1 »Ri kuꞌana pa rutaqanik ri Dios petinaq chilaꞌ chikaj, e jelaꞌ pachaꞌ ri xkikꞌulumaj lajuj qꞌapoj alito echiriꞌ xkikꞌam bꞌi ri kicandil y xebꞌek pa jun kꞌulanikil re keꞌkikꞌulu rala kakꞌuliꞌik. 2 E kꞌo kꞌu woꞌobꞌ chike lik kꞌo kinaꞌoj y ri woꞌobꞌ chik na jinta kinaꞌoj.

3 »Ri woꞌobꞌ na jinta kinaꞌoj xkikꞌam bꞌi ri kicandil, pero na xkikꞌam tubꞌi aceite re kakinojisaj tanchik.*E rojertan e aceite ꞌanom rukꞌ ruwach ri cheꞌ re olivo ri kakoj chupa ri candil chaꞌ kawon ri mecha. 4 Ekꞌu ri kꞌo kinaꞌoj kinojisam bꞌi ri kicandil che aceite, yey pa rewi kukꞌaꞌam aceite pa jun chik kꞌolibꞌal.

5 Ekꞌu rala kakꞌuliꞌik xmayin che ri roponik. Ruma kꞌu riꞌ, ralito xkijeqo keyuxkꞌaꞌtik y xok lo kiwaram.

6 »Pa tikꞌil aqꞌabꞌ kꞌut, xtataj jun kasikꞌinik, jewaꞌ kubꞌiꞌij: “¡Rala xkꞌunik! ¡Chixela lo che ukꞌulik!” 7 Konoje kꞌu ri qꞌapoj alito xeyaktajik y xkijeq uyijbꞌaxik ri kicandil.

8 »Ekꞌu ri woꞌobꞌ alito na jinta kinaꞌoj jewaꞌ xkibꞌiꞌij chike ri lik kꞌo kinaꞌoj: “Chiyaꞌa jubꞌiqꞌ qaceite che ri kꞌo iwukꞌ riꞌix, ma ri qacandil riꞌoj katajin uchupik.”

9 »Noꞌj ri woꞌobꞌ chik jewaꞌ xkikꞌul uwach: “We kaqaya iwe riꞌix, na kuꞌan ta riꞌ qe qonoje. Jiꞌtzukuj kꞌu iweꞌix pa kakꞌayix wi y chiloqꞌoꞌ.”

10 »Ekꞌuchiriꞌ ebꞌelinaq bꞌi ri woꞌobꞌ che uloqꞌik aceite, xkꞌun lo rala. Ralito kꞌo kinaꞌoj, ri kiyijbꞌam chi pan ri kicandil, xebꞌok junam rukꞌ rala pa kꞌulanikil y xtzꞌapix kꞌu lo ri puerta.

11 »Tekꞌuchiriꞌ, xetzelej lo ri woꞌobꞌ alito y xechꞌaw apanoq: “Qajawal, qajawal, jaqa lo la ri puerta chiqe.”

12 »Ekꞌu rala kakꞌuliꞌik xukꞌul lo uwach: “Paqatzij wi kambꞌiꞌij chiwe: Na wetaꞌam ta kꞌana iwach.”

13 »Mawar kꞌu iwach riꞌ riꞌix, ma na iwetaꞌam tane ruqꞌijol y ruꞌorayil echiriꞌ kakꞌun lo Ralaxel Chikixoꞌl Tikawex.

14 »Ri kuꞌana pa rutaqanik ri Dios petinaq chilaꞌ chikaj, e pachaꞌ ri xuꞌan jun achi echiriꞌ xeꞌek pa jun luwar lik naj; xebꞌusikꞌij kꞌu ri raj chakibꞌ y xuya kan rupuaq pakiqꞌabꞌ. 15 Che jun xuya kan woꞌobꞌ mil, che jun chik xuya kan kaꞌibꞌ mil y che jun chik xuya kan mil. Wa xyaꞌ kan chike e chirij ri kakichꞌij uchakuxik. Ekꞌuchiriꞌ, xeꞌek naj.

16 »Ekꞌu raj chak xkꞌamaw kan ri woꞌobꞌ mil, xuꞌan ukꞌay rukꞌ y jelaꞌ xuchꞌak chi woꞌobꞌ mil puwiꞌ. 17 Jekꞌulaꞌ xuꞌan ri xkꞌamaw kan kebꞌ mil, xuchꞌak chi kebꞌ mil puwiꞌ. 18 Noꞌj ri xkꞌamaw kan jun mil, xukꞌot jun jul y chupa waꞌ xrewaj ri puaq yaꞌtal puqꞌabꞌ ruma ri rajaw.

19 »Ikꞌowinaq chi kꞌu ukꞌiyal qꞌij, xtzelej tanchi lo ri kajaw raj chakibꞌ y xutzꞌonoj kꞌu chike saꞌ ri xkiꞌan rukꞌ rupuaq. 20 Nabꞌe xopon ri raj chak ri ukꞌamom kan woꞌobꞌ mil. Xuya kꞌu che ri rajaw ri woꞌobꞌ mil chik xuchꞌak puwi ri yaꞌom kan che y jewaꞌ xubꞌiꞌij: “Wajaw, riꞌ ri woꞌobꞌ mil xya kan la chwe y riꞌ chi woꞌobꞌ mil, waꞌ e xinchꞌak puwi ri xya kan la chwe” xchaꞌ.

21 »Ri rajaw xubꞌiꞌij kꞌu che: “Utz riꞌ, riꞌat at utzilaj waj chak y lik at jusukꞌ; ma jusukꞌ xachakuj ri xa jubꞌiqꞌ yaꞌtal kan paqꞌabꞌ. E uwariꞌche woꞌora lik kꞌi ri kanya paqꞌabꞌ. Chatokoq y chatkiꞌkota wukꞌ” xchaꞌ.

22 »Tekꞌuchiriꞌ, xopon raj chak ri ukꞌamom kan kaꞌibꞌ mil y xubꞌiꞌij che: “Wajawal, riꞌ ri kaꞌibꞌ mil xya kan la chwe y riꞌ chi kaꞌibꞌ mil kanya cheꞌla, waꞌ e xinchꞌak puwi ri xya kan la chwe” xchaꞌ.

23 »Ri rajaw xubꞌiꞌij kꞌu che: “Utz riꞌ, at utzilaj waj chak y lik at jusukꞌ; ma jusukꞌ xachakuj ri xa jubꞌiqꞌ yaꞌtal kan paqꞌabꞌ. E uwariꞌche woꞌora lik kꞌi ri kanya paqꞌabꞌ. Chatokoq y lik chatkiꞌkota wukꞌ” xchaꞌ.

24 »Ekꞌuchiriꞌ, xopon ri jun chik aj chak ri yaꞌom kan xa jun mil che, y jewaꞌ xubꞌiꞌij che ri rajaw: “Wajaw, riꞌin wetaꞌam lal jun achi lik titzꞌitik, ma kaꞌan la molonik pa na awaninaq ta wi la yey kamolon ne la pa na jinta jopopem wi la. 25 E uwariꞌche riꞌin lik xinxiꞌij wibꞌ. Xinꞌek kꞌut y xinmuq ri puaq la pulew. Riꞌ ri mil yaꞌom kan la chwe, ma e la” xchaꞌ.

26 »Ri rajaw xubꞌiꞌij che: “At jun waj chak lik na utz taj y at xepu. We xachꞌobꞌo kanꞌan molonik pa na in awaninaq ta wi yey kanmol pa na jinta nujopopem wi, 27 xaꞌyaꞌa ta kꞌu riꞌ ri nupuaq pa juna banco chaꞌ echiriꞌ kintzelej loq, kankꞌul ri nupuaq junam rukꞌ ruchꞌakom chik” xchaꞌ.

28 »Tekꞌuchiriꞌ, xubꞌiꞌij chike jujun chik raj chak e kꞌo chiriꞌ: “Chimaja che wa jun aj chak ri mil kꞌo rukꞌ y chiyaꞌa che ri kꞌo lajuj mil rukꞌ. 29 Ma china ri lik kꞌi kꞌo rukꞌ, kayaꞌiꞌ más che y jelaꞌ kakꞌojiꞌ ne uwiꞌ ri kꞌo rukꞌ. Noꞌj ri na jinta kꞌo rukꞌ, kamaj ne che ri xa jubꞌiqꞌ kꞌo rukꞌ. 30 Ekꞌu waꞌ wa jun aj chak na jinta uchak, jiꞌkꞌaqa bꞌi pa ri qꞌequꞌm; chiriꞌ kꞌu riꞌ koqꞌ wi y kaqichꞌichꞌ wi ruwiꞌ reꞌ” xchaꞌ.

31 »Echiriꞌ Ralaxel Chikixoꞌl Tikawex kakꞌun rukꞌ runimal uchuqꞌabꞌ kukꞌ konoje ri santowilaj ángeles, katzꞌuyiꞌ na kꞌu riꞌ chupa ri chomilaj tzꞌulibꞌal re rutaqanik. 32 Konoje taq kꞌu ri tinamit che ruwachulew kakimol kibꞌ chwach y Rire kujach kipa chikijujunal, jelaꞌ pachaꞌ kuꞌan juna chajinel kebꞌeresaj ri bꞌexex chikixoꞌl ri kaprux. 33 Kebꞌuya kꞌu ri bꞌexex puwikiqꞌabꞌ Rire yey ri kaprux kebꞌuya pumox.

34 »Ekꞌuchiriꞌ, ri rey kubꞌiꞌij chike ri e kꞌo puwikiqꞌabꞌ Rire: “¡Chixpetoq! ¡Lik nim iqꞌij iwalaxik riꞌix! Chixok kꞌu chupa rutaqanik ri Dios y chikꞌulu janipa ri uyijbꞌam chi pan chiwe chwi lo ri jeqebꞌal re ruwachulew. 35 Ma xinkꞌojiꞌ pa numik y riꞌix xiya nuwa; xinkꞌojiꞌ pa tzajin chiꞌ y riꞌix xiya numiqꞌinaꞌ; xintzukuj pa kinkanaj kan wi y riꞌix xinikꞌul pa iwocho. 36 Na jinta ko nuqꞌuꞌ y riꞌix xiya nuqꞌuꞌ; xinkꞌojiꞌ pa yabꞌil y xixeꞌbꞌina wukꞌ; xinkꞌojiꞌ pa cárcel y xiniꞌwilaꞌ” kachaꞌ.

37 »Ekꞌu ri e jusukꞌ echiriꞌ kakita waꞌ, jewaꞌ kakibꞌiꞌij: “Qajawal, ¿jampalaꞌ xqil la lal kꞌo la pa numik y xqaya wa la? ¿Jampalaꞌ xqil la lal kꞌo la pa tzajin chiꞌ y xqaya miqꞌinaꞌ la? 38 ¿Jampalaꞌ xqil la katzukuj la pa kakanaj kan wi la y xqakꞌul la pa qocho? ¿Jampalaꞌ xqil la na jinta qꞌuꞌ la y xqaya qꞌuꞌ la? 39 ¿Jampalaꞌ xqil la lal yewaꞌ o kꞌo la pa cárcel yey xeꞌqila la?” kechaꞌ.

40 »Y ri rey kukꞌul uwach chike: “Paqatzij wi kambꞌiꞌij chiwe: Ronoje kꞌu ri xiꞌan chike wa watz-nuchaqꞌ na jinta ko kiwach, chwe riꞌin xiꞌan wi” kachaꞌ.

41 »Ekꞌuchiriꞌ, kubꞌiꞌij ri rey chike ri e kꞌo pumox: “Riꞌix itzel iwachlibꞌal, chixela wukꞌ; kixꞌek kꞌu chupa ri aqꞌ na kachup ta chik, ri yijbꞌital chi pan che ritzel winaq kukꞌ konoje ru ángeles eteran chirij. 42 Ma riꞌin xinkꞌojiꞌ pa numik yey riꞌix na xiya ta nuwa; xinkꞌojiꞌ pa tzajin chiꞌ, yey riꞌix na xiya ta numiqꞌinaꞌ. 43 Xintzukuj pa kinkanaj kan wi, yey riꞌix na xinikꞌul ta pa iwocho. Na jinta ko nuqꞌuꞌ, yey riꞌix na xiya ta nuqꞌuꞌ. Xinkꞌojiꞌ pa yabꞌil y xinkꞌojiꞌ pa cárcel, yey riꞌix na xiniꞌwila taj” kachaꞌ.

44 »Ekꞌuchiriꞌ, kakibꞌiꞌij rike che: “Qajawal, ¿jampalaꞌ xqil la kanum la yey katzajin chiꞌ la? ¿Jampalaꞌ xqil la katzukuj la pa kakanaj kan wi la? ¿Jampalaꞌ xqil la na jinta qꞌuꞌ la? ¿Jampalaꞌ xqil la lal yewaꞌ o kꞌo la pa cárcel, yey riꞌoj na xqanimaj ta la?” kechaꞌ.

45 »Ri rey kukꞌul kꞌu uwach chike: “Paqatzij wi kambꞌiꞌij chiwe: Ronoje ri na xiꞌan ta chike wa watz-nuchaqꞌ na jinta ko kiwach, chwe riꞌin na xiꞌan ta wi” kachaꞌ.

46 »Konoje kꞌu riꞌ waꞌ kebꞌek pa ri kꞌaxkꞌobꞌik na jinta utaqexik, noꞌj ri e jusukꞌ kebꞌek pa ri kꞌaslemal na jinta utaqexik» xcha ri Jesús.