachi xukꞌul uwach:

—Riꞌin ya ximbꞌiꞌij che alaq y na xꞌaj ta kata alaq. ¿Suꞌchak kꞌu riꞌ kaꞌaj alaq kambꞌiꞌij tanchik? ¿Kaꞌaj kami ralaq kuꞌan alaq utijoꞌn? —xchaꞌ.

28 Ekꞌu rike xkiyajo, jewaꞌ xkibꞌiꞌij che:

—Riꞌat e kataqej laꞌ la jun achi, noꞌj riꞌoj e kaqataqej rutzꞌibꞌam kan ri Moisés. 29 Ma riꞌoj qetaꞌam ri Dios xchꞌaꞌt rukꞌ ri Moisés; noꞌj laꞌ la jun achi, na qetaꞌam taj pa petinaq wi —xecha che.

30 Ekꞌu rire xubꞌiꞌij chike:

—¡E laꞌ la lik kakam wanimaꞌ riꞌin che! Ma ralaq na etaꞌam ta alaq pa petinaq wi waꞌchi, yey rire xutzuꞌnisaj ri nuwach riꞌin. 31 Qetaꞌam kꞌu chi utz, ri Dios na kebꞌuta ta raj makibꞌ, xew kebꞌuta ri kakiloqꞌoj uqꞌij y kakiꞌan ri rajawal ukꞌuꞌx Rire. 32 Chwi lo ri jeqebꞌal ruwachulew, na jinta tatajinaq wi we kꞌo junoq utzuꞌnisam juna tikawex potzꞌ chwi ralaxik. 33 We tamaji wa jun achi petinaq rukꞌ ri Dios, riꞌ na jinta puqꞌabꞌ kuꞌan waꞌ —xchaꞌ.

34 Xkibꞌiꞌij kꞌu che:

—Riꞌat lik pa mak xatalax wi. ¿Kawaj kami riꞌ katkꞌutun chiqawach? —xecha che.

Chwi kꞌu riꞌ laꞌ, na xkikꞌul ta chi pa ri sinagoga.

35 Ekꞌu ri Jesús xretaꞌmaj na kakikꞌul ta chi pa ri sinagoga rachi kunutajinaq. Uwariꞌche echiriꞌ xukꞌulu, jewaꞌ xubꞌiꞌij che:

—¿Kubꞌul akꞌuꞌx riꞌat rukꞌ Ralaxel Chikixoꞌl Tikawex? —xchaꞌ.

36 Rachi xukꞌul uwach:

—Wajawal, bꞌiꞌij la chwe china rire chaꞌ kakubꞌiꞌ nukꞌuꞌx rukꞌ —xchaꞌ.

37 Ri Jesús xubꞌiꞌij che:

—Awilom chi uwach; ma in riꞌ ri kinchꞌaꞌt awukꞌ —xchaꞌ.

38 Ekꞌuchiriꞌ, rachi xuxukubꞌaꞌ ribꞌ chwach y xuloqꞌnimaj uqꞌij, jewaꞌ xubꞌiꞌij che:

—Wajawal, riꞌin kakubꞌiꞌ nukꞌuꞌx ukꞌ la —xchaꞌ.

39 Ekꞌu ri Jesús xubꞌiꞌij:

—Riꞌin in kꞌuninaq che ruwachulew chaꞌ wuma riꞌin kaqꞌalajinik china ri kakikꞌul ri Qꞌijsaq y china ri na kakikꞌul taj. In kꞌuninaq kꞌu riꞌ chaꞌ e ri na ketzuꞌn taj, kajaqataj ri kiwach y jelaꞌ kakil ri Qꞌijsaq; yey ekꞌu ri “ketzuꞌnik”, kachꞌuqutaj ri kiwach y na kakil ta ri Qꞌijsaq —xchaꞌ.

40 Jujun kꞌu chike ri fariseos, ri e kꞌo pan chunaqaj ri Jesús, echiriꞌ xkita waꞌ, xkitzꞌonoj che:

—¿E kami keꞌelawi riꞌ oj potzꞌ riꞌoj? —xechaꞌ.

41 Ri Jesús xukꞌul uwach:

—We ta kaya ibꞌ alaq chupa na kil ta alaq ri Qꞌijsaq, na jinta mak alaq riꞌ. Noꞌj ruma ri kabꞌiꞌij alaq kil alaq chi utz ri Qꞌijsaq, e kakanaj kꞌu alaq riꞌ chupa ri mak alaq*Juna aj mak we kuya ribꞌ chupa rumak y kutzukuj ri Qꞌijsaq, kukꞌul kꞌu riꞌ ri kuybꞌal mak. Noꞌj ri fariseos xkil ri Qꞌijsaq re ri Cristo yey na xkaj taj kakikꞌulu. Chikiwach rike na jinta kimak y lik ketaꞌam chi ronoje puwi ri Dios; e uwariꞌche na utz taj kakikꞌul ri kuybꞌal mak re ri Dios. —xchaꞌ.