10
Taq ri bꞌexex ketaꞌam uwach ri chajinel ke
1 Ri Jesús xubꞌiꞌij:
«Paqatzij wi kambꞌiꞌij che alaq: China ri na kok tubꞌi che ruchiꞌ ri coral ke ri bꞌexex yey xa tobꞌ kꞌu pa kok wubꞌi, riꞌ eleqꞌom y e kereleqꞌaj bꞌi ri bꞌexex. 2 Noꞌj kꞌu ri kok bꞌi che ruchiꞌ ri coral, riꞌ e chajinel ke ri bꞌexex. 3 Ekꞌu rire echiriꞌ kopon chwach ruchiꞌ ri coral, ri chajinel kꞌo che ruchiꞌ coral, kujaqalaꞌ lo che. Yey taq ri bꞌexex ketaꞌam ruchꞌawibꞌal ri chajinel ke, ma rire kebꞌusikꞌij rukꞌ ri kibꞌiꞌ chikijujunal y kebꞌeresaj bꞌi pa ri coral. 4 Echiriꞌ eresam chubꞌi konoje rubꞌexex pa ri coral, kanabꞌej bꞌi chikiwach y konoje rubꞌexex keterej bꞌi chirij ma ketaꞌam ruchꞌawibꞌal. 5 Noꞌj taq ri bꞌexex na keterej tubꞌi chirij junoq we na ketaꞌam ta uwach; ri kakiꞌano e kebꞌanimaj chwach ma na ketaꞌam ta ruchꞌawibꞌal» xchaꞌ.
6 Ri Jesús xubꞌiꞌij wa jun kꞌambꞌal naꞌoj chike, pero rike na xkimaj ta usukꞌ saꞌ ri karaj kubꞌiꞌij chike.
Ri Jesús e utzilaj chajinel ke bꞌexex
7 Ekꞌuchiriꞌ, xubꞌiꞌij ri Jesús:
«Paqatzij wi kambꞌiꞌij che alaq: In ri in uchiꞌ ri coral pa kebꞌok wi ri bꞌexex. 8 Konoje ri xekꞌun nabꞌe chinuwach* “Konoje ri xekꞌun nabꞌe chinuwach”: Waꞌ e ri kakibꞌiꞌij e qꞌalajisanel re ri Dios tobꞌ na e taj. Pa wa kꞌambꞌal naꞌoj ri bꞌexex e rutinamit ri Dios. riꞌin e eleqꞌomabꞌ y xa e kekeleqꞌaj bꞌi ri bꞌexex; pero ri bꞌexex na xekikajmaj ta rike.
9 »In ri in uchiꞌ ri coral ke ri bꞌexex. China ri kok bꞌi wuma riꞌin, riꞌ kakolobꞌetajik y kachajix chi utz pachaꞌ ri bꞌexex kebꞌokisax chaqꞌabꞌ pa ri coral y kebꞌesax bꞌi paqꞌij re kebꞌeꞌwoꞌq pa chomilaj kꞌim. 10 Juna eleqꞌom xew kakꞌunik re kuꞌan eleqꞌ, kuꞌan kamik y kusach uwach ronoje. Noꞌj riꞌin in kꞌuninaq re kanya kꞌaslemal che alaq yey waꞌ e jun chomilaj kꞌaslemal na jinta chi ukꞌisik.
11 »In ri in utzilaj chajinel ke bꞌexex. Juna utzilaj chajinel ke bꞌexex kuya ranimaꞌ kakam kuma rubꞌexex. 12 Noꞌj juna mokom kachakun xa ruma katojik. Echiriꞌ karilo kakꞌun lo rutiw, kanimajik y kebꞌuya kan ri bꞌexex; ma na e ta chajinel ke y na e tane kajaw. E uwariꞌche kuya luwar che rutiw kebꞌuchap ri bꞌexex y kebꞌukicherisaj bꞌi. 13 Wa mokom kanimajik ma na kok ta il chike ri bꞌexex, xew e kok il che ri kuchꞌako.
14 »In ri in utzilaj chajinel ke bꞌexex, ma riꞌin wetaꞌam kiwach ri nubꞌexex y rike ketaꞌam nuwach riꞌin. 15 Jelaꞌ pachaꞌ ri Nuqaw retaꞌam nuwach riꞌin, jekꞌulaꞌ riꞌin wetaꞌam uwach Rire; yey kanya wanimaꞌ kinkam kuma ri nubꞌexex.
16 »E kꞌo jujun chik nubꞌexex na e ta kukꞌil wa e kꞌo pa wa coral. Lik chirajawaxik wi kebꞌeꞌnukꞌamaꞌ loq. We xebꞌenusikꞌij, kakikoj nutzij y jelaꞌ kebꞌuꞌana xa jun pa ri coral y xa jun ri chajinel ke.
17 »Ruma kꞌu laꞌ, ri Nuqaw kꞌax kinunaꞌo, ma riꞌin kanya ri nukꞌaslem pa kamik yey kankꞌam tanchi waꞌ echiriꞌ kinkꞌastaj lo chikixoꞌl ri ekaminaq. 18 Na yaꞌtal ta puqꞌabꞌ junoq karesaj ri nukꞌaslem we na in ta kinyaꞌw re che. Panuqꞌabꞌ riꞌin kꞌo wi kanya wibꞌ pa kamik y panuqꞌabꞌ kꞌo wi kinkꞌastaj lo chikixoꞌl ri ekaminaq. Yey waꞌ e ri Nuqaw yaꞌyom panuqꞌabꞌ» xchaꞌ.
19 Echiriꞌ raj judiꞌabꞌ xkita wa chꞌaꞌtem, xkijach tanchi kipa chikiwach, ma e kꞌo ri xekojow re y e kꞌo ri na xekojow taj. 20 E kꞌi chike jewaꞌ kakibꞌiꞌij: «Laꞌ kꞌo puqꞌabꞌ juna itzel uxlabꞌixel y chꞌuꞌjerinaq. ¿Suꞌchak kata alaq re?» kechaꞌ.
21 Noꞌj kꞌo jujun chik jewaꞌ kakibꞌiꞌij: «Na jinta junoq jelaꞌ kachꞌaꞌtik we kꞌo puqꞌabꞌ juna itzel uxlabꞌixel. ¿Kꞌo nebꞌa juna itzel uxlabꞌixel kebꞌutzuꞌnisaj ri e potzꞌ?» kechaꞌ.
Raj wach ke raj judiꞌabꞌ na kakikoj taj we ri Jesús e Uchaꞌoꞌn lo ri Dios
22 Chupa kꞌu ruqꞌijol echiriꞌ kꞌax tew y kꞌo jabꞌ,† “Ruqꞌijol echiriꞌ kꞌax tew y kꞌo jabꞌ”: Kil “invierno” pa vocabulario. e riꞌ katajin ri nimaqꞌij re ri Rocho Dios chilaꞌ Jerusalem. 23 Y ri Jesús kabꞌin che ri Rocho Dios pa ri luwar kabꞌiꞌx che “Ruchiꞌ Ja re Salomón”‡ “Ruchiꞌ Ja re Salomón”: Jun corredor uqꞌabꞌ ri tapia re ri Rocho Dios.
24 Ekꞌu raj judiꞌabꞌ xkisut rij ri Jesús y jewaꞌ xkibꞌiꞌij che:
—¿Jampa xaqi e waꞌ na kaqꞌalajisaj ta la chiqawach saꞌ ri wach la? We lal kꞌu Ruchaꞌoꞌn lo ri Dios, asu bꞌiꞌij la chiqe —xechaꞌ.
25 Ri Jesús xukꞌul uwach:
—Nubꞌiꞌim chi che alaq, yey na kakoj ta alaq. Ronoje taq ri chak kanꞌano, e ri Nuqaw intaqayom che kanꞌano. Rukꞌ taq kꞌu wa kanꞌano, kaqꞌalajinik in china riꞌin. 26 Noꞌj ralaq na kakoj ta alaq, ma na alaq ta kukꞌil ri nubꞌexex, jelaꞌ pachaꞌ ri nubꞌiꞌim chi lo che alaq.
27 Taq ri nubꞌexex ketaꞌam chi ri nuchꞌawibꞌal; yey riꞌin wetaꞌam kiwach y rike eteran chwij. 28 Riꞌin kanya kikꞌaslemal na jinta utaqexik chaꞌ jelaꞌ na kasach ta kꞌana kiwach y na jinta ne junoq kebꞌeresaj panuqꞌabꞌ. 29 Yey e ri Nuqaw ri xeyaꞌw ke panuqꞌabꞌ, y Rire más kꞌo uwach chikiwa konoje. Ruma kꞌu riꞌ, na jinta junoq kebꞌeresaj puqꞌabꞌ Rire. 30 Ma ri Nuqaw y riꞌin xa oj jun —xchaꞌ.
Raj wach ke raj judiꞌabꞌ kakaj kakiꞌan ri Jesús paꞌbꞌaj
31 Julaj chik raj judiꞌabꞌ xkikꞌam abꞌaj pakiqꞌabꞌ re kakiꞌan ri Jesús paꞌbꞌaj.
32 Pero Rire xubꞌiꞌij chike:
—Lik kꞌi ri utzilaj chak nuꞌanom chiwach alaq rukꞌ ruchuqꞌabꞌ ri Nuqaw. ¿Ruma pachike che taq wa nuꞌanom kinꞌan alaq paꞌbꞌaj? —xchaꞌ.
33 Raj judiꞌabꞌ xkikꞌul uwach:
—Na kaqaꞌan ta la paꞌbꞌaj ruma ri utz ꞌanom la; e ruma makuninaq la chirij ri Dios rukꞌ ri chꞌaꞌtem la. Ma rilal xa lal jun achi y kaꞌan Dios che ibꞌ la —xechaꞌ.
34 Ekꞌuchiriꞌ, ri Jesús xubꞌiꞌij chike:
—Jewaꞌ tzꞌibꞌital kan chupa ri Tzij Pixabꞌ kꞌo ukꞌ alaq: “Ximbꞌiꞌij: Riꞌix ix dios.”§ Ojertan kabꞌiꞌx “dios” chike ri e aj wach re ri tinamit. Salmos 82:6 e jun pixabꞌanik xuya ri Dios chike ri e aj wach y kubꞌiꞌij rike e “dios” y e ralkꞌoꞌal ri Dios. 35 Ri Dios xubꞌiꞌij kꞌu “dios” chike ri xkikꞌul Ruchꞌaꞌtem, yey Ruchꞌaꞌtem na kajalkꞌatitaj taj. 36 ¿Suꞌanik kꞌu riꞌ kabꞌiꞌij alaq chwe in makuninaq xa ruma ri ximbꞌiꞌij in Ukꞌajol ri Dios? ma ri Dios xinuchaꞌ lo riꞌin yey xinutaq lo che ruwachulew.
37 »We na e ta kanꞌan ruchak ri Nuqaw, utz kꞌu riꞌ we na kakoj ta alaq ri kambꞌiꞌij. 38 Noꞌj we e kanꞌan ruchak ri Nuqaw, kojo kꞌu alaq riꞌ in china riꞌin ruma taq ri kanꞌano, na xa ta ruma ri kambꞌiꞌij. Y jelaꞌ ketaꞌmaj alaq y kakoj alaq riꞌ: Ri Nuqaw wukꞌ riꞌin y riꞌin rukꞌ Rire, xa oj jun —xchaꞌ.
39 Ekꞌu raj judiꞌabꞌ xkaj tanchik kakichapo, pero na xkichap taj ma ri Jesús xel bꞌi chikixoꞌl.
40 Y xuqꞌaxuj kꞌu ri nimayaꞌ Jordán pa xuya wi bautismo ri Juan y xkanaj kan chilaꞌ. 41 Ukꞌiyal winaq xebꞌopon rukꞌ; xeꞌkilaꞌ y jewaꞌ kakibꞌiꞌij: «Ri Juan na xuꞌan ta juna kꞌutubꞌal re ruchuqꞌabꞌ ri Dios chiqawach; na rukꞌ ta kꞌu riꞌ, ronoje ri xubꞌiꞌij kan chwi waꞌ waꞌchi, lik qatzij» kechaꞌ.
42 Y lik e kꞌi ri xkubꞌiꞌ kikꞌuꞌx rukꞌ ri Jesús chilaꞌ.
*10:8 “Konoje ri xekꞌun nabꞌe chinuwach”: Waꞌ e ri kakibꞌiꞌij e qꞌalajisanel re ri Dios tobꞌ na e taj. Pa wa kꞌambꞌal naꞌoj ri bꞌexex e rutinamit ri Dios.
†10:22 “Ruqꞌijol echiriꞌ kꞌax tew y kꞌo jabꞌ”: Kil “invierno” pa vocabulario.
‡10:23 “Ruchiꞌ Ja re Salomón”: Jun corredor uqꞌabꞌ ri tapia re ri Rocho Dios.
§10:34 Ojertan kabꞌiꞌx “dios” chike ri e aj wach re ri tinamit. Salmos 82:6 e jun pixabꞌanik xuya ri Dios chike ri e aj wach y kubꞌiꞌij rike e “dios” y e ralkꞌoꞌal ri Dios.