1 Xinwilo echiriꞌ ri Qꞌapoj Bꞌexex xulochꞌij ri nabꞌe sello y xinta uqul jun chike ri kajibꞌ kꞌo kikꞌaslemal pachaꞌ e ángeles.*Ap. 4:6-8 Rire xchꞌaw pachaꞌ uchꞌawibꞌal jabꞌ, jewaꞌ xubꞌiꞌij: «¡Saꞌa!» xchaꞌ. 2 Xinwil kꞌu jun kawayuꞌ saq rij. Yey ri kojoyom re rukꞌaꞌam jun arco puqꞌabꞌ y xyaꞌ kꞌu jun corona che. Tekꞌuchiriꞌ xel bꞌi rukꞌ unimal uchuqꞌabꞌ chaꞌ rire kuꞌchꞌija uchuqꞌabꞌ ronoje.

3 Ekꞌuchiriꞌ ri Qꞌapoj Bꞌexex xulochꞌij rukaꞌm sello, xinta uqul rukaꞌm chike ri kajibꞌ kꞌo kikꞌaslemal pachaꞌ e ángeles, jewaꞌ xubꞌiꞌij: «¡Saꞌa!» xchaꞌ. 4 Xel chi kꞌu lo jun chik kawayuꞌ, waꞌ kaq rij. Yey ri kojoyom re xyaꞌ puqꞌabꞌ karesaj ri utzil chomal che ruwachulew y kuꞌan chike ri winaq kakikamisaj kibꞌ chikiwach. Yey xyaꞌ jun nimalaj espada che.

5 Ekꞌuchiriꞌ ri Qꞌapoj Bꞌexex xulochꞌij rurox sello, xinta uqul rurox chike ri kajibꞌ kꞌo kikꞌaslemal pachaꞌ e ángeles, jewaꞌ xubꞌiꞌij: «¡Saꞌa!» xchaꞌ. Xinwil kꞌu jun kawayuꞌ qꞌeq rij, yey ri kojoyom re utzayem jun lipro*“Lipro”: Pa kaxtila waꞌ kabꞌiꞌx “balanza” che. puqꞌabꞌ. 6 Tekꞌuchiriꞌ xinta jun qulaj xchꞌaw lo chikixoꞌlibꞌal wa kajibꞌ kꞌo kikꞌaslemal pachaꞌ e ángeles, jewaꞌ xubꞌiꞌij: «Che ri kaꞌibꞌ libra trigo utz kakoj rajil jun qꞌij chak re jun mokom; yey che ri waqibꞌ libra cebada, utz kakoj rajil jun qꞌij chak re jun mokom. Noꞌj ruwaꞌal ri uva y raceite, makꞌo maꞌan che» xchaꞌ.

7 Ekꞌuchiriꞌ ri Qꞌapoj Bꞌexex xulochꞌij rukaj sello, xinta ruqul rukaj chike ri kajibꞌ kꞌo kikꞌaslemal pachaꞌ e ángeles, jewaꞌ xubꞌiꞌij: «¡Saꞌa!» xchaꞌ. 8 Xinwil kꞌu jun kawayuꞌ saqtꞌuꞌr rij. Ri kojoyom re, “Kamik” rubꞌiꞌ, yey kꞌo jun teran chirij, waꞌ e ri rajaw ri Hades, ri luwar ke ri ekaminaq. Y xyaꞌ uchuqꞌabꞌ ri Kamik chaꞌ kebꞌukamisaj jun ukaj parte chike ri winaq che ruwachulew rukꞌ espada, rukꞌ numik, rukꞌ taq yabꞌil y kuma itzel chikop e kꞌo che ruwachulew.

9 Ekꞌuchiriꞌ ri Qꞌapoj Bꞌexex xulochꞌij ruroꞌ sello, xinwil chuxeꞌ raltar janipa ri xekamisax ruma xkitzijoj ri Tzij re ri Dios y na xkewaj ta ri kubꞌulibꞌal kikꞌuꞌx rukꞌ ri Dios. 10 Rike lik ko kesikꞌinik, jewaꞌ kakibꞌiꞌij: «Lal Dios Qajawxel, Rilal lik Lal jusukꞌ y janipa ri bꞌiꞌim la, lik e kuꞌanaꞌ. ¿Jampalaꞌ kaqꞌat la tzij pakiwi ri tikawex e kꞌo che ruwachulew y kaꞌan kꞌu la ukꞌaxel chike ri xekamisan qe?» kechaꞌ. 11 Y xyaꞌ kꞌu kiqꞌuꞌ lik saq y xbꞌiꞌx chike kakoyꞌej na kꞌenoq, ma kꞌamajaꞌ katzꞌaqat ri kajlibꞌal ri kachbꞌiꞌil kekamisaxik jelaꞌ pachaꞌ xꞌan chike rike.

12 Ekꞌuchiriꞌ ri Qꞌapoj Bꞌexex xulochꞌij ruwaqaq sello, xinwilo xaqikꞌateꞌt xpe jun nimalaj kabꞌraqan. Ri qꞌij lik xuꞌan qꞌeq uwach jelaꞌ pachaꞌ juna kꞌul qꞌeq katzuꞌnik.†Waꞌ e pachaꞌ ri kꞌul kakikoj ri tikawex ojertan echiriꞌ kakam juna katz-kichaqꞌ yey waꞌ lik tzakꞌan upa. Y ri ikꞌ lik xuꞌan kaq uwach jelaꞌ pachaꞌ katzuꞌn ri kikꞌ. 13 Y taq ri chꞌumil e kꞌo che ruwa kaj xetzaq lo chwa ruwachulew, jelaꞌ xuꞌano pachaꞌ ri kuꞌan juna cheꞌ re higo kꞌo uwach echiriꞌ kakꞌun juna nimalaj tew y kujabꞌajaꞌ lo ronoje ruwach kꞌa rax. 14 Ruwa kaj xmalkaꞌnik jelaꞌ pachaꞌ kuꞌan ri wuj echiriꞌ kabꞌotik. Yey ronoje juyubꞌ rukꞌ ronoje isla xjalkꞌatix kiluwar. 15 Ekꞌu taq raj taqanel che ruwachulew, ri lik kꞌo kiwach, ri bꞌeyomabꞌ, ri e taqanelabꞌ pakiwi soldados, ri lik kꞌo kichuqꞌabꞌ, ri eloqꞌotal ruma kajaw yey ri na e jinta puqꞌabꞌ juna kajaw, konoje kꞌut xeꞌkewaj kibꞌ pa nimaq taq jul y chuxeꞌ nimaq taq abꞌaj kꞌo che ruwa taq juyubꞌ, 16 jewaꞌ kakibꞌiꞌij chike taq ri juyubꞌ y chike ri nimaq taq abꞌaj: «Chichꞌuqu lo qawiꞌ y chojiwewaj chwach ri Jun tzꞌul pa ri tzꞌulibꞌal re taqanik y chwach ri royowal ri Qꞌapoj Bꞌexex. 17 Ma xopon ri unimal qꞌij re ri qꞌatbꞌal tzij. ¿Yey china kꞌu ri kuchꞌijo katakꞌiꞌ chikiwach rike?» kechaꞌ.