1 Echiriꞌ ri Jesús xukꞌis ubꞌiꞌxikil ronoje waꞌ, jewaꞌ xubꞌiꞌij chike rutijoꞌn: 2 «Riꞌix iwetaꞌam pa kebꞌ qꞌij kakꞌun lo ri nimaqꞌij Pascua; chupa kꞌu riꞌ wa nimaqꞌij, Ralaxel Chikixoꞌl Tikawex kayaꞌ pa kamik chwa cruz» xchaꞌ.

3 Ekꞌu ri nimaq e aj chakunel pa Rocho Dios kukꞌ raj kꞌutunel re ri tzijpixabꞌ y ri nimaq winaq e aj wach re ri tinamit, xkimol kibꞌ che ruwa ja re ri palacio re ri Caifás, ri kajawal raj chakunel pa Rocho Dios. 4 Chiriꞌ xkichꞌaꞌtibꞌej chikiwach suꞌanik kakichap ri Jesús rukꞌ sokosoꞌnik re kakikamisaj. 5 Xkibꞌiꞌij kꞌu chikiwach: «Na kaqaꞌan ta pa ri nimaqꞌij chaꞌ ri tinamit na ketukuk ta ruma waꞌ» xechaꞌ.

6 Ri Jesús kꞌo pa ri tinamit Betania chirocho ri Simón, ri jun xkꞌojiꞌ ri yabꞌil lepra che. 7 Xkꞌun kꞌu jun ixoq rukꞌaꞌam jun kꞌolibꞌal nojinaq che kunabꞌal lik kiꞌ ruxlabꞌ y lik kꞌi rajil. Xqibꞌ kꞌu rukꞌ ri Jesús y xuqꞌej ri kunabꞌal chuꞌjolom echiriꞌ Rire tzꞌul chwa ri mexa.

8 Echiriꞌ xkil waꞌ rutijoꞌn, lik xpe koyowal che y jewaꞌ xkibꞌiꞌij chikiwach:

—¿Suꞌchak wa kunabꞌal xtzꞌiloꞌxik? 9 Ma ri lik usukꞌ e ta xkꞌayix waꞌ chi ukꞌiyal puaq, y rukꞌ kꞌu riꞌ ketoꞌ ri nibꞌaꞌibꞌ —xechaꞌ.

10 Ekꞌu ri Jesús retaꞌam saꞌ ri kakibꞌiꞌij chikiwach; ruma kꞌu riꞌ, jewaꞌ xubꞌiꞌij chike:

—¿Suꞌchak kixchꞌaꞌt chirij ri xuꞌan wiꞌxoq? Ma ri xuꞌan chwe e jun utzilaj chak. 11 Ri nibꞌaꞌibꞌ e laꞌ xaqi e kꞌo iwukꞌ; noꞌj riꞌin na xaqi ta in kꞌo iwukꞌ. 12 Yey wa xuꞌan wiꞌxoq echiriꞌ xuqꞌej wa kunabꞌal panuwiꞌ, waꞌ re uyijbꞌaxik pan ri nucuerpo re ri muqubꞌal we.*Echiriꞌ kakam junoq, raj judiꞌabꞌ kakatinisaj ri cuerpo y kakikoj kunabꞌal kiꞌ ruxlabꞌ che. 13 Paqatzij wi kambꞌiꞌij chiwe: Pa taq katzijox wi wa Utzilaj Tzij che ronoje ruwachulew, kakuxtax kꞌu wiꞌxoq ruma ri xuꞌano —xchaꞌ.

14 Jun kꞌu chike ri kabꞌlajuj utijoꞌn ri Jesús, Judas aj Iscariot rubꞌiꞌ, xeꞌek kukꞌ ri nimaq e aj chakunel pa Rocho Dios 15 y jewaꞌ xubꞌiꞌij chike:

—¿Saꞌ ri kaya alaq chwe we kanya ri Jesús paqꞌabꞌ alaq? —xchaꞌ. Ekꞌu rike xkibꞌiꞌij kakitoj treinta saqil puaq re plata che.

16 Chwi kꞌu riꞌ, ri Judas xujeq utzukuxik suꞌanik kuya ri Jesús pakiqꞌabꞌ.

17 Chupa kꞌu ri nabꞌe qꞌij re ri nimaqꞌij echiriꞌ katij ri pam na jinta levadura che, rutijoꞌn ri Jesús xeqibꞌ rukꞌ y xkitzꞌonoj che:

—¿Pa kaꞌaj wi la keꞌqayijbꞌaꞌ wi ri cena re ri nimaqꞌij Pascua? —xechaꞌ.

18 Ri Jesús xubꞌiꞌij kꞌu chike:

—Jix pa ri tinamit y chilaꞌ kiꞌriqa jun achi; chibꞌiꞌij kꞌu che: “Ri tijonel qeꞌoj jewaꞌ kubꞌiꞌij: Ri nuqꞌijol riꞌin xa naqaj chi kꞌo wuloq, y chupa ri ocho la kanꞌan wi ri nimaqꞌij Pascua junam kukꞌ ri nutijoꞌn” —xchaꞌ.

19 Rutijoꞌn ri Jesús e xkiꞌano jelaꞌ pachaꞌ ri xebꞌutaq Rire che, xeꞌkiyijbꞌaꞌ kꞌu ri cena re ri nimaqꞌij Pascua.

20 Echiriꞌ xok raqꞌabꞌ, ri Jesús xok chwa ri mexa junam kukꞌ ri kabꞌlajuj utijoꞌn. 21 Ekꞌuchiriꞌ kewaꞌik, ri Jesús xubꞌiꞌij chike:

—Paqatzij wi kambꞌiꞌij chiwe: Kꞌo jun chiwe riꞌix kakꞌayin we —xchaꞌ.

22 Ekꞌuchiriꞌ, rutijoꞌn lik xebꞌuchap bꞌis y xkijeq chikijujunal kakitzꞌonoj che:

—Qajawal, ¿kꞌaxtaj in riꞌ? —kechaꞌ.

23 Ri Jesús xukꞌul uwach:

—E ri kumuꞌ lo rupam junam wukꞌ chupa ri laq, e riꞌ ri kakꞌayin we riꞌin. 24 Paqatzij wi Ralaxel Chikixoꞌl Tikawex e katajin che rikꞌowibꞌexik janipa ri tzꞌibꞌital kan puwi Rire chupa Ruchꞌaꞌtem ri Dios. Pero ¡lik toqꞌoꞌ uwach rachi kakꞌayin re! E ne más utz che waꞌchi tamaji xalaxik —xchaꞌ.

25 Ekꞌuchiriꞌ, xchꞌaw ri Judas, ri jun kukꞌayij ri Jesús, jewaꞌ xubꞌiꞌij:

—Wajawal, ¿kꞌaxtaj in riꞌ? —xchaꞌ.

Ri Jesús xukꞌul uwach:

—Areꞌ; at xatbꞌiꞌn re —xchaꞌ.

26 Xaloqꞌ kꞌu riꞌ kewaꞌik, ri Jesús xukꞌam ri pam y xutioxij che ri Dios. Tekꞌuchiriꞌ xuwechꞌo, xujach chike rutijoꞌn y jekꞌuwaꞌ xubꞌiꞌij:

—Chikꞌamaꞌ y chitijaꞌ, ma e nucuerpo waꞌ —xchaꞌ.

27 Tekꞌuchiriꞌ xukꞌam ri kꞌolibꞌal kꞌo vino chupa, xutioxij che ri Dios, xuya chike y jekꞌuwaꞌ xubꞌiꞌij:

—Chitija iwonoje chuchiꞌ waꞌ wa kꞌolibꞌal kꞌo vino chupa, 28 ma e nukikꞌel waꞌ, ri katuruw na kuma ukꞌiyal tikawex re kuybꞌal kimak, yey e kujikibꞌaꞌ uwach ri kꞌakꞌ tzij.*Jer. 31:31-34 29 Y kambꞌiꞌij kꞌu chiwe: Chwi woꞌora na kantij ta chi ruwaꞌal uva kꞌate kiꞌntija tanchi junam iwukꞌ chupa ruqꞌijol rutaqanik ri Nuqaw —xchaꞌ.

30 Echiriꞌ xkikꞌis ubꞌixoxik ri bꞌix,†Kꞌisbꞌal re ri cena re Pascua, ri e aj judiꞌabꞌ kakibꞌixoj ri Salmos 115–118. xebꞌek chwa ri juyubꞌ Olivos. 31 Ekꞌuchiriꞌ, ri Jesús xubꞌiꞌij chike:

—Waqꞌabꞌ iwonoje riꞌix kiwesaj na iwibꞌ chwij, ma e pachaꞌ kubꞌiꞌij Ruchꞌaꞌtem ri Dios:

33 Ekꞌu ri Pedro xukꞌul uwach:

—Tobꞌ ne konoje kakesaj kibꞌ chiꞌij la, riꞌin na kanꞌan ta kꞌana waꞌ —xchaꞌ.

34 Yey ri Jesús xukꞌul uwach:

—Paqatzij wi kambꞌiꞌij chawe: Wa jun aqꞌabꞌ echiriꞌ kꞌamajaꞌ ne kabꞌixon ri teren, riꞌat oxlaj chik abꞌiꞌim na awetaꞌam ta nuwach —xchaꞌ.

35 Xubꞌiꞌij kꞌu ri Pedro che:

—Tobꞌ ne chirajawaxik kinkam junam ukꞌ la, riꞌin na kanwewaj taj wetaꞌam wach la —xchaꞌ. Jekꞌulaꞌ riꞌ xkibꞌiꞌij konoje rutijoꞌn.

36 Tekꞌuchiriꞌ, ri Jesús xebꞌukꞌam bꞌi rutijoꞌn pa jun luwar Getsemaní rubꞌiꞌ, y xubꞌiꞌij kꞌu chike:

—Chixtzꞌula kan wara, noꞌj riꞌin kiꞌnꞌana orar chileꞌ apanoq —xchaꞌ.

37 Yey xebꞌukꞌam kꞌu bꞌi ri Pedro y ri kebꞌ ukꞌajol ri Zebedeo rukꞌ. Y xujeq kꞌu riꞌ lik kabꞌisonik y lik kakꞌaxkꞌobꞌ ri ranimaꞌ. 38 Ekꞌuchiriꞌ, xubꞌiꞌij chike:

—Kꞌo jun unimal bꞌis re kamik chinukꞌuꞌx. Chixkꞌola kan wara; mixwarik, e lik chiꞌana orar wukꞌ —xchaꞌ.

39 Tekꞌuchiriꞌ, Rire xqibꞌ chi pan jubꞌiqꞌ chwach, xuxukubꞌaꞌ ribꞌ y xuqasaj umejelem kꞌa chuꞌlew, y xuꞌan kꞌu orar, jewaꞌ xubꞌiꞌij:

40 Tekꞌuchiriꞌ, xtzelej lo pa e kꞌo wi kan rutijoꞌn y xebꞌoꞌluꞌriqaꞌ kewarik. Xubꞌiꞌij kꞌu che ri Pedro:

—¿Lik kami na xichꞌij ta kꞌana ri waram chaꞌ kiꞌan orar wukꞌ, tobꞌ tane xa juna ora? 41 Mixwar kꞌut y lik chiꞌana orar chaꞌ kichꞌij uchuqꞌabꞌ ri kꞌambꞌal ipa kapetik. Paqatzij wi, lik kacha ikꞌuꞌx che uꞌanik ri utz, pero waꞌ lik kꞌayew chiwe ma e ri itiꞌjil na jinta ukowil —xchaꞌ.

42 Xeꞌek tanchi chukalaj, xuꞌana orar, jewaꞌ xubꞌiꞌij:

43 Tekꞌuchiriꞌ, xtzelej tanchi lo kukꞌ rutijoꞌn y xebꞌoꞌluꞌriqaꞌ kewarik, ma ri kiwach lik na kukuy ta chi ri waram.

44 Xebꞌuya tanchi kanoq y xuꞌana orar churox laj, yey e mismo ri xutzꞌonoj che ri Dios.

45 Ekꞌuchiriꞌ, xeꞌek tanchi pa e kꞌo wi kan rutijoꞌn y xubꞌiꞌij chike:

—¿Kꞌa kixwar kami riꞌ riꞌix? ¿Kꞌa kixuxlanik? Ma e waꞌ xopon ruꞌorayil chaꞌ Ralaxel Chikixoꞌl Tikawex kayaꞌ pakiqꞌabꞌ raj makibꞌ. 46 ¡Chixwaꞌlijoq! ¡Joꞌ! Ma ri kakꞌayin we riꞌin e laꞌ xkꞌunik —xchaꞌ.

47 Kꞌa kachꞌaꞌt ne ri Jesús echiriꞌ xkꞌun lo ri Judas, jun chike ri kabꞌlajuj utijoꞌn. Ekꞌu rire erachbꞌilam lo ukꞌiyal winaq kukꞌaꞌam lo espada y cheꞌ. Taq waꞌ etaqom lo kuma ri nimaq e aj chakunel pa Rocho Dios y kuma ri nimaq winaq re ri tinamit. 48 Ekꞌu ri Judas, ri kayaꞌw bꞌi re pakiqꞌabꞌ, ubꞌiꞌim chi lo chike suꞌanik kaketaꞌmaj china ri kakichapo, jewaꞌ ubꞌiꞌim: «E ri jun kantzꞌubꞌ uchiꞌ, e riꞌ rire. Chapa kꞌu bꞌi alaq.»

49 Xqibꞌ kꞌu ri Judas rukꞌ ri Jesús y xuya rutzil uwach, xubꞌiꞌij che:

—Wajawal —xchaꞌ. Y xutzꞌubꞌ uchiꞌ.

50 Ekꞌu ri Jesús xubꞌiꞌij che:

—Wamigo, ¿saꞌ ri kolaꞌanaꞌ? —xchaꞌ.

Tekꞌuchiriꞌ, xeqibꞌ ri winaq rukꞌ y xkichapo chaꞌ kakikꞌam bꞌi pa qꞌatbꞌal tzij.

51 Kꞌo kꞌu jun chike ri e kꞌo rukꞌ ri Jesús, xresaj lo ru espada y xujochij bꞌi jun uxikin ri raj chak ri kajawal raj chakunel pa Rocho Dios.

52 Ekꞌu ri Jesús xubꞌiꞌij che:

—Chakꞌolo ra espada chupa rukꞌolibꞌal; ma konoje ri kechꞌoꞌjin rukꞌ espada, rukꞌ espada kekamik. 53 ¿Na awetaꞌam ta kami, we ta kuaj riꞌin kantzꞌonoj che ri Nuqaw woꞌora, Rire kebꞌutaq lo juna kabꞌlajuj legiones‡Jun legión e kꞌo waqibꞌ mil soldados che. re ángeles wukꞌ? 54 Noꞌj we ta e xinꞌan riꞌ, ¿suꞌanik kꞌu riꞌ kuꞌana janipa ri kubꞌiꞌij Ruchꞌaꞌtem ri Dios panuwi riꞌin? —xchaꞌ. 55 Ekꞌuchiriꞌ, xubꞌiꞌij chike ri soldados:

—¿Suꞌchak petinaq alaq rukꞌ espada y cheꞌ? ¿Petinaq kami alaq che ukꞌamik bꞌi juna eleqꞌom? Wa petinaq loq ronoje qꞌij waꞌ kꞌut in tzꞌuyiꞌnaq chiwach alaq, e laꞌ kinkꞌutun pa ri Rocho Dios. ¿Suꞌchak kꞌu riꞌ kꞌa e laꞌ kinoꞌlchapa alaq? 56 Noꞌj jekꞌuwaꞌ kuꞌano chaꞌ e kuꞌana ri kiqꞌalajisam kan ri qꞌalajisanelabꞌ pa Ruchꞌaꞌtem ri Dios —xchaꞌ.

Tekꞌuchiriꞌ, konoje rutijoꞌn xebꞌanimajik y jelaꞌ xkiya kan ri Jesús.

57 Ri xechapaw bꞌi ri Jesús xkikꞌam bꞌi chwach ri Caifás, ri kajawal raj chakunel pa Rocho Dios, pa kimolom wi kibꞌ raj kꞌutunel re ri tzijpixabꞌ y ri nimaq winaq re ri tinamit.

58 Ekꞌu ri Pedro xa naj teran pan chirij ri Jesús, jelaꞌ xeꞌela che ruwa ja re ri rocho ri kajawal raj chakunel pa Rocho Dios. Xok kꞌu bꞌi y xeꞌtzꞌula kukꞌ ri e chajinel chaꞌ karilo saꞌ ri kukꞌisbꞌej ronoje waꞌ.

59 Ri nimaq e aj chakunel pa Rocho Dios kukꞌ taq ri nimaq winaq y konoje ri uchapom wi ribꞌ ri qꞌatbꞌal tzij, kakitzukuj suꞌanik kakitzꞌaq uchiꞌ ri Jesús chaꞌ jelaꞌ utz kaqꞌat tzij re kamik puwiꞌ. 60 Noꞌj na jinta kꞌo xkiriq chirij, tobꞌ ukꞌiyal winaq xkinukꞌ raqꞌubꞌal chirij. Tekꞌuchiriꞌ, xebꞌopon na kaꞌibꞌ xeꞌkitzꞌaqa uchiꞌ rukꞌ raqꞌubꞌal, 61 jewaꞌ xkibꞌiꞌij:

—Waꞌ waꞌchi jewaꞌ xubꞌiꞌij: “Riꞌin kꞌo panuqꞌabꞌ kanwulij ri Rocho Dios y xa pa oxibꞌ qꞌij kanyak tanchik” —xechaꞌ.

62 Ewi ri kajawal raj chakunel pa Rocho Dios xyaktajik y xubꞌiꞌij che ri Jesús:

—¿E kami laꞌ na jinta kꞌana kabꞌiꞌij riꞌat? ¿Saꞌ kꞌu ri kakꞌulubꞌej uwach puwi wa ketajin che ukojik chawij? —xchaꞌ.

63 Noꞌj ri Jesús na jinta kꞌo xubꞌiꞌij. Ekꞌuchiriꞌ, jewaꞌ xubꞌiꞌij ri kajawal raj chakunel pa Rocho Dios:

—Chabꞌiꞌij chupa rubꞌiꞌ ri Dios kꞌaslik, we riꞌat at ri Cristo, Rukꞌajol ri Dios —xchaꞌ.

64 Ri Jesús xubꞌiꞌij che:

—Areꞌ, e ri xbꞌiꞌij la. Y kambꞌiꞌij kꞌu che onoje alaq: Kil na kꞌu alaq Ralaxel Chikixoꞌl Tikawex tzꞌul puwikiqꞌabꞌ ri Dios, ri lik kꞌo unimal uchuqꞌabꞌ yey kil kꞌu alaq riꞌ echiriꞌ kakꞌun lo pa sutzꞌ chwa ri kaj*Dn. 7:13; Ap. 1:7 —xchaꞌ.

65 Ekꞌu ri kajawal raj chakunel pa Rocho Dios xurichꞌij ruqꞌuꞌ y xubꞌiꞌij:

—Waꞌ waꞌchi lik xmakun chirij ri Dios rukꞌ wa xubꞌiꞌij. ¡Na jinta chi uchak más e aj kojol umak! Ma lik e laꞌ xta alaq xubꞌiꞌij ri na taqal ta che. 66 ¿Saꞌ kꞌu riꞌ kabꞌiꞌij ralaq che? —xchaꞌ.

Rike xkibꞌiꞌij:

—Lik chirij umak y taqal kꞌu che kakamisaxik —xechaꞌ.

67 Ewi e kꞌo jujun xkijeq kakichubꞌaj rupalaj y lik kakiꞌan pa tꞌoꞌy. E kꞌo jujun chik xkipachꞌ qꞌabꞌ chupalaj 68 y kakibꞌiꞌij che:

—At ri Cristo, Ruchaꞌoꞌn lo ri Dios, ¡chanaꞌij pe kꞌu riꞌ china xchꞌayaw awe! —kecha che.

69 Ekꞌu ri Pedro tzꞌul che ruwa ja echiriꞌ jun ali aj chak xqibꞌ rukꞌ y xubꞌiꞌij che:

—Rilal lal jun chike ri eteran chirij ri Jesús, ri jun aj Galilea —xchaꞌ.

70 Noꞌj ri Pedro xrewaj chikiwach konoje, jewaꞌ xubꞌiꞌij:

—Riꞌin na wetaꞌam tane saꞌ puwiꞌ katchꞌaꞌt wi —xchaꞌ.

71 Ekꞌu riꞌ kel bꞌi ri Pedro chuchiꞌ ri puerta yey xilitaj ruma jun chik ali aj chak, y waꞌli jewaꞌ xubꞌiꞌij chike ri e kꞌo chiriꞌ:

—Waꞌ wa jun achi e jun chike ri eteran chirij ri Jesús ri aj Nazaret —xchaꞌ.

72 Ri Pedro xrewaj tanchik y lik xujikibꞌaꞌ uwach ubꞌiꞌxikil:

—Riꞌin na wetaꞌam ta kꞌana uwach laꞌ laꞌchi —xchaꞌ.

73 Joqꞌotaj kꞌu riꞌ, ri e kꞌo chiriꞌ xeqibꞌ rukꞌ ri Pedro y xkibꞌiꞌij che:

—Paqatzij wi rilal lal jun chike rutijoꞌn; ma lik qꞌalaj, ri kachꞌaꞌt la e junam rukꞌ ri kechꞌaꞌt rike —xechaꞌ.

74 Ekꞌu ri Pedro xujeq ubꞌiꞌxikil itzel taq tzij y lik xujikibꞌaꞌ uwach, xubꞌiꞌij:

—Riꞌin na wetaꞌam ta kꞌana uwach laꞌ laꞌchi —xchaꞌ.

Xew xukꞌis ubꞌiꞌxikil waꞌ, xbꞌixon lo ri teren. 75 Ekꞌuchiriꞌ, xkꞌun lo chukꞌuꞌx ri Pedro ri xbꞌiꞌx lo che ruma ri Jesús: «Kꞌamajaꞌ ne kabꞌixon ri teren, riꞌat oxlaj chik abꞌiꞌim na awetaꞌam ta nuwach.» Ewi xel bꞌi ri Pedro chiriꞌ y lik xoqꞌik ruma rukꞌaxkꞌolil ukꞌuꞌx.