1 Ekꞌu ri Jesús xutzijoj waꞌ chike rutijoꞌn:

3 »Ewi ri raj chak xuchꞌobꞌ raqan: “¿Saꞌ ri kanꞌan woꞌora? Ma ri wajaw karesaj ri nuchak chwe. Yey riꞌin na kankuy taj kinchakun pa juyubꞌ y kinkꞌix che kantzꞌonoj limoxna. 4 ¡Ah! Wetaꞌam chik saꞌ ri kanꞌano chaꞌ e kꞌo wamigos kekꞌuluw weꞌin chikocho echiriꞌ na jinta chi nuchak” xcha pa ranimaꞌ.

5 »Xebꞌusikꞌij kꞌu chikijujunal ri kꞌo kikꞌas rukꞌ ri rajaw. Xutzꞌonoj che ri nabꞌe: “¿Janipa rakꞌas rukꞌ ri wajaw?” xcha che.

6 »Y raj kꞌas xukꞌul uwach: “Nukꞌas jun ciento tenaꞌx aceite” xcha che.

»Y raj chak xubꞌiꞌij che: “Riꞌ ruwujil rakꞌas. Choqꞌotan chat-tzꞌuloq, chayojo ri jun ciento y chakojo xa nikꞌaj ciento chik” xchaꞌ.

7 »Tekꞌuchiriꞌ, xutzꞌonoj che jun chik: “Y riꞌat, ¿janipa rakꞌas?” xchaꞌ.

»Y raj kꞌas xubꞌiꞌij: “Nukꞌas jun ciento quintal trigo” xchaꞌ.

»Y raj chak xubꞌiꞌij che: “Riꞌ ruwujil rakꞌas. Chayojo ri jun ciento y chakojo xa ochenta quintal chik” xchaꞌ.

8 »Ekꞌu ri rajaw, echiriꞌ xretaꞌmaj saꞌ ri xuꞌan ri raj chak, jewaꞌ xubꞌiꞌij: “¡Jaꞌ! ¡Lik kꞌo unaꞌoj wa jun achi, tobꞌ na jusukꞌ ta ri uꞌanom!” xchaꞌ.»

Xubꞌiꞌij kꞌu ri Jesús chike rutijoꞌn:

«Paqatzij wi ri winaq na e ta jusukꞌ, más kꞌo kinaꞌoj che uchapabꞌexik rubꞌitaq ke, chikiwa ri e kꞌo pa ri Qꞌijsaq. 9 E uwariꞌche kambꞌiꞌij chiwe: Chichapabꞌej chi utz ri puaq y rubꞌitaq iwe y rukꞌ waꞌ chebꞌitoꞌo ri nibꞌaꞌibꞌ y jekꞌulaꞌ rike kebꞌuꞌana iwamigos. Ma echiriꞌ kopon ri qꞌij na jinta chi puaq iwukꞌ, kixkꞌul na chilaꞌ chikaj pa kayaꞌiꞌ wi chiwe ri kꞌaslemal na jinta utaqexik.

10 »E junoq jusukꞌ uchapabꞌexik kuꞌan ri xa jubꞌiqꞌ yaꞌtal puqꞌabꞌ, jekꞌuriꞌlaꞌ kuꞌano we xyaꞌiꞌ kꞌi puqꞌabꞌ. Noꞌj we na jusukꞌ ta uchapabꞌexik kuꞌan ri xa jubꞌiqꞌ yaꞌtal puqꞌabꞌ, jekꞌuriꞌlaꞌ we xyaꞌiꞌ kꞌi puqꞌabꞌ, na jusukꞌ ta ri kuꞌan rukꞌ. 11 Ekꞌu riꞌ riꞌix, we na jusukꞌ ta uchapabꞌexik iꞌanom ri bꞌeyomalil xa re ruwachulew, ¿china kꞌu kayaꞌw riꞌ piqꞌabꞌ ri saqil bꞌeyomalil re chilaꞌ chikaj? Na jinta junoq. 12 Yey we e laꞌ na jusukꞌ ta uchapabꞌexik iꞌanom ri yaꞌom piqꞌabꞌ xa pa chaqꞌiꞌm, ¿china kꞌu riꞌ karaj kuya bꞌeyomalil chiwe? Na jinta junoq.

13 »Lik kꞌayew we juna aj chak e kaꞌibꞌ ri rajaw. Ma laj tzel karil ri jun yey kꞌax kunaꞌ ri jun chik; o laj kuyak uqꞌij ri jun yey kukꞌaq bꞌi uqꞌij ri jun chik. Ruma kꞌu laꞌ, na utz taj we junoq kuya ribꞌ che kunimaj ri Dios yey kuya ribꞌ che utzukuxik ri bꞌeyomalil re ruwachulew» xcha ri Jesús.

14 Echiriꞌ xkita waꞌ ri fariseos, ri lik keꞌek kikꞌuꞌx rukꞌ ri puaq, xa xkitzeꞌej ri kubꞌiꞌij ri Jesús.

15 Ekꞌu Rire xubꞌiꞌij chike:

«Ralaq fariseos, lik kaꞌan chi ibꞌil ibꞌ alaq pachaꞌ lik alaq jusukꞌ chikiwach ri winaq, pero ri Dios retaꞌam saꞌ ri kꞌo pa animaꞌ alaq. Ma ronoje taq ri lik yakom uqꞌij kuma ri winaq, waꞌ lik tzel kilitaj ruma ri Dios.

16 »Ri qꞌalajisanelabꞌ y ri Moisés kitzꞌibꞌam chi lo chupa ri Tzij Pixabꞌ chwi rutaqanik ri Dios kakꞌun na; yey rukꞌ kꞌu ri Juan xjeqiꞌ wi utzijoxik rukꞌunibꞌal rutaqanik ri Dios, y konoje kꞌu ri winaq lik kakitij uqꞌij kebꞌok chupa waꞌ. 17 Na rukꞌ ta kꞌu riꞌ, lik kꞌo uwach wa Tzij Pixabꞌ tzꞌibꞌital kanoq, ma e ne más kꞌayew kajalkꞌatix jubꞌiqꞌoq che waꞌ chwa ri kasach uwach ruwa kaj y ruwachulew.

18 »China junoq kuya ruwujil re jachbꞌal ibꞌ che ri rixoqil yey kakꞌuliꞌ tanchi rukꞌ juna chik ixoq, riꞌ kamakun chirij ri kꞌulanikil. Yey china ri kakꞌuliꞌ rukꞌ rixoq jachom kanoq, riꞌ jenelaꞌ kamakun chirij ri kꞌulanikil.

19 »Kꞌo jun achi lik bꞌeyom, e taq ruqꞌuꞌ kukojo ꞌanatal rukꞌ kꞌul morato*“Morato”: Kil “púrpura” pa vocabulario. y rukꞌ kꞌul lino rubꞌiꞌ, yey waꞌ lik kꞌi rajil. Rire ronoje qꞌij kuꞌan nimaq nimanik pa rocho. 20 Y chunaqaj kꞌu ri puerta katzꞌuyiꞌ jun nibꞌaꞌ Lázaro rubꞌiꞌ yey waꞌ lik kaqꞌolol rij che chꞌaꞌk. 21 Ekꞌu wa nibꞌaꞌ lik kurayij pan uwach ri qax katzaq chuxeꞌ rumexa ri bꞌeyom; yey kekꞌun taq ne lo ri tzꞌiꞌ y kakiriqꞌiraꞌ uwach rukꞌax kaqꞌololik.

22 »Xopon kꞌu jun qꞌij xkam ri nibꞌaꞌ y xkꞌam bꞌi kuma ri ángeles y xyaꞌ kꞌu putzal ri Abraham. Tekꞌuchiriꞌ, xkam ri bꞌeyom y xmuqik.

23 »Ekꞌuchiriꞌ kꞌo chi pa kꞌax ri bꞌeyom chupa ri luwar ke ri ekaminaq, chinimanaj xril pan ri Abraham rukꞌ ri Lázaro putzal. 24 Ekꞌu ri bꞌeyom xsikꞌin apanoq, jewaꞌ xubꞌiꞌij: “Nuqaw Abraham,†Ri aj Israel lik kakiyak uqꞌij ri Abraham y kakibꞌiꞌij kiqaw che, ma e nabꞌe kimam. chinjuchꞌ kaꞌn ko cheꞌla, taqa lo la ri Lázaro chaꞌ kumuꞌ ruwi uqꞌabꞌ pa yaꞌ re koluꞌjorij ri waqꞌ, ma lik kꞌax in kꞌo chupa wa aqꞌ” xcha che.

25 »Noꞌj ri Abraham xubꞌiꞌij pan che: “At wal, kꞌuna chakꞌuꞌx echiriꞌ at kꞌas che ruwachulew, lik xakꞌul janipa ri xarayij; noꞌj ri Lázaro lik kꞌax ri xukꞌul rire che rukꞌaslem che ruwachulew. Ekꞌu woꞌora rire lik utz uꞌanom wara, noꞌj riꞌat at kꞌo pa ri kꞌax.‡Wa jun versículo na e ta keꞌelawi konoje ri bꞌeyomabꞌ kebꞌek pa kꞌax y konoje ri nibꞌaꞌibꞌ kekolobꞌetajik. Ma ri Abraham mismo e jun achi lik bꞌeyom y rire xkolobꞌetajik. 26 Yey chiqaxoꞌl riꞌoj y riꞌat kꞌo jun nimalaj siwan. Ruma kꞌu waꞌ, ri e kꞌo wara na utz taj keqꞌax pan iwukꞌ; y ri e kꞌo iwukꞌ, na utz taj keqꞌax lo wara” xcha ri Abraham.

27 »Xubꞌiꞌij kꞌu ri bꞌeyom che: “Kantzꞌonoj ko cheꞌla, nuqaw Abraham, taqa bꞌi la ri Lázaro chirocho ri nuqaw chwachulew, 28 ma chilaꞌ e kꞌo kan woꞌobꞌ nuchaqꞌ. Taqa kꞌu bꞌi la ri Lázaro chaꞌ kebꞌuꞌpixabꞌaj y jelaꞌ na kepe ta rike chupa wa luwar re kꞌax pa wa in kꞌo wi riꞌin” xchaꞌ.

29 »Y ri Abraham xubꞌiꞌij che: “Kꞌo chi pakiqꞌabꞌ rike ri Tzij Pixabꞌ tzꞌibꞌital kan kuma ri Moisés y ri qꞌalajisanelabꞌ. ¡Ekꞌu kita ke riꞌ!” xchaꞌ.

30 »Ekꞌu ri bꞌeyom xubꞌiꞌij che: “Nuqaw Abraham, rike na kebꞌok ta il che waꞌ. Pero we ta e laꞌ kꞌo junoq kꞌastajinaq bꞌi chikixoꞌl ri ekaminaq yey kawinaqir chikiwach, riꞌ kakitzelej na kitzij chwach ri Dios” xchaꞌ.

31 »Ekꞌuchiriꞌ xubꞌiꞌij ri Abraham che: “We rike na kebꞌok ta il che ri kitzꞌibꞌam kan ri Moisés y ri qꞌalajisanelabꞌ, na kakijalkꞌatij ta ri kibꞌinik kisilabꞌik tobꞌ ne kawinaqir chikiwach junoq kꞌastajinaq bꞌi chikixoꞌl ri ekaminaq” xcha ri Abraham.»