1 Echiriꞌ xsaqirik, konoje ri nimaq e aj chakunel pa Rocho Dios kukꞌ ri nimaq winaq re ri tinamit, xkiꞌan tzij chikiwach puwi ri kakiꞌano chaꞌ kaqꞌat tzij re kamik puwi ri Jesús. 2 Yutum kꞌu ri Jesús, xkikꞌam bꞌi y xeꞌkiyaꞌa chwach ri taqanel Poncio Pilato.

3 Ri Judas ri xkꞌayin re ri Jesús, echiriꞌ xrilo xqꞌat tzij re kamik puwi ri Jesús, lik xok chukꞌuꞌx ri xuꞌano. Xeꞌek kꞌut y xutzelej ri treinta saqil puaq chike ri nimaq e aj chakunel pa Rocho Dios y chike ri nimaq winaq. 4 Xubꞌiꞌij kꞌu chike:

—Riꞌin lik in makuninaq, ma xinkꞌayij pa kamik jun achi na jinta umak —xchaꞌ.

Pero rike xkibꞌiꞌij che:

—Na jinta qe riꞌoj che laꞌ; laꞌ amak riꞌat —xechaꞌ.

5 Ekꞌuchiriꞌ, ri Judas xuꞌkꞌaqa kan ri puaq pa ri Rocho Dios y xeꞌek kꞌut xuꞌjitzꞌaj ribꞌ.

6 Ri nimaq e aj chakunel pa ri Rocho Dios xeꞌkimolo ri puaq y xkibꞌiꞌij: «Waꞌ wa puaq na ubꞌe ta kꞌenoq kaqaya pa ri kaxa re qasaꞌn, ma waꞌ rajil ukikꞌel jun achi» xechaꞌ.

7 Tekꞌuchiriꞌ, xkiꞌan tzij chikiwach chaꞌ rukꞌ waꞌ wa puaq kakiloqꞌ juchꞌaqap ulew rubꞌiꞌ “Luwar re ri aj tzꞌaqal xoqꞌoꞌl”, chaꞌ kuꞌana jun luwar re muqubꞌal ke ri na e ta aj Israel. 8 Ruma kꞌu laꞌ, la jun ulew kꞌa e ubꞌiꞌ waqꞌij ora “Luwar re kikꞌ”. 9 Ekꞌu xuꞌan pachaꞌ ri tzꞌibꞌital kan ruma ri qꞌalajisanel Jeremías pa Ruchꞌaꞌtem ri Dios, pa kubꞌiꞌij wi:

11 Ekꞌuchiriꞌ xkꞌam bꞌi ri Jesús chwach ri taqanel Pilato, rire xutzꞌonoj che ri Jesús:

—¿Lal kami riꞌ ri rey ke raj judiꞌabꞌ? —xchaꞌ.

Ri Jesús xubꞌiꞌij che:

—Lal kabꞌiꞌn la re —xchaꞌ.

12 Yey echiriꞌ ri nimaq e aj chakunel pa Rocho Dios kukꞌ ri nimaq winaq re Israel xkitzꞌaq uchiꞌ ri Jesús, Rire na xukꞌul ta kꞌana uwach ri kakibꞌiꞌij rike.

13 Ruma kꞌu riꞌ, ri Pilato xutzꞌonoj che ri Jesús:

—¿Na kata ta kami la janipa ri kakibꞌiꞌij chiꞌij la? —xchaꞌ.

14 Pero ri Jesús na xukꞌul ta kꞌana uwach; ruma kꞌu riꞌ, ri taqanel lik xkam ranimaꞌ che.

15 Chupa kꞌu ri nimaqꞌij Pascua, ri taqanel romano xex kuꞌan wi kuyolopij bꞌi jun chike ri e kꞌo pa cárcel, yey e ri winaq kechaꞌwik china ri kakaj kayolopix bꞌi. 16 Kꞌo kꞌu jun achi pa cárcel lik etaꞌmatal uwach, Barrabás rubꞌiꞌ.

17 Ekꞌuchiriꞌ ri winaq kimolom chi kibꞌ, ri Pilato xutzꞌonoj chike:

—¿China ri kiwaj riꞌix kanyolopij bꞌi, e ri Barrabás o e ri Jesús, ri kabꞌiꞌx che “e ri Cristo”, Ruchaꞌoꞌn lo ri Dios? —xchaꞌ. 18 Xutzꞌonoj kꞌu waꞌ ma retaꞌam e kꞌo jujun kꞌax kikꞌuꞌx chirij ri Jesús, y xa ruma kꞌu riꞌ kiyaꞌom ri Jesús chwach.

19 Ekꞌuchiriꞌ tzꞌul ri Pilato pa ri qꞌatbꞌal tzij, ri rixoqil xutaq ubꞌiꞌxikil che: «Makꞌo maꞌan la che wa jun achi jusukꞌ ubꞌinik usilabꞌik, ma waqꞌij lik kabꞌison nukꞌuꞌx ruma xinꞌan jun wachikꞌ puwi rire yey lik xibꞌibꞌal uwach ri xinwachikꞌaj» xchaꞌ.

20 Noꞌj ri nimaq e aj chakunel pa Rocho Dios kukꞌ taq ri nimaq winaq re Israel xkikoj pa kijolom ri ukꞌiyal winaq chaꞌ e kakitzꞌonoj kayolopix bꞌi ri Barrabás yey e kakamisax ri Jesús.

21 Ri taqanel xchꞌaꞌt tanchi kukꞌ ri winaq, jewaꞌ xutzꞌonoj chike:

—¿China chike wa kaꞌibꞌ kiwaj kanyolopij bꞌi? —xchaꞌ.

Rike xkibꞌiꞌij:

—E yolopij bꞌi la ri Barrabás —xechaꞌ.

22 Tekꞌuchiriꞌ, xutzꞌonoj ri Pilato chike:

—¿Yey saꞌ kꞌu riꞌ kanꞌan che ri Jesús, ri kabꞌiꞌx che “e ri Cristo”, Ruchaꞌoꞌn lo ri Dios? —xchaꞌ.

Konoje xkikꞌul uwach:

—¡Kamisax chwa cruz! —xechaꞌ.

23 Ekꞌu riꞌ ri Pilato xubꞌiꞌij chike:

—¿Saꞌ kꞌu rumak uꞌanom? —xchaꞌ.

Pero ri winaq más ko xesikꞌinik:

—¡Kamisax chwa cruz! —xechaꞌ.

24 Ri Pilato xrilo na jinta kutiqoj kuꞌan más tzꞌonobꞌal chike ma más ne ketukuk ri winaq; ruma kꞌu riꞌ, xutaq ukꞌamik yaꞌ y ekꞌu laꞌ chikiwach ri winaq xuchꞌaj ruqꞌabꞌ, y jewaꞌ xubꞌiꞌij:

—Na jinta kꞌu numak riꞌin che rukamik waꞌchi jusukꞌ rubꞌinik, ma waꞌ imak riꞌix —xchaꞌ.

25 Konoje kꞌu ri winaq xkikꞌul uwach, jewaꞌ xkibꞌiꞌij:

—Riꞌoj kukꞌ ri qalkꞌoꞌal kaqaya qibꞌ chuxeꞌ rukamik rire —xechaꞌ.

26 Ewi ri Pilato xuyolopij bꞌi ri Barrabás. Tekꞌuchiriꞌ, xtaqan che kajichꞌ upa ri Jesús y xuya pakiqꞌabꞌ ri soldados chaꞌ kakikamisaj chwa cruz.

27 Ekꞌuchiriꞌ, ri soldados re ri taqanel xkikꞌam bꞌi ri Jesús pa ri palacio y xkimol kꞌu kichiꞌ konoje ri soldados chaꞌ kakisut rij. 28 Xkesaj kꞌu bꞌi ruqꞌuꞌ y xkirip jun manta chirij yey waꞌ kaqkoj katzuꞌnik. 29 Che rujolom xkikoj jun corona pachꞌum rukꞌ kꞌiix y xkiya jukutaj tani pa ruqꞌabꞌ uwikiqꞌabꞌ. Tekꞌuchiriꞌ, xexukiꞌ chwach y xkijeq uchꞌamixik, jewaꞌ kakibꞌiꞌij che:

—¡Nim uqꞌij ri rey ke raj judiꞌabꞌ! —kechaꞌ.

30 Yey xkichubꞌaj rupalaj, xkimaj kꞌu ri jukutaj tani puqꞌabꞌ y rukꞌ laꞌ xkichꞌay rujolom. 31 Echiriꞌ xkitanabꞌaꞌ uchꞌamixik, xkesaj ri manta kiripom chirij y xkikoj tanchi ruqꞌuꞌ. Tekꞌuchiriꞌ, xkikꞌam bꞌi re keꞌkikamisaj chwa cruz.

32 Echiriꞌ katajin kelik bꞌi, xkikꞌul jun achi aj Cirene, Simón rubꞌiꞌ, y xkitaq che kutelej bꞌi ri cruz re ri Jesús. 33 Ekꞌuchiriꞌ, xebꞌopon pa ri luwar Gólgota rubꞌiꞌ, waꞌ keꞌelawi “luwar re ubꞌaqil ujolom animaꞌ”. 34 Xkiya kꞌu che ri Jesús vinagre yijbꞌam rukꞌ aqꞌes lik kꞌa; pero Rire echiriꞌ xunaꞌ waꞌ, na xraj taj xutijo.

35 Echiriꞌ kiyaꞌom chi ri Jesús chwa ri cruz, ri soldados rukꞌ jun sorteo xkijach kibꞌ puwi ruqꞌuꞌ. Jekꞌulaꞌ e xuꞌana pachaꞌ rubꞌiꞌim lo ri qꞌalajisanel chupa Ruchꞌaꞌtem ri Dios:

37 Chwi kꞌu lo rucruz ri Jesús tzꞌibꞌitalik suꞌbꞌe xqꞌat tzij puwiꞌ, jewaꞌ kubꞌiꞌij: «E JESÚS WAꞌ, RI REY KE RAJ JUDIꞌABꞌ.»

38 Xekiya kꞌu kaꞌibꞌ eleqꞌomabꞌ chwa cruz, jun puwikiqꞌabꞌ y jun pumox ri Jesús.

39 Ekꞌu ri winaq kebꞌikꞌow chiriꞌ kakiyoqꞌ kanoq, kakiyiriyaꞌ ri kijolom che, 40 y jewaꞌ kakibꞌiꞌij:

—At peꞌ ri abꞌiꞌim kawulij ri Rocho Dios y xa pa oxibꞌ qꞌij kayak tanchik; chakolobꞌej kꞌu awibꞌ riꞌ. We paqatzij wi at Ukꞌajol ri Dios, chatqaj lo chwa ri cruz —kechaꞌ.

41 Jenelaꞌ riꞌ xkiꞌan ri nimaq e aj chakunel pa Rocho Dios junam kukꞌ raj kꞌutunel re ri tzijpixabꞌ, ri fariseos y ri nimaq winaq re ri tinamit; lik xkichꞌamij, jewaꞌ xkibꞌiꞌij:

42 —Lik waꞌ kꞌut e kꞌi ri xebꞌukolobꞌej che taq yabꞌil y che kamik, yey na kuriq ta waꞌ kꞌu ukolobꞌexik ribꞌ rire. We ta paqatzij wi e Rey re ri qatinamit Israel, qaja lo riꞌ utukel chwa ri cruz chaꞌ jelaꞌ kaqakojo e rire ri Uchaꞌoꞌn lo ri Dios. 43 Ma lik waꞌ kꞌut xkubꞌiꞌ ukꞌuꞌx rukꞌ ri Dios. Yey we ta ri Dios lik kꞌax kunaꞌo, chukolobꞌej riꞌ woꞌora, ma rire ubꞌiꞌim e Ukꞌajol ri Dios —xechaꞌ.

44 Jenelaꞌ riꞌ xkibꞌiꞌij releqꞌomabꞌ eyaꞌom chwa cruz pa taq utzal, lik xkichꞌamij.

45 Echiriꞌ xtikꞌoj ri qꞌij, xok qꞌequꞌm che ruwachulew y waꞌ xuꞌkꞌisa kꞌa che ri urox ora*“Ri urox ora”: Kil “hora” pa vocabulario. bꞌenaq qꞌij.

46 Chupa kꞌu laꞌ laꞌ ora, ri Jesús lik ko xsikꞌinik, jewaꞌ xubꞌiꞌij pa ri chꞌaꞌtem kachꞌaꞌt wi Rire:

—Elí, Elí, ¿lama sabactani? —xchaꞌ. Waꞌ keꞌelawi: “Lal nu Dios, Lal nu Dios, ¿suꞌbꞌe xinoqꞌotaj kan la?”*Sal. 22:1

47 Jujun kꞌu chike ri e kꞌo chiriꞌ, echiriꞌ xkita waꞌ, xkibꞌiꞌij:

—Waꞌ waꞌchi e kusikꞌij ri qꞌalajisanel Elías —xechaꞌ.

48 Y na jampatana, kꞌo jun chike rike lik kanik xeꞌek, xuꞌkꞌama lo jun esponja y xumuꞌ pa vinagre. Xuxim kꞌu chutzaꞌm jun tani y xuya pan che ri Jesús re kutzꞌubꞌu.

49 Ekꞌu ri jujun chik xkibꞌiꞌij che:

—Maya che, qila peꞌ we kakꞌun ri Elías re koluꞌkolobꞌej —xechaꞌ.

50 Tekꞌuchiriꞌ, ri Jesús lik ko xsikꞌin tanchik y xuqꞌatisaj kꞌu ri ranimaꞌ puqꞌabꞌ ri Dios, asu xkamik. 51 Ekꞌu laꞌ la joqꞌotaj ri telón†“Telón”: E jun kꞌul kujach upa ri Luwar Santo rukꞌ ri Luwar lik Santo. Éx. 26:31-33; Heb. 6:19; 9:3-12 kꞌo chupa ri Rocho Dios xrichꞌrobꞌ chunikꞌajal; xujeq lo puwiꞌ y xoꞌlkꞌis kꞌa chuxeꞌ. Rulew lik xbꞌarbꞌatik y ri nimaq taq abꞌaj xejaqajobꞌ upa. 52 Y xejaqataj taq ri muqubꞌal yey ukꞌiyal tikawex re rutinamit ri Dios ekaminaq chik, xekꞌastaj loq 53 y xebꞌel lo chupa taq ri muqubꞌal. Ekꞌuchiriꞌ kꞌastajinaq chubꞌi ri Jesús, rike xebꞌok pa ri santowilaj tinamit yey chilaꞌ xebꞌilitaj kuma ukꞌiyal winaq.

54 Ekꞌu ri capitán y ri soldados echajiyom re ri Jesús, echiriꞌ xkil ri kabꞌraqan y ronoje taq ri xuꞌano, lik xkixiꞌij kibꞌ y jewaꞌ xkibꞌiꞌij:

—¡Paqatzij wi, waꞌ waꞌchi e Ukꞌajol ri Dios! —xechaꞌ.

55 E kꞌo kꞌu ukꞌiyal ixoqibꞌ chiriꞌ kakitzutzaꞌ pana chinimanaj; waꞌ e taq ri e petinaq rukꞌ ri Jesús chwi xel lo Galilea y lik kinimam loq. 56 Chikixoꞌl waꞌ wiꞌxoqibꞌ kꞌo ri María ri aj Magdala, kꞌo ri María ri kichu ri Jacobo y ri José, yey kꞌo ri kichu ri kebꞌ ukꞌajol ri Zebedeo.

57 Kꞌo jun achi aj Arimatea, José rubꞌiꞌ; rire bꞌeyom y e jun chike rutijoꞌn ri Jesús. Bꞌenaq qꞌij rire 58 xeꞌek kꞌu rukꞌ ri Pilato re kuꞌtzꞌonoj rucuerpo ri Jesús. Ekꞌu ri Pilato xtaqan che kayaꞌiꞌ lo rucuerpo ri Jesús che rire. 59 Ri José xukꞌam kꞌu bꞌi rucuerpo ri Jesús, xupis bꞌi pa jun manta lik saq 60 y xuꞌyaꞌa pa jun muqubꞌal re rire, waꞌ kꞌakꞌ kꞌotom paꞌbꞌaj. Xutaq kꞌu uketebꞌaxik kan jun nimalaj abꞌaj chuchiꞌ re tzꞌapibꞌal re; tekꞌuchiriꞌ, xeꞌek. 61 E kꞌo kꞌu chiriꞌ ri María ri aj Magdala y ri jun chik María, etzꞌul chwach ri muqubꞌal.

62 Ikꞌowinaq chi kꞌu ri qꞌij echiriꞌ raj judiꞌabꞌ kakiyijbꞌaꞌ pan janipa ri kajawax chike pa ri qꞌij re uxlanibꞌal. Ekꞌuchiriꞌ, ri nimaq e aj chakunel pa Rocho Dios kukꞌ ri fariseos xkimol kibꞌ rukꞌ ri Pilato 63 y xkibꞌiꞌij che:

—Qajawal, xkꞌun chiqakꞌuꞌx, laꞌ la jun achi sokosoꞌnel echiriꞌ kꞌa kꞌaslik jewaꞌ xubꞌiꞌij: “Purox qꞌij kinkꞌastaj lo chikixoꞌl ri ekaminaq.” 64 E uwariꞌche, taqa la uchajixik chi utz ri muqubꞌal kꞌa che rurox qꞌij, chaꞌ na kekꞌun ta rutijoꞌn chaqꞌabꞌ, koꞌlkelaqꞌaj bꞌi rucuerpo y tekꞌuchiriꞌ, kakibꞌiꞌij chike ri winaq: “Xkꞌastaj lo chikixoꞌl ri ekaminaq.” We ekꞌu xuꞌan riꞌ, kuꞌana ne más unimal raqꞌubꞌal riꞌ chwa ri nabꞌe uꞌanom loq echiriꞌ xubꞌiꞌij e Ruchaꞌoꞌn lo ri Dios —xechaꞌ.

65 Ri Pilato xubꞌiꞌij chike:

—Chekꞌama bꞌi alaq waꞌ wa e chajinel y jeꞌtzꞌapij alaq chi utz ri muqubꞌal —xchaꞌ.

66 Xebꞌek kꞌut, xeꞌkitzꞌapij uchiꞌ ri muqubꞌal chi utz, xkikoj jun sello puwi ri nimalaj abꞌaj tzꞌapibꞌal uchiꞌ y xekiya kꞌu kan ri e chajinel chiriꞌ.