1 Ekꞌu woꞌora hermanos, chwi ronoje taq ri kakꞌulumaj alaq, lik kiꞌkota alaq rukꞌ ri Qanimajawal. Riꞌin na kinkos ta che ubꞌiꞌxikil tanchik janipa ri nutzꞌibꞌam chi pan che alaq, ma waꞌ lik chirajawaxik che alaq.

2 Kambꞌiꞌij kꞌu riꞌ: Lik chajij ibꞌ alaq chikiwach ri winaq itzel kikꞌuꞌx, ri lik na e ta saqil aj chakibꞌ, ri xa pa ke rike kakibꞌiꞌij chirajawaxik chike konoje rachijabꞌ kaqꞌat ri kulewal chaꞌ kakoj ri retalil re circuncisión chike.*“Circuncisión”: Ri kakiꞌan raj judiꞌabꞌ echiriꞌ juna ralko ala kukꞌis wajxaqibꞌ qꞌij ralaxik, e kaqꞌat rutzꞌuꞌmalil ruwi ri rulewal, kꞌutubꞌal re e jun chike rutinamit ri Dios. Yey jujun chike raj judiꞌabꞌ kikojom rubꞌiꞌ ri Cristo kakibꞌiꞌij chirajawaxik kakoj wa retalil re circuncisión chike ri creyentes na e ta aj Israel, tobꞌ e nimaꞌq chik. Pero ri Pablo kubꞌiꞌij na chirajawaxik ta waꞌ. Ma chikiwach rike, xew ri kikojom waꞌ taqal chike e utinamit ri Dios. 3 Pero paqatzij wi rutinamit ri Dios e riꞌoj,†“Rutinamit ri Dios e riꞌoj”: Pa ri chꞌaꞌtem griego kubꞌiꞌij “riꞌoj oj re ri circuncisión”. ma riꞌoj kaqaloqꞌnimaj uqꞌij ri Dios pa saqil wi ruma ri Ruxlabꞌixel Rire. Ri qakiꞌkotemal e ruma ri uꞌanom ri Qanimajawal Jesucristo qukꞌ yey kubꞌul qakꞌuꞌx rukꞌ Rire, na rukꞌ ta ri qaꞌanom riꞌoj y na rukꞌ ta ri retalil kakoj che ri qacuerpo.

4 We ta e laꞌ kuaj kanyak nuqꞌij ruma taq waꞌ, taqal riꞌ chwe, ma na jinta junoq chike ri e aj judiꞌabꞌ uꞌanom más chinuwa riꞌin. 5 Ma xkoj ri retalil re circuncisión chwe echiriꞌ xinkꞌis wajxaqibꞌ qꞌij walaxik. Yey in kukꞌil ri e aj Israel ma nupetebꞌem lo chike ri e ralkꞌoꞌal kan ri Benjamín, rukꞌajol ri Israel. Riꞌin, in jelaꞌ pachaꞌ ri nuchu-nuqaw, lik in aj hebreo chiwalaxik.‡Ri Pablo e kukꞌil ri e aj judiꞌabꞌ kakiriq ri chꞌaꞌtem hebreo y xkꞌiy kukꞌ ri lik kitaqem ri kojobꞌal ke kan ri katiꞌ-kimam. Noꞌj e kꞌo jujun chik e aj judiꞌabꞌ na kakiriq ta ri chꞌaꞌtem hebreo, ma ri kichꞌaꞌtem e ri griego, yey kitaqem jujun che taq ri kojobꞌal ke raj griego. Yey ruma in jun chike ri fariseos, lik xinok il che taq ri taqanik ke raj judiꞌabꞌ. 6 Ruma kꞌu xinya nukꞌuꞌx che waꞌ, lik xinwesaj qꞌij che usachik kiwach ri kikojom rubꞌiꞌ ri Cristo. Lik xintaqej ri taqanik ke raj judiꞌabꞌ y chwa kꞌu riꞌ waꞌ, na jinta junoq katzꞌaqaw nuchiꞌ.

7 Echiriꞌ kꞌamajaꞌ kankoj rubꞌiꞌ ri Cristo, xinchꞌobꞌo e ronoje taq waꞌ e re yakbꞌal nuqꞌij chwach ri Dios; noꞌj woꞌora kanmaj usukꞌ na e ta uꞌanom riꞌ, ma na ruma ta waꞌ xinwetaꞌmaj uwach ri Cristo. 8 Y na xew tane laꞌ, ma chinuwach riꞌin, ronoje ri kanꞌano o ronoje ri kꞌo wukꞌ, na jinta kꞌana uwach chwa ri retaꞌmaxik uwach ri Cristo Jesús, ri Wajawal, ma Rire na jinta kꞌana kajunimax wi. Ruma kꞌu ri Jesús, xinya kan ranimaꞌ ronoje; e taq ri kꞌo wukꞌ xa e chi pachaꞌ raqꞌes chinuwach riꞌin, ma e lik nuyaꞌom wibꞌ che retaꞌmaxik uwach ri Cristo 9 y jekꞌulaꞌ in uꞌanom xa jun rukꞌ Rire. Y na e ta kꞌu kanꞌan jusukꞌ che wibꞌ ruma ri lik nutaqem ri taqanik re ri Moisés; ma xew ri Dios kaꞌanaw jusukꞌ chwe, yey waꞌ e ruma ri kubꞌulibꞌal nukꞌuꞌx rukꞌ ri Cristo. 10 Ekꞌu ri lik kuaj riꞌin e kanwetaꞌmaj más uwach ri Cristo. Yey kuaj kakꞌojiꞌ ruchuqꞌabꞌ Rire wukꞌ, jelaꞌ pachaꞌ ri xukꞌutu echiriꞌ xuchꞌij uchuqꞌabꞌ ri kamik y xkꞌastaj lo chikixoꞌl ri ekaminaq. Yey na jinta kꞌo kubꞌiꞌij nukꞌuꞌx che tobꞌ ne kantij kꞌax y kinkamisaxik jelaꞌ pachaꞌ xꞌan che Rire echiriꞌ xuya ribꞌ pa kamik. 11 Ronoje kꞌu ri kanꞌano e ruma lik kacha nukꞌuꞌx che kayaꞌtaj chwe ri kꞌaslemal na jinta utaqexik echiriꞌ ri Dios kinukꞌastajisaj lo chikixoꞌl ri ekaminaq.

12 Na e ta kꞌu kambꞌiꞌij riꞌ nuriqom chi ronoje waꞌ y na jinta chi kꞌana kajawax che ri nubꞌinik nusilabꞌik chwach ri Dios. Na e ta riꞌ. Ma e pachaꞌ kꞌa kintajin pan chi bꞌe yey e lik kantij uqꞌij kinopon che ronoje ri xraj ri Qanimajawal Jesucristo chwe echiriꞌ xinusikꞌij. 13 Hermanos, riꞌin na kambꞌiꞌij taj we nuchꞌijom chi uꞌanik ronoje ri karaj ri Dios chwe. Ekꞌu ri kanꞌano e kanya ronoje nuchuqꞌabꞌ chaꞌ e kinel pan rukꞌ ri kꞌa kꞌo chinuwach y na e ta chi kanchꞌobꞌ raqan puwi ri ikꞌowinaq chik. 14 Jekꞌuriꞌlaꞌ lik jusukꞌ kinꞌek kꞌa pa kuꞌkꞌisa wi ri nubꞌe qꞌatital chinuwach, chaꞌ jelaꞌ kankꞌul ri chomilaj sipanik, ri ubꞌiꞌtisim ri Dios chiqe ri ojusikꞌim chaꞌ kojeꞌkꞌola rukꞌ chilaꞌ chikaj ruma oj re ri Jesucristo.

15 Qonoje kꞌu ri lik oj tikil chi utz chupa ri Qꞌijsaq, e lik ubꞌe riꞌ we jelaꞌ ri qanaꞌoj. Yey we kꞌo junoq chixoꞌlibꞌal alaq junwi ri kuchꞌobꞌo, e ri Dios kaqꞌalajisan che we utz o na utz ta ri kuchꞌobꞌo. 16 Pero ri lik chirajawaxik chiqe e kaqaꞌan ronoje ri ukꞌutum chi ri Dios chiqawach.

17 Hermanos, ꞌana che ri bꞌinik alaq pachaꞌ ri nubꞌinik riꞌin. Yey e chetaqej alaq ri kakiꞌan jelaꞌ pachaꞌ ri qakꞌutum riꞌoj. 18 Ma e kꞌi ri na kakiꞌan ta waꞌ. Ukꞌiyal laj in chꞌaꞌtinaq chi ukꞌ alaq pakiwi rike, y rukꞌ oqꞌej kambꞌiꞌij tanchik: Lik qꞌalaj ruma ri kibꞌinik kisilabꞌik, rike e aj retzelal kꞌuꞌx chirij ri Utzilaj Tzij puwi rukamik ri Cristo chwa ri cruz. 19 Kopon na kꞌu ri qꞌij echiriꞌ kasach na kiwach, ma ri kidios rike e taq ri rayibꞌal re ri kitiꞌjil.§“Ri rayibꞌal re ri kitiꞌjil”: Pa ri chꞌaꞌtem griego kubꞌiꞌij “ri kidios rike e ri kipa”. Kakiꞌan ne nim che kibꞌ ruma taq ri kakiꞌano tobꞌ waꞌ lik kꞌixbꞌal uwach, yey lik kakiya kinaꞌoj che taq ri xa re ruwachulew. 20 Noꞌj kꞌu ri qatinamit riꞌoj e ri kꞌo chilaꞌ chikaj, pa qoyeꞌem wi kape ri Qakolobꞌenel, ri Qanimajawal Jesucristo. 21 Y echiriꞌ kakꞌun Rire, kujalkꞌatij na qawach riꞌoj. Jekꞌuriꞌlaꞌ ri qacuerpo, tobꞌ na jinta uqꞌij woꞌora, kuꞌana jelaꞌ pachaꞌ runimal uchomalil rucuerpo Rire echiriꞌ xkꞌastaj lo chikixoꞌl ri ekaminaq. Jelaꞌ kuꞌana Rire rukꞌ ri chuqꞌabꞌ yaꞌtal che chaꞌ kuchꞌij uchuqꞌabꞌ ronoje taq ri kꞌolik.